DEUTERONOMIO 6

1Atzun ke mandamyent lu, cyuc'ix ke ley ex ke cawbil o che tzaj tma'n Kman Dios tu'n cyxi nxnak'tza'ne cyeye, ex tu'n cyjapun cyu'ne oc cypone tuj tx'otx' c'oquel te cyetzbile, 2tu'ntzun tten tchiylal Kman Dios tuj cywitze, ex tu'n cyjapun ke tley ex ke tmandamyent cyu'ne, akeju ma che'x nma'ne cyeye, cyuc'ix ke cyc'wa'le ex ke tal cychmane tuj tcyakil k'ij te cyank'ible, tu'ntzun cytene nim k'ij twitz tx'otx'. 3Cyja'tzun akeye aj Israel, cybinxe ex tz'oc tililx tu'n cyjapun ke jlu cyu'ne, tu'ntzun tel ba'n cyeye tuj tcyakil, ex tu'n cychmet-xixe tuj k'inun tx'otx' ex tbanilxix, ic tza'nx tzaj ttziyan Kman aju Cydios cyxe'chele. 4Cybintze akeye aj Israel: Ate Kman Dios o'cxcu junx. 5Cyc'ujlame Kman Dios tu'n tcyakil cyanmiye, tu'n tcyakil cyc'u'je ex tu'n tcyakil cyipune. 6Cyawancxe tuj cyanmiye cycyakil ke yol ma che'x nma'ne cyeye ja'lo, 7cucx cymanxe cye cyc'wa'le, ex che yoline cyi'j tuj cyjaye ex tuj cybeye, ax icx oc cyxi'ye tal ex oc cyjaw we'ye; 8cyc'alonque ti'j cyk'abe ex tibaj cywitze te jun techal, 9ax icx cytz'ibancuye cyi'j tlamel cyjaye ex cyi'j tmarquil. 10Oc cyocx k'o'ne tu'n Kman tuj tx'otx' tzaj ttziyan cye kxe'chel Abraham, Isaac ex Jacob, jatum ate' nintz tnam tbanilxix mya cyu'ne jaw cybincha'ne; 11ate' ja tuj, nojni cyuj cyu'n ti'xti tbanilxix mya cyu'ne e noj; ate' xoch tuj, mya cyu'ne cu'x cylacu'ne; ex ate' tkan uva tuc'ix tkan olivo tuj, mya cyu'ne cu'x cyawa'ne; ex oc cywa'ne ti'j ex oc cynoje, 12ten cycwent cyi'je tu'n mi'n tic' tna'l Kman cyu'ne, aju etz k'inte cyeye tuj tx'otx' Ejipt jatum ate'toke te majen. 13Tenx tchiylal Kman Dios tuj cywitze, ex o'cx te che ajbene, ex o'cx tbi ctzajel cyna'ne ti'j cyyole. 14Mi'n che c'ulune cywitz cydios mastl tnam ate' nikayin cytxlaje, 15porque aju Kman Dios at kxol, minti' in cub tuj twitz tu'n cyc'ulune twitz juntl dios; jacu tzaj tk'oj cyi'je, ex bi'x che najele tu'n. 16Mi'n tz'oc cyk'o'ne Kman Dios tuj malbil ic tza'n o cybinchaye tuj Masah. 17Tz'oc tililx cyu'ne tu'n cyjapun ke tmandamyent Kman Dios, cyuc'ix ke ley ex ke xnak'tzbil o che tzaj tk'o'n cyeye. 18Cybinchame aju tz'aklxix ex aju ba'n twitz Kman, tu'ntzun tel ba'n cyeye tuj tcyakil, tu'n cyoque tajwil tbanil tx'otx' tzaj ttziyan Kman cye kxe'chel, 19ex tu'n cyex tlajo'n Kman ke aj k'oj cyi'je, ic tza'n o tzaj ttziyan. 20Nok alcye jun k'ij ka ma tzaj cykanin cyc'wa'le: ¿Ti cyxilen ke mandamyent, ke ley ex ke cawbil e tzaj tma'n Kman Dios tu'n kbinchante?, ka che chi, 21atzun cyeye cxel cytzak'we'ne: Ojtxi, tmajentok Faraón ko'ye tuj Ejipt, ex o ko etz k'i'ne tu'n Kman tuc'il nimxix tipumal. 22O kile ke señ ex ke binchben nim cyipumal ex xobajilxix o tbincha Kman tuj Ejipt, ti'j Faraón ex cyi'j cycyakil keju ate' tuj tja; 23ex ate etz k'inte keye tuj tx'otx' Ejipt, ex o ko ul k'i'ne tu'n tuj tx'otx' lu, aju tzaj ttziyan cye kxe'chel ex tzaj tk'o'n ke. 24O tzaj tma'n Kman tu'n cyjapun cycyakil ke mandamyent lu ku'n ex tu'n tten tchiylal tuj kwitz, tu'ntzun tel ba'n te ke cycyakil k'ij ex tu'n cucx kank'in, ic tza'n kten ja'lo. 25Cyja'tzun ko tel tz'aklxix twitz Kman Dios ka ma che japun cycyakil ke tmandamyent ku'n, ic tza'nx o tzaj tma'n ke.

will be added

X\