ECLESIASTES 3

1Tcyakil banimaj tk'ijlalil tzalu twitz tx'otx', teyle junjun ti'xti at tk'ijlalil tu'n tbinchet: 2At tk'ijlalil tu'n kul itz'j, ex at tk'ijlalil tu'n kcyim. At tk'ijlalil tu'n tcu'x awat awal, ex at tk'ijlalil tu'n tjaw baket aju otok cu'x awat. 3At tk'ijlalil tu'n cycub byet xjal, ex at tk'ijlalil tu'n cyoc k'anit. At tk'ijlalil tu'n tbaj xitet jun ja, ex at tk'ijlalil tu'n tjaw binchet. 4At tk'ijlalil tu'n kjaw ok', ex at tk'ijlalil tu'n ktze'n. At tk'ijlalil tu'n cybisun xjal ti'j jun cyimni, ex at tk'ijlalil tu'n cynink'ijin xjal. 5At tk'ijlalil tu'n tbaj cysputun xjal abj, ex at tk'ijlalil tu'n toc cychmo'n. At tk'ijlalil tu'n ttzaj cychle'n cyib xjal, ex at tk'ijlalil tu'n mi'n ttzaj cychle'n cyib. 6At tk'ijlalil tu'n tjyet jun ti'xti, ex at tk'ijlalil tu'n t-xi naj. At tk'ijlalil tu'n t-xi c'u't jun ti'xti, ex at tk'ijlalil tu'n tex xo't. 7At tk'ijlalil tu'n tcub sbit'un jun xbalun, ex at tk'ijlalil tu'n tbaj xbukit. At tk'ijlalil tu'n mi cyyolin xjal, ex at tk'ijlalil tu'n cyyolin. 8At tk'ijlalil tu'n cyc'ujlante cyib xjal, ex at tk'ijlalil tu'n tel cyic'un cyib. At tk'ijlalil tu'n toc k'oj, ex at tk'ijlalil tu'n twe' k'oj. 9¿Ti in tcamba'n xjal tu'nju nimxix in ak'nan? 10Ma wile ak'untl ma cub tk'o'n Dios cyibaj xjal tu'n cyak'nan ti'j. 11Tcyakilju o tbincha Dios puro ba'n; ex o tbincha teylex te junjun tuj tk'ijlalil; ax icx xi tk'o'n Dios cynabl xjal tu'n tel cynic' ti'j ju at te jumajx; masque icju, pero mlay tz'el baj cynic' xjal ti'j tcyakilju o tbincha Dios ex ti'j ju cbantel tu'n te tibajxi. 12Ma tz'el nnic'e ti'j aju mas ba'n tu'n tbant cyu'n xjal, atzun tu'n cytzalaj ex tu'n cybinchante ba'n tuj tcyakil cyank'ibl, 13porque ka in ko wa'n, ex ka in ko c'an ex ka in ko tzalaj ti'j ju ma kc'am ti'j kak'unben, in kbincha'n jlu porque ax Dios ma tzaj k'onte ke. 14Ax icx ma tz'el nnic'e ti'j, tcyakilju o tbincha Dios cyjel ten te jumajx. Minti' ch'in atx taj tu'n toc tz'akset ti'j ex minti' tu'n tel k'it ti'j. Ma tbincha Dios icju tu'ntzun kxob twitz. 15Tcyakilju at ja'lo, attok t-xe tnejel, ex tcyakilju tzul, ya at ja'lo. Banin ti'j tu'n Dios tu'n tbant juntl maj aju o bant ojtxi. 16Ax at juntl ma wile tzalu twitz tx'otx'; minti' ch'in ba'n in bant cyu'n xjal, nok o'cx ju mya ba'n in bant cyu'n te t-xelju tu'n tbant ju tz'aklxix cyu'n ex tu'n cyten tuj tumelxix. 17Cyja'tzun o cub nximane: Ke xjal tz'aklxix ex keju binchal mya ba'n che oquel tuj xjel tu'n Dios ti'j cybinchben, porque teylex junjun ti'xti at tk'ijlalil tu'n tbinchet. 18Ax icx o cub nximane ti'j cymod xjal; niban cyoc tk'o'n Dios ke xjal tuj malbil tu'ntzun tel cynic' ti'j ka ic cyten ic tza'n ke txcup. 19Ax toc, ke xjal ex ke txcup junx ta' ju bajsbil te cyank'ibl: Ic tza'nx ke txcup in che cyim, ax icx ke xjal, ex cycyakil ke junx ta' cyxew. Mya mas nim t-xilen jun xjal twitz jun txcup; porque tcyakil jlu nokx gan. 20Cycyakil in che pon baj tuj junx lugar; ti'j tkukil tx'otx' e jaw bincha'n cycyakil ex ax tkukil tx'otx' che oquel. 21¿Alcye jun ba'n tu'n ka aju t-xew xjal in jax max tuj cya'j, atzun t-xew txcup in xi' max tjak' tx'otx'? 22Ma tz'el nnic'e ti'j, minti' juntl mas ba'n twitzju tu'n ttzalaj xjal ti'j tak'unben, porque atzun ma tc'am tu'n Dios, ex mi jun jacu tzaj k'inte te tu'n tlonte ti cbajel te tibajxi otokxi cyim.

will be added

X\