DEUTERONOMIO 8

1Cycyakil ke mandamyent ma che'x nma'ne cyeye ja'lo, tz'oc tililx cyu'ne tu'n cyjapun cyu'ne, tu'ntzun cyank'ine, ex tu'n tchmet nim cybaje, ex tu'n cyoque tajwil tx'otx' aju tzaj ttziyan Kman cye cyxe'chele. 2Cyna'ntze tcyakilju baj tej cybete 40 abk'i tuj tzkij tx'otx' ẍaklu'n keye tu'n Kman Dios, tu'ntzun cymansixe ex tu'n tel nic'baj cyi'je, tu'ntzun tojtzkinte alcye cyximbetze tuj cyanmiye, ka tu'n cyjapun ke tmandamyent cyu'ne ex ka mi'n. 3Masque o che yajlanjtze tu'n ex o tzaj we'yaj cyi'je, pero te tibajxi o tzaj tk'o'n cywaye maná. Aju wabj lu minti' ojtzki'ntok cyu'ne ex mi cyu'n ke cyxe'chele. O tbincha Dios tcyakil jlu tu'ntzun tel cynic'e ti'j, ka mya o'cx tu'n wabj jacu tz'ank'in xjal, ax icx jacu tz'ank'in tu'n tcyakil yol in tma'n Kman. 4Tuj 40 abk'i lu minti' baj cyxbalune ex minti' e xi mal cykane tu'n betin. 5Tz'elx cynic'e ti'j jlu, e cub cawine tu'n Kman Dios ic tza'n jun mambaj in cawin cyi'j tc'wa'l. 6Che japunx ke tmandamyent Kman Dios cyu'ne, che lpe'que cyi'j ke t-xnak'tzbil ex tenx cychiylal tuj cywitze. 7Porque che oquex k'i'ne tu'n Kman tuj jun tx'otx' tbanilxix, jatum at nim a' in bet cyuj ke tkan xak, at a' in jatz jlet tuj tx'otx', ex in jatz pulwin cyuj chk'ajlaj ex cywi' ke witz. 8Tuj tx'otx' lu in tzaj triw ex sebad, at tkan uva, tkan higo, tkan carnad ẍok', tkan olivo, ex at cychi'ye aseyt ex cylo'ye ta'l cab tuj c'ul. 9Mlay che apane we'yaj tuj tx'otx' lu, ex minti' jun ti'xti mi'nwt canun cyeye; atzun ate' ke abj at tbanil c'uxbil cyuj, ex jacu tz'etz c'uxbil cobre cyu'ne cyuj ke witz. 10Oc cybaj wa'ne ex oc tnoj cyc'u'je wen, cxel cyk'o'ne chjonte te Kman Dios tu'nju tbanil tx'otx' otok tzaj tk'o'n cyeye. 11Cyk'o'nque cwent cyi'je tu'n mi'n tic' tna'l Kman Dios cyu'ne. Che japunx ke tmandamyent cyu'ne, ke tley ex ke tcawbil, akeju ma che'x nma'ne cyeye ja'lo; 12porque oc cybaj wa'ne ex oc cynoje wen, ex oc tjaw cybincha'ne cyjaye tbanilxix ex oc cynajane cyuj, 13oc cychmet cywacẍe ex cyẍne'le, oc tchmet k'an pwak ex sak pwak cyuc'ile, ex oc tchmet cyk'inumable, 14mya yaj jaw cyniman cyibe tuj cyanmiye tu'n tcyakil jlu, ex jacu tzic' tna'l Kman Dios cyu'ne, aju etz k'inte cyeye tuj Ejipt jatum ate'toke te majen. 15A ẍaklunte cyeye tuj jun nintz tzkij tx'otx' ex xobajilxix, jatum ate'tok nim lobaj in che cyim xjal cyu'n, jatum ate' nim si'nin, ex jatum tzaj nim txketle'n cyi'je ex misicyer a' at; pero etz ti'n Kman a' tuj jun pic cyuwxix ex tzaj tk'o'n te cyc'aye. 16Tej cytene tuj lugar lu, tzaj tk'o'n Kman cywaye maná, aju minti' ojtzki'n cyu'n ke cyxe'chele. O tbincha Dios tcyakil jlu tu'ntzun cyoque mans, tu'n tic' twitz cyi'je, ex tu'n tel ba'n te cyeye te tibajxi. 17Mi'nwt cymaye tuj cyanmiye cyja': Tcyakil k'inumabl lu ma cnet tu'n kexe kipumal, 18nok o'cx tzulx ti'j cyc'u'je, ate Dios in tzaj k'onte cyipumale tu'n tcnet cyk'inumable, tu'ntzun tjapun aju yol o cyaj bant ti'j tu'n cyuc'il ke cyxe'chele. 19Katzun ma tzic' tna'l Kman Dios cyu'ne, ka ma che oc lpe'ye cyi'j junxitl dios ex ka ma che cub ẍmeje'ye tu'n cyc'ulune cywitz, bi'x ja'lo in xi nma'ne cyeye, jumajx che najele, 20ic tza'n ke nasyon che najel tu'n Kman, akeju che oquel cyc'ulba'ne tuj cybeye. Ax icxtzun cyeye che najele ka mi'n ma txi cynimane tyol Kman Dios.

will be added

X\