DEUTERONOMIO 7

1Oc cypon k'i'ne tu'n Kman tuj tx'otx' c'oquel te cyetzbile, ex oc cyex tlajo'n ke wuk nasyon mas ma' ex mas nim cyipun cywitze, ex ake jlu: Ke aj Hetey, ke aj Gergesey, ke aj Amorrey, ke aj Canaán, ke aj Ferezey, ke aj Hevey ex ke aj Jebusey, 2ex oc cycub tz'ak ke nasyon lu tuj cyk'abe tu'n Kman Dios; oc tcub cyi'j cyu'ne bi'x che bajel naj cyu'ne te jumajx, mi'n bant ti'j jun cyyole cyuc'il, ex mi'n tzaj k'ak'an cyc'u'je cyi'j. 3Mi'n che moje'ye cyuc'il; ex mi'n txi cyk'o'ne cyme'jele tu'n toc te cyxu'jil cycy'ajal, ax icx cyeye mi'n tzaj cyi'ne cyme'jel tu'n toc te cyxu'jil cycy'ajale, 4porque ka ma cybinchaye icju, c'elel cypa'n cyib ke cyc'wa'le ti'j Kman cyu'n ke txin lu ex oc che c'ulul cywitz junxitl dios; tu'n jlu ctzajel tk'oj Kman cyi'je, ex jurat che najele tu'n. 5Aju cbantel cyu'ne cyi'j ke xjal lu; cbajel cyxitune ke altar te c'ulbil cywitz cydios, bi'x che bajel cybuchine ke abj in che c'ulun cywitz ex che bajel cytx'emine ke tze' in che c'ulun cywitz, ex cbajel cypatune ke tilbilal. 6Porque akeye jun nasyon pa'maj tu'n Kman Dios tu'n cyoque te tecuxix; o'cx akeye o che jaw t-sc'o'n cyxol mastl nasyon tuj tcyakil twitz tx'otx', tu'ntzun cyoque te jun nasyon ma'xix toclen te te. 7At tgan Kman cyi'je ex o che jaw sc'o'ne tu'n, pero mya tu'nju mas nim cybaje cywitz mastl nasyon, porque ax toc akeye mas nic'xi cybete cywitz mastl nasyon. 8O che etz k'i'ne tu'n Kman tuc'il tipumal nimxix, ex o che tzokpete tu'n tjak' tcawbil Faraón tuj Ejipt jatum ate'toke te majen; nok tu'nju c'ujla'n keye tu'n ex tu'n tjapun aju yol tzaj ttziyan cye cyxe'chele. 9Tz'elxtzun cynic'e ti'j jlu, ate Kman Dios jun Dios axix toc, in japun tyol ex cucx ctel tk'ak'bil tc'u'j cyi'j nimcu cyiyjile che ul itz'j te tibajxi, akeju in che c'ujlante te ex in che japun ke tmandamyent cyu'n; 10atzun keju in che el ic'unte te, in che naj tu'n. Atzun in baj cyi'j tu'n tlaj cybinchben mya ba'n; minti' in cub tyo'n nim tyemp tu'n tcub tk'o'n cycastiw keju in che el ic'unte te. 11Cyja'tzun, japunx cyu'ne ke mandamyent, ke ley ex ke cawbil in che'x nma'ne cyeye ja'lo. 12Ka ma txi cybi'ne cycyakil ke ley lu, ka ma txi cynimane ex ka ma che japun cyu'ne, cucxtzun cjapunel tu'n Kman Dios aju yol tzaj ttziyan cye cyxe'chele, ex cucx ctel tk'ak'bil tc'u'j cyi'je. 13Oc che c'ujlanjtzele tu'n, che bel cy'iwla'ne, cchmetel cybaje; che bel cy'iwla'n ke cyc'wa'le tuc'ix tcyakil twitz cyawale, cytriwoye, cyc'aye ta'l twitz uva, cychi'ye aseyt, ke tal cywacẍe ex ke tal cyẍne'le, atzun tcy'iwbil Dios jlu oc cyc'ma'ye tuj tx'otx' tzaj ttziyan cye cyxe'chele tu'n ttzaj tk'o'n cyeye. 14Mas che cy'iwlanjtzele cywitz mastl nasyon; minti' jun xu'j miban alin ctel cyxole, ex mi jun xinak miban c'wa'lin, ax icx cyxol ke cyalune. 15Mlay tak' Kman ambil tu'n ttzaj yabil cyi'je ex ka tx'u'j yabil, ic tza'n o cyile tej ttzaj cyi'j aj Ejipt; nok o'cx cxel tk'o'n Dios yabil lu cyi'j cycyakil aj k'oj cyi'je. 16Atzun cyeye, bi'x che bajel naj cycyakil ke nasyon cyu'ne, akeju che bel tz'ak tuj cyk'abe tu'n Kman Dios; mi'n tzaj k'ak'an cyc'u'je cyi'j, ex mi'n che c'ulune cywitz cydios, porque ake jlu jun c'obil te cyeye. 17Mya yajcu cub cyximane cyja': Ke nasyon lu mas nim cybaj kwitz, ¿Tza'n tten tu'n kxcye' cyi'j tu'n cyex klajo'n? Jacu che chiye. 18Mi'n che xobe cywitz; cyna'ntze aju tbincha Kman Dios ti'j Faraón ex cyi'j cycyakil ke xjal ate'tok tuj Ejipt. 19O cyile ke c'ixbisabl tzaj cyi'j aj Ejipt, ex ke señ, ke binchben nim cyipumal, ex tza'n tten e je'tze tuj Ejipt tu'n Kman Dios tu'n tipumal nimxix. Icx cbantel tu'n Kman cyi'j cycyakil ke nasyon in che xobe cywitz. 20Ax icx ctzajel t-sma'n Kman txkan ttxu sichal cyi'j, tu'ntzun cycyim keju otok che cyaj ank'in, ex keju otok txi cyewan cyib cywitze. 21Cyja'tzun mi'n che jaw lu'lune cywitz ke jlu, porque at Kman Dios cyxole, aju Dios ma' toclen ex xobajilxix. 22Chebale' che elex tlajo'n Kman ke nasyon lu, ex mya jurat che bel baj cyu'ne, porque jaculo che chmet nim txcup te tjak' c'ul ex jaculo che oc tzokpaj cyi'je. 23Che tzajel tk'o'n Kman Dios ke nasyon lu tuj cyk'abe, ex bi'x ctzajel baj cyc'u'j tu'n, ocxi cybaj naj cycyakil. 24Che tzajel tk'o'n ke cyrey tuj cyk'abe, ex mlay tzaj na'ntl cybi cyxol xjal twitz tx'otx'. Mi jun cxcye'bil cyi'je tuj k'oj, ocxi cycub baj cycyakil cyu'ne. 25C'oquex cypatune ke tilbilal cydios tuj k'ak'; mi'n pon cyc'u'je ti'j k'an pwak ex sak pwak toc cyi'j ex mi'n tz'el cyi'ne jun ti'xti cye tu'n toc te cyeye, tu'ntzun mi'n cycub tz'ake tuj il tu'n jlu, porque ic'un jlu tu'n Kman Dios. 26Cyja'tzun mi'n tz'ocx cyk'o'ne tuj cyjaye jun ti'xti in ajben cyi'j tilbilal, tu'ntzun mi'n ttzaj mya ba'n cyibaje. Cyk'o'nque tcyakil jlu te mya ba'n, ex cyic'un ele, porque banimaj cyi'j tu'n Dios tu'n cynaj te jumajx.

will be added

X\