DEUTERONOMIO 4

1Atzun ja'lo akeye aj Israel, cybintze ke ley ex ke mandamyent, akeju in che'x nxnak'tza'ne cyeye, ex che japunxwit cyu'ne, tu'ntzun cyank'ine ex tu'n cyoque tajwil tx'otx' ctzajel tk'o'n Kman cyeye, aju Cydios kxe'chel. 2Mi'n tz'oc cyk'o'ne mastl yol ti'j yol in xi nma'ne cyeye, ex mi'n tz'el cyi'ne jun yol ti'j; o'cx tu'n t-xi cynimane ke tmandamyent Kman Dios, akeju in che'x nma'ne cyeye. 3Ax keye e que'yinte aju tbincha Kman tuj Baal-peor, ex o cyile tej cycyim ke xjal tu'n, akeju e c'ulun twitz tilbilal cydios xjal Baal-peor tbi, cyxolxe e cyim ke xjal lu; 4atzun cyeye, akeye cucx e oc lpe'ye ti'j Kman Dios, itz'x keye ja'lo. 5O che'x nxnak'tza'ne ke ley ex ke mandamyent cyeye, ic tza'n tzaj tma'n Kman Dios weye, tu'ntzun tjapun cyu'ne oc cynajane tuj tx'otx' jatum che pole tu'n cyoque tajwil. 6Cucx cyna'ntze ex japunx cyu'ne. Ka ma bant cyu'ne icju, atzun c'elel cynic' mastl nasyon cyi'je ka at cynable ex cyojtzkible. Octzun cybinte mastl nasyon aju cyleye, oc cyma' cyja': Ke xjal ate' tuj nintz nasyon lu, ax toc at nim cynabl ex cyojtzkibl, che chilo. 7¿Atpe juntl nintz nasyon nikayin ate' ke tdios ti'j ic tza'n ke, nikayin ta' Kman Dios ki'j oc txi kkanin jun ti'xti te? 8¿Atpe juntl nintz nasyon at ke ley ex ke mandamyent tz'aklxix tuc'il, ic tza'n tcyakilju in xi nma'ne cyeye ja'lo? 9Tu'ntzun jlu, cyk'onque cwent ti'j ju o cyile, mi'n tzic' tna'l cyu'ne ex mi'n naj ti'j cyc'u'je tuj tcyakil cyank'ible; nok o'cx tu'n tcyaj cyma'ne cye cyc'wa'le ex cye tal cychmane. 10Aju k'ij tej cytene twitz Kman Dios t-xe witz Horeb, tzaj tma'n Kman weye cyja': Chmon baja ke xjal tu'ntzun cybinte nyole, ex tu'n tel cynic' ti'j tza'n tten tu'n tten nchiylale cye tuj tcyakil k'ij oc cyten twitz tx'otx', ex tu'n t-xi cyxnak'tza'n tcyakil jlu cye cyc'wa'l. 11Atzun cyeye e pon lak'e'ye nikayin t-xe witz. Aju witz in julin k'ak' ti'j ex najchak in japun julin tkan twitz cya'j; aju t-sibel oc ic tza'n muj k'ekxix que'yin ex puro klolj; 12atzunte Kman tzaj yolin cyuc'ile tuj tkan k'ak' ex o cybiye tk'ajk'ajel twi', pero mi jun o cyile; o'cx tk'ajk'ajel twi' o cybiye. 13Tzajtzun tma'n Kman aju yol tu'n tbant ti'j cyuc'ile, ex atzun jlu ke laj mandamyent e cub ttz'iban cywitz cabe tz'lom abj, ex tzaj tma'n cyeye tu'n tjapun cyu'ne. 14Ax icx tzaj tma'n Kman weye tu'n t-xi nk'o'ne xnak'tzbil cyeye cyi'j ke ley ex ke mandamyent il ti'j tu'n cyjapun cyu'ne oc cynajane tuj tx'otx' c'oquel te cyetzbile. 15Tuj k'ij tej tyolin Kman cyuc'ile tuj tkan k'ak' twi witz Horeb, mi jun o cyile. Cyja'tzun ten cycwente cyi'je 16tu'n mi'n cycub tz'ake tuj il, ex mi'n cub cybincha'ne jun tilbilal xinak, mi tilbilal xu'j, 17mi cyilbilal ke txcup ate' twitz tx'otx', mi cyilbilal ke chyu'j in che lipan twitz cya'j, 18mi cyilbilal ke txcup in xi cyjaku'n cyc'u'j twitz tx'otx', ex mi cyilbilal ke cyiẍ ate' tuj a'. 19Oc t-xi cyque'yine k'ij twitz cya'j, tuc'ix xjaw, cyuc'ix ke che'w ex ke mastl at twitz cya'j, ten cycwente cyi'je tu'n mi'n tpon cyc'u'je ti'j tu'n cyc'ulune cywitz, porque cycyakil keju ate' twitz cya'j, tu'n Kman Dios e bant tu'n cyajben cye cycyakil xjal ate' twitz tx'otx'. 20Pero a Kman etz k'inte cyeye tuj tx'otx' Ejipt, jatum e tene mer ic tza'n tuj jun jorni jatum nno'cx k'ot c'uxbil tu'n tcub ulj, tu'ntzun cyoque te jun tnam etzan tu'n, ic tza'n cytene ja'lo. 21Masque icju pero o tzaj tk'oj Kman wi'je tu'n cyeye cylaj, ex o tma weye tu'n mi'n wic'xe tuj nima Jordán, ex tu'n mi'n wocxe tuj tbanil tx'otx' ctzajel tk'o'n cyeye te cyetzbile. 22Tu'ntzun jlu ax chin cymele tuj tx'otx' lu, ex mlay chin ic'xe tuj nima Jordán. Bay cyeye oc che ic'exe tuj, ex che oquele tajwil tbanil tx'otx'. 23Ten cycwente cyi'je, mi'n tzic' tna'l cyu'ne aju yol cyaj bant ti'j tu'n Kman cyuc'ile, ex mi'n cub cybincha'ne jun tilbilal aju tzaj k'ma'n cyeye tu'n Kman Dios tu'n mi'n tcub cybincha'ne. 24Porque toc tcwent Kman Dios cyi'je ex ic tten ic tza'n jun k'ak' in baj tz'e'y tcyakil tu'n. 25Oc cyul itz'j cyc'wa'le ex ke tal cychmane oc cytijine tuj tx'otx' jatum che pole, ka ma tz'el cypa'n cyibe ti'j Dios, ex ka ma cub cybincha'ne tilbilal jun ti'xti tu'n cyc'ulune twitz, ex ka ma cybinchaye mya ba'n twitz Kman Dios tu'n ttzaj tk'oj, 26jurattzun che najele tuj tx'otx' c'oquel te cyetzbile jlajxi nima Jordán, mlay che ank'ine nim tyemp tuj tx'otx' lu, bi'x che najele te jumajx; in che oc nk'o'ne cya'j tuc'ix tx'otx' te testiw ti'j jlu. 27Che bajel sipane tu'n Kman cyxol mastl nasyon, ex nic'xi cybaje ctel cyxol mastl xjal jatum che pol k'i'ne tu'n. 28Atzun che ajbele cye dios binchamaj cyu'n xjal, tze' cytx'otx'il ex abj cytx'otx'il, ake jlu miban che que'yin, miban che bin, miban che wa'n ex minti' in cyna'n t-xewil jun ti'xti. 29Pero cyponlenxiye ma chixin, ka ma che jyone ti'j Kman Dios tu'n tcyakil cyanmiye ex tu'n tcyakil cyc'u'je, cneteltzun cyu'ne. 30Oc ttzaj tcyakil c'ixc'oj ex yajbil lu cyi'je, che ajetz meltz'aje tuc'il Kman Dios, ex cxel cynimane tyol, 31mlay che cyaj coline tu'n, mlay che naje tu'n, mlay tzic' tna'l tu'n aju yol cyaj bant ti'j tu'n cyuc'il ke kxe'chel, porque nim tk'ak'bil tc'u'j Kman cyi'je. 32Cykaninxe ti o baj ojtxi tej na'nxtok cyitz'je ex atxix tej tcub tbincha'n Dios aju nej xjal twitz tx'otx'; cyxi'ye tuj tcyakil twitz tx'otx' ex cykaninxe ka at jun ti'xti o baj ex o binjtz ma'xix t-xilen ic tza'n jlu. 33¿Atpe juntl c'loj xjal o cybi tk'ajk'ajel twi Dios tzaj yolin tuj tmij tkan k'ak', ex minti' o che naj ic tza'n cyeye o cybiye ex minti' e naje? 34¿Atpe juntl dios o tz'etz k'inte jun nasyon tjak' tcawbil juntl nasyon tu'n tel tetzan, ic tza'n o tbincha Kman Dios ki'j tej ketz tuj tx'otx' Ejipt? Tzaj nim joybil cyi'j aj Ejipt, tbincha Dios ke señ cyuc'ix ke binchben nim cyipumal, o k'ojin cyi'j aj Ejipt, tzaj tyec'un nim tipumal, xobajilxix keju o tbincha; tcyakil jlu cywitze o bant. 35Atzun jlu o tzaj yec'un cyeye, tu'ntzun tel cynic'e ti'j ka ate Kman axix toc Dioste, ex minti' juntl, nok o'cx te. 36Max tuj cya'j tzaj yolin Kman cyuc'ile tu'n cycawinjtze tu'n, tzaj tyec'un jun nintz k'ak' cyeye twitz tx'otx', ex o cybiye tk'ajk'ajel twi' tuj tmij tkan k'ak'. 37Nok tu'nju o tc'ujla Dios ke kxe'chel, jaw t-sc'o'n ke cyiyjil, akeju e ul itz'j te tibajxi, ex tu'n nim tipumal e jetz tcolpi'n tuj tx'otx' Ejipt. 38Cywitzxe o che ex lajo'n ke nasyon mas nim cyajlal ic tza'n cyeye ex mas nim cyipun ic tza'n cyeye, tu'ntzun cyoque te tajwil cytx'otx' ex tu'n cynajane tuj, ic tza'n in baj ja'lo. 39Cyja'tzun tz'elx cynic'e ti'j ex cyc'u'nxe tuj cyanmiye ka ate Kman, atzun Diosju aju at tuj cya'j ex twitz tx'otx'; minti' juntl, nok o'cx te. 40Che japunx ke tley ex ke tmandamyent cyu'ne, akeju ma che'x nma'ne cyeye ja'lo, tu'ntzun tel ba'n te cyeye ex cye cyc'wa'le che ul itz'j te tibajxi, ex tu'n cytene nim abk'i tuj tx'otx' ctzajel tk'o'n Kman Dios cyeye te jumajx. 41Jawtzun t-sc'o'n Moisés ox tnam tuj tumlal tjawitz k'ij te nima Jordán, 42tu'ntzun t-xi ok byol xjal tuj, aju otok cub byonte jun tuc'il ka mya ximamaj tu'n, ex ka bajx che jaw k'ojl jun maj, tu'ntzun tpon tclon tib tuj jun cye tnam lu, tu'ntzun tclet. 43Atzun ke tnam lu: Aju tnam Beser, aju tcubsa'n tuj chk'ajlaj te tzkij tx'otx', tu'n tajben cye tiyjil Rubén; aju tnam Ramot, aju tcubsa'n tuj Galaad, tu'n tajben cye tiyjil Gad, ex aju tnam Golán, aju tcubsa'n tuj Basán, tu'n tajben cye mij tiyjil Manasés. 44Atzun ke ley lu xi tk'o'n Moisés cye aj Israel, 45cyuc'ix ke mandamyent, ke xnak'tzbil ex ke cawbil, akeju xi tma'n Moisés cye aj Israel tej cyetz tuj Ejipt, 46tej ate'tok tuj tjawitz k'ij te nima Jordán, tuj chk'ajlaj tcubsa'n twitz Bet-peor tuj ttx'otx' Sehón aju rey cye aj Amorrey. Atzun najltok Sehón tuj tnam Hesbón, ex cub ti'j tu'n Moisés ex cyu'n aj Israel tej cyetz tuj Ejipt. 47Atzun cye aj Israel e jo'c te tajwil ttx'otx', tuc'ix ttx'otx' Og aju rey te Basán. Ke cabe rey lu cyrey ke aj Amorrey ke, ex atzun najltok ke tuj tumlal tjawitz k'ij te nima Jordán. 48Xi'ynix cytx'otx' tuj Aroer ttzi tk'ab xak Arnón, ex ponin baj max twi witz Sirión aju ax juntl tbi Hermón, 49ex tuj tcyakil tx'otx' Arabá tuj tumlal tjawitz k'ij te nima Jordán, ex ponin baj max ttzi mar at tuj chk'ajlaj Arabá t-xe witz Pisga.

will be added

X\