ECLESIASTES 12

1Cucx ximana ti'j Dios aju binchan teya, acux cu'xuna ex acux na'nx tul canun tk'ijlalil mya ba'n, porque tzul tk'ijlalil tu'n tmanteya: Ya minti'tl in chin tzalaje cucx tu'n ntene. 2Na'ntza ja'lo na'nxtok toc yupj twitz k'ij ex twitz xjaw ex cywitz ke che'w, porque mlay che tila ke, ex atxcu muj tic'lenxi jbal tuj twitza tu'nju sjumin ti'j. 3Tzul tk'ijlalil tu'n cytzaj lu'lun ke tk'aba o che ajben te clol teya, ex cbajel cyipun ke tkana, mya nim twitz teya che cyjel ten tu'n twa'na; c'oquel yupj ti'j tbak' twitza ex mlay tila wen. 4Oc tul canun tk'ijlalil lu, mlay tbiya aju in k'ajt tuj cay, porque che lametel ke t-ẍcyina, ex ya mlay tbiya tk'ajk'ajel cycya' xjal, mi cybitz ke chyu'j. 5Tzul tchi ti'ja oc tjax beta jawl ex puro xobajil tu'n tbeta tuj be. C'oquel ttzmal twi'ya puro sak, ex pen cbetela, ex minti'tl taja ti'j jun ti'xti. Cyja' t-xi' xjal tuj tnajbil te jumajx, ex in binjtz ma tuj cay aju ok'el nno'c ti'j xjal oc tcyim. 6Cucx ximana ti'j Dios bi'x ja'lo, aju binchan teya, na'nxtok tlakj tak'al sak pwak, ex na'nxtok tpax ju c'il k'an pwak ttx'otx'il, ex na'nxtok tpax ju ẍok' ttzi jul jatum in jatz a', ex na'nxtok tnaj garruch in ajben tu'n tjatz a'. 7Porque te tibajxi jlu, aju kximlal c'oquel juntl maj te tx'otx' ic tza'n tten nej, ex aju kxew c'ajel juntl maj tuc'il Dios porque tuc'il Dios tzaj. 8Akine pacbal in xi nma'ne juntl maj: Nokx gan jlu, nokx gan jlu; tcyakil jlu nokx gan. 9Ex tej toc ju pacbal mas at-xix tnabl, xi tk'o'n mastl xnak'tzbil cye xjal ti'j tcyakilju ba'n tu'n. Ax icx xi tk'on tib tu'n t-xnak'tzan ti'j nimcu yol te xnak'tzbil, ex tu'n tbaj tbincha'n tuj ttxolil. 10Oc tilil tu'n pacbal tu'n cycnet ke yol tujxix tumel, ex tu'n cycub ttz'iban ke yol tuj ttxolil ex axix toc. 11Aju cyyol ke xjal at cynabl ic cyten ic tza'n jun tze' tz'u'p twi' in ajben tu'n cwentil wacẍ, ex octzun cybaj chmet, ic cyten ic tza'n jun stac awa'nxix wen tu'n jun pastor. 12Ja'lotzun nc'wa'l, tz'ocx tnabla ti'j tcyakil jlu. Tu'n cybinchet ke libro, a jlu minti' bajsbil te, ex tu'nju nim in xnak'tza'n xjal ti'j, nim in sict. 13Aju yol cxel nma'ne te bajsbil atzun jlu: Nimana te Dios ex japunx ke tmandamyent tu'na, porque atzun ba'n tu'n tbant cyu'n xjal. 14Porque ko oquel tuj xjel tu'n Dios ti'j tcyakilju in kbincha'n, ka ba'n ex ka mya ba'n, ex masque tuj ewaj otok bant ku'n.

will be added

X\