ECLESIASTES 4

1Ax icx o wile ke xjal in che baj yajla'n tzalu twitz tx'otx', ex o wile ke xjal lu in che ok' tu'nju in che yajlanjtz ex mi a'l jun ba'n tk'ukbante cyc'u'j; in che baj c'ixbisa'n cyu'n ke yajlal cye ex mi a'l jun ba'n tk'ukbante cyc'u'j. 2Cyja'tzun o nmaye: Mas at tzalajbil cye xjal o che cyim cywitz keju itz'x ke; 3ex mas ba'n ate' keju na'nx cyitz'j cywitz keju o che cyim ex cywitz keju itz'x, porque akeju na'nx cyitz'j na'nx tcyil aju mya ba'n in binchanjtz tzalu twitz tx'otx'. 4Ax icx o wile at junjun xjal in che ak'nan wen ex ba'n nne'la cyak'unben tu'n mi'n cyoc te ch'in cywitz ke cyuc'il. Ax icx nokx gan jlu, ic tten jlu ic tza'n jun xjal taj tu'n ttzaj ttzyu'n cyk'ik' tu'n tk'ab. 5Aju xjal minti' tnabl, nok tz'ulin ke tk'ab ex tu'nx tib in naj. 6Mas ba'n ka nok ch'in at ke ex in ko ank'in tuj txubtxaj, twitzju tu'n tten nim at ke ex minti' in ko ank'in tuj txubtxaj; ic tten jlu ic tza'n jun xjal taj tzaj ttzyu'n cyk'ik' tu'n tk'ab. 7Ax icx o wile juntl cybinchben xjal nokx gan tzalu twitz tx'otx': 8O wile jun xinak tjunal at, minti' jun tamiw, mi jun tc'wa'l ex mi jun terman; minti'xix ch'in in cub ten ojlal ex minti' in baj tgan tu'n tchmonte tk'inumabl, ex minti' in ximan ti'j jlu: ¿Al etzun c'ajbel ju k'inumabl in chin ak'nane ti'j ex minti' ch'in in chin ojlane? Chiwt. Ax icx nokx gan te jlu ex jun iktz alxix te te. 9Mas ba'n cabe xjal twitzju nok junx xjal, porque cyja'tzun ba'n c'elel aju ak'untl in bant cyu'n. 10Porque ka ma cub tz'ak jun, jacu jaw waban tu'n juntl. Pero bec'bil twitz ju xjal in cub tz'ak ex tjunalxte at, pwes mi a'l jun ba'n tjaw wabante te. 11Ax icx ka ma che cub tan cabe xjal junx, in baj cymek'san cyib cycabil; katzun tjunalxte jun, ¿tza'n tten tu'n tmek't? 12Jun xjal tjunalxte at, jacu cub ti'j, katzun at cabe cybet, jacu cyclonte cyib. Ax icx jun nok' te ox twitz, mlay cub tzakj naj. 13Mas ba'n jun cu'xun meba ex at tnabl, twitz jun rey tij xjal ex minti' tnabl, porque ate rey mlay tz'ocx jun consej tuj twi'. 14Masque tuj pres tz'etz jun cu'xun tu'n tcawin, ex masque meba te tej titz'j, tuj ju tcawbil ma wile ke xjal ate' twitz tx'otx' in che oc ten cyuwsalte tej toc te rey. 16Ex masque mlay bant cyajlanjtz ke tnam akeju in cawin cyibaj, pero ke xjal mlay che tzalaj ti'j, icx ke cyiyjil ke xjal lu, akeju che ul itz'j te tibajxi, mlay che tzalaj ti'j. Ax icx nokx gan jlu ex ic tten jlu ic tza'n jun xjal taj tu'n ttzaj ttzyu'n cyk'ik' tu'n tk'ab.

will be added

X\