DEUTERONOMIO 9

1Akeye aj Israel cybintze: Ma pon or tu'n cyic'xe tuj nima Jordán, tu'n tcub cyi'j mastl nasyon cyu'ne, ex tu'n cyoque tajwil cytx'otx'. Ke nasyon lu mas nim cybaj cywitze ex mas nim cyipumal ic tza'n cyeye; matij ke tnam at ex ma' cywa'l muro toc cyi'jele. 2Ke xjal najl cyuj ke tnam lu, nim cyipun, ma' cywa'l porque tiyjil Anac ke. Bi'ntl cyu'ne aju cyyol xjal cyi'j: ¿Alcye jacu xcye' cyi'j ke tc'wa'l Anac? Che chi. 3Tz'elx cynic'e ti'j, ate Kman Dios cbel nej cywitze ic tza'n jun k'ak' in baj tz'e'y tcyakil tu'n; ke nasyon lu che najel tu'n ex cbel cyi'j tu'n, tu'ntzun cyex cylajo'ne ex tu'n cynaj cyu'ne jurat naj, ic tza'nx o tma Kman cyeye. 4Octzun cyex tlajo'n Kman Dios ke nasyon lu cywitze, mi'n cymaye tuj cyanmiye cyja': Nok tu'nju tz'aklxix ko' ma ko oc tajwil tx'otx' lu tu'n Kman, nokax che chiye, porque mya ic ttenju. Che elex tlajo'n Kman ke xjal lu cywitze porque jumajx aj il ke. 5Mya tu'nju ba'n cybinchbene ex mya tu'nju tz'aklxix keye twitz Kman che oquele tajwil cytx'otx' ke xjal lu; che elex tlajo'n Kman ke xjal lu cywitze porque jumajx aj il ke, ex tu'ntzun tjapun aju yol o bant ti'j tu'n cyuc'il ke cyxe'chele Abraham, Isaac ex Jacob. 6Tz'elx cynic'e ti'j, mya tu'nju mejor xjal keye ctzajel k'o'n aju tbanil tx'otx' te cyetzbile tu'n Kman Dios, porque akeye jun tnam miban che nimane. 7Mi'n tzic' tna'l cyu'ne tza'n tten o tzaj tk'oj Kman Dios cyi'je tu'n tlaj cybinchbene mya ba'n o bant tuj tzkij tx'otx'. Atxix tej cyetze tuj Ejipt ex tejxi cyule tzalu, minti' o txi cynimane tyol Kman. 8Tej cytene t-xe witz Horeb, tzaj tk'oj Kman cyi'je tu'n tlaj cybinchbene mya ba'n. Tu'ntzun jlu otok bant tten tu'n cynaje tu'n. 9Tej njaxe twi witz c'molte ke tz'lom abj jatum tz'iban aju yol o bant ti'j tu'n Kman cyuc'ile, atzun in tene 40 ki'j ex 40 konic'an, minti' in wa'ne ex minti' in c'ane. 10Tzajtzun tk'o'n Kman cabe tz'lom abj weye, tz'ibamaj cywitz tu'nx Dios, ex cywitztzun ke jlu tz'ibamaj ke yol tzaj tma'n Dios cyeye tuj tmij tkan k'ak' twi witz, tuj k'ij tej tcub cychmon cyibe. 11Tbajlenxi 40 k'ij ex 40 konic'an, tzaj tk'o'n Kman ke cabe tz'lom abj weye, jatum tz'iban aju yol o bant ti'j tu'n cyuc'ile, 12ex tzaj tma'n Kman weye cyja': We'ctza, tcu'x naja t-xe witz, porque ke t-xjalila, akeju e je'tz ti'na tuj Ejipt, ma che binchan mya ba'n. Jurat ma tz'el cypa'n cyib ti'j be xi nma'ne cye. Ma baj cybincha'n jun cydios ti'j k'an pwak otok cub ulj tuj k'ak'. 13Tzaj tma'ntl Kman weye cyja': Matzun tz'el nnic'e cyi'j ke xjal lu, ax toc miban che bin. 14Mi'n colina cyi'j tu'n cynaj wu'ne ex tu'n mi'n ttzaj na'ntl cybi twitz tx'otx'. Ti'ja c'elel jlet jun nasyon wu'ne mas nim tipun ex mas nim cyajlal cywitz ke jlu, chi Kman weye. 15In julin witz wen tu'n k'ak' tej ncu'tze twi', k'i'n cabe tz'lom abj wu'ne jatum tz'iban aju yol cyaj bant ti'j tu'n Dios cyuc'ile. 16O wile otok che binchane il twitz Kman Dios, otok cub cybincha'ne jun tilbilal tal wacẍ k'an pwak ttx'otx'il, tu'n toc te cydiose, ex otok tz'el cypa'n naj cyibe ti'j be otok tzaj k'ma'n cyeye tu'n Kman. 17Tejtzun twile jlu e cub nxo'ne ke cabe tz'lom abj, akeju tzyu'ntok wu'ne, ex e cub nbuchine ke cywitze. 18In cubtzun ẍmeje'ye juntl maj twitz Kman, ic tza'nx otok bant wu'ne nej, ex in tene 40 k'ij ex 40 konic'an minti' in wa'ne ex minti' in c'ane, tu'n tlaj tcyakilju mya ba'n otok cybinchaye twitz Kman, ex otok tzaj tk'oj Kman cyi'je. 19Tzaj t-xobil wi'je tu'n tlaj tk'oj Kman ex ttx'u'jil otok tzaj cyi'je; otok cub t-ximan tu'n cynaje tu'n, pero in cubsane twitz cyi'je, ex in tzaj bine tu'n juntl maj. 20Ax icx otok tzaj nim tk'oj Kman ti'j Aarón ex o tajbe tu'n tnaj tu'n, pero in cubsane ti'j tu'n mi'n tnaj. 21Atzunju tilbilal tal wacẍ otok cub cybincha'ne te cydiose, aju otok che bincha'ne il tu'n, tzaj wi'ne ex ocx npatune tuj k'ak', baj npaẍu'ne ex baj nche'ne wen tejxi toc te kuk. Xi nchitune kuk lu tuj nima in cu'tz twi witz. 22Ax icx cyuj lugar Tabera, Masah, ex Kibrot-hataava, tzaj tk'oj Kman cyu'ne tu'n tlaj cybinchbene mya ba'n. 23Ex tej ttzaj tma'n Kman cyeye tuj Cades-barnea tu'n cyjaxe etzalte tx'otx' otok tzaj ttziyan tu'n ttzaj tk'o'n cyeye, pero mi'n che chiye, minti' ke' cyc'u'je ti'j, ex minti' xi cynimane tyol. 24Atxix tej twile cywitze, el nnic'e cyi'je, miban che nimane te Kman. 25Tu'nju otok cub t-ximan Kman tu'n cynaje tu'n, cyja'tzun in cub mutze'ye twitz 40 k'ij ex 40 konic'an, 26in cubsane twitz ex xi nma'ne te cyja': Nman, mi'n che cub tnajsa'na ke xjal lu, akeju etzan tu'na ex o che colpet tu'na tu'n tipumala, ex tu'nx tipumala o che etz ti'na tuj Ejipt. 27Na'ntza ke tmajena Abraham, Isaac ex Jacob. Mi'n tz'oc tk'o'n twitza ti'j cychcyinibil aj Israel, mi ti'j cybinchben mya ba'n ex mi ti'j cyil; 28tu'ntzun mi'n cymante xjal cyja' tuj tx'otx' jatum o ko etz ti'na: Minti' o xcye' Cydios tu'n cyocx tuj tx'otx' xi ttziyan cye, ex o che el tic'un; cyja'tzun e je'x ti'n tzalu tu'n cycub tbyo'n tuj tzkij tx'otx', jacu che chi aj Ejipt. 29Pero teya ke, ex etzan ke tu'na; porque aya etz k'inte cye tuj Ejipt tu'n tipumala nimxix, nchitzune.

will be added

X\