DEUTERONOMIO 5

1Octzun tchmo'n Moisés cycyakil aj Israel ex xi tma'n cye cyja': —Akeye aj Israel, cybintze ke ley ex ke cawbil akeju che xe'l nma'ne cyeye ja'lo, cyajx tuj cynable ex che japunx cyu'ne. 2O cyaj bant ti'j jun yol tu'n Kman Dios kuc'il max twi witz Horeb. 3Mya o'cx cyuc'il ke kxe'chel cyaj bant ti'j ju yol lu, ax icx kuc'il o bant, ako' itz'x ja'lo tzalu. 4Twitzelcu Kman tzaj yolin cyuc'ile tuj jun tkan k'ak' twi witz. 5Atzun weye in cub tene cyxole tuc'il Kman, tu'ntzun ttzaj nchic'ba'ne tyol Kman cyeye, porque tzaj t-xobil tkan k'ak' cyi'je, ex minti' e jaxe twi witz. Tzajtzun tma'n Kman cyja': 6Akine Cymane ex Cydiose aju etz k'inte cyeye tuj Ejipt, jatum ate'toke te majen. 7Mi'n che c'ulune cywitz junxitl dios, o'cx nwitze tu'n cyc'ulune. 8Mi'n cub cybincha'ne jun tilbilal; mi jun tilbilal ti'j ju at tuj cya'j, mi jun tilbilal ti'j ju at twitz tx'otx', ex mi jun tilbilal ti'j ju at tuj mar. 9Mi'n che cub ẍmeje'ye cywitz, ex mi'n che c'ulune cywitz, tu'nju akine Cymane ex Cydiose minti' in cub tuj nwitze tu'n cyc'ulune twitz juntl dios. Cpol canun castiw wu'ne cyibaj ke c'wa'lbaj, ke tal chmambaj ex ke cytxca chmambaj, tu'n tlaj in chin el ic'une cyu'n cyman, 10pero cucx ctel tk'ak'bil nc'u'je cyi'j nimcu cyiyjil xjal, akeju in che c'ujlan weye ex in che japun ke nmandamyente cyu'n. 11Mi'n tzaj cyna'ne nbiye nokx gan, akine Cymane ex Cydiose, porque cbel tcastiw xjal wu'ne aju in tzaj na'nte nbiye nokx gan. 12Cyna'ntze aju k'ij te ojlabl tu'n tajben o'cx weye, ic tza'nx o txi nma'ne cyeye, akine Cymane ex Cydiose. 13Kak k'ij che ak'nale tu'ntzun tbant tcyakil cyak'une, 14atzunju twukin k'ij, k'ij te ojlabl tu'n cyc'ulune weye, akine Cymane ex Cydiose. Mi jun ak'untl cbantel cyu'ne tuj k'ij lu, mi cyu'n cycy'ajale, mi cyu'n cyme'jele, mi cyu'n cymajene xinak, mi cyu'n cymajene xu'j, mi cyu'n cywacẍe, mi cyu'n cyburre, mi cyu'n ke cyalune, ex mi cyu'n ke stranjer xjal ate' tuj cytanmiye, tu'ntzun cyojlan ke cymajene xinak ex cymajene xu'j ic tza'nx cyeye in che ojlane. 15Cyna'ntze, ax icx cyeye o che tene te majen tuj Ejipt, ex etz wi'ne keye ma chixin tuc'il nim wipumale. Tu'ntzun jlu in xi nma'ne cyeye tu'n cynimane aju k'ij te ojlabl, akine Cymane ex Cydiose. 16Cynimanxe cymane ex cytxu'ye ic tza'nx o txi nma'ne cyeye, tu'ntzun t-xi lak'e' tuj cyk'ije, ex tu'ntzun ba'n cyel cyk'ije twitz tx'otx' aju cxel nk'o'ne cyeye, akine Cymane ex Cydiose. 17Mi'n che biyune. 18Mi'n cybinchaye aj pajil. 19Mi'n che elk'ane. 20Mi'n che nic'ane yol ti'j cyuc'ile. 21Mi'n pon cyc'u'je ti'j t-xu'jil cyuc'ile. Mi'n pon cyc'u'je ti'j tja cyuc'ile, mi ti'j ttx'otx', mi ti'j tmajen xinak, mi ti'j tmajen xu'j, mi ti'j twacẍ, mi ti'j tbur, ex mi ti'j jun ti'xti at te. 22Atzun ke yol lu e tzaj tma'n Kman tuc'il tk'ajk'ajel twi' cyuwxix wen, aju etz tuj tmij tkan k'ak' ex tuj muj kloljxix wen, tej cybuyintok cyibe cycyakile t-xe witz, ex minti'tl tzaj tma'n mastl yol. E cubtzun ttz'iban ke yol lu cywitz cabe tz'lom abj, ex e tzajtzun tk'o'n weye. 23Atzun cyeye, tej cybinteye tk'ajk'ajel wibaj aju etz tuj tmij klolj, ex tej tcyile in jaw c'ant tkan k'ak' ti'j witz, cycyakiltzun ke nejenel cye junjun c'loj cyiyjile cyuc'ix ke tij xjal cyxole e ul yolil wuc'ile, 24ex tzaj cyma'ne weye cyja': Axix toc ma tzaj tyec'un Kman Dios tajwalil ex tipumal, ex ma kbiye tk'ajk'ajel twi' nne'tz tuj tmij tkan k'ak'. Matzun tz'el knic'e ti'j ja'lo, jacu yolin Kman cyuc'il xjal ex mlay che cyim. 25Masque icju pero o cymatle: ¿Tiku'n ko cymele ex ko bajel tz'e'ye tu'n k'ak' lu xobajilxix? Ka ma kbiye juntl maj tk'ajk'ajel twi Kman Dios, oclo ko cymele; 26porque ¿alcye juntl xjal jacu cyaj ank'in oc tbinte tk'ajk'ajel twi Dios itz' in yolin tuj tmij tkan k'ak', ic tza'n keye ma kbiye ex ma ko cyaj ank'ine? 27Mas ba'n txi lak'e' teya, bintza tcyakilju ctzajel k'ma'n teya tu'n Kman Dios, ex ctzajeltzun tma'na keye aju otok tzaj k'ma'n teya, atzun keye jacu japun ku'ne aju ctzajel tma'na keye, che chiye. 28Tej cyyoline wuc'ile, in bintok Kman ti'j cyyole. Tmatzun Kman weye cyja': Ma nbiye tcyakil yol in cyma'n xjal lu, ex ba'n ma tz'el tuj nwitze. 29Nokwit ic cyximbetz tcyakil maj, ic tza'nx ma cyma tu'n cyxob nwitze ex tu'n cyjapun ke nmandamyente cyu'n cycyakil k'ij, tu'ntzun cyank'in tuj tzalajbil, tza'nx cye ax icx cye cyc'wa'l. 30Txi'ya ex k'manxa cye tu'n cyaj cyja; 31atzun teya, ax tencja tzalu wuc'ile, porque cxel nma'ne teya cycyakil ke mandamyent, ke ley ex ke cawbil, akeju che xe'l t-xnak'tza'na cye, tu'ntzun cyjapun cyu'n oc cynajan tuj tx'otx' cxel nk'o'ne te cyetzbil, chi Kman. 32Cyja'tzun, japunx cyu'ne tcyakilju o tzaj tma'n Kman Dios, ex mi'n tz'el cypa'n cyibe ti'j. 33Che bettzune tuj be o tzaj yec'un cyeye tu'n Kman Dios, tu'ntzun cyank'ine ex tu'n tel ba'n cyeye, ex tu'n cyank'ine nim abk'i twitz tx'otx' aju ctzajel tk'o'n te cyetzbile.

will be added

X\