DEUTERONOMIO 34

1Ic'tzun Moisés tuj chk'ajlaj Moab, ex jax twi witz Nebo aju ta' tuj tiwitz tx'otx' Pisga, aju tajtz jlajtzi twitz tnam Jericó. Atzun tzaj tyec'un Kman te tcyakil tx'otx' Galaad ponin baj max ti'j ttx'otx' Dan, 2tuc'ix ttx'otx' Neftalí, ttx'otx' Efraín, ttx'otx' Manasés ex tcyakil ttx'otx' Judá, ponin baj max ttzi Nintz Mar, 3tuc'ix tx'otx' Néguev, tx'otx' ttzi'yile nima Jordán ex tchk'ajlajil tnam Jericó aju tnam at nim tkan palma tuj, ponin baj max ti'j tnam Zoar. 4Tmatzun Kman te cyja': Atzun tx'otx' lu xi ntziyane te Abraham, te Isaac ex te Jacob tu'n t-xi nk'o'ne cye cyiyjil. Ma txi nk'o'ne ambil teya tu'n t-xi tque'yina, pero mi'n pona tuj. 5Cyimtzun Moisés aju tmajen Dios tuj tx'otx' Moab, ic tza'nx otok tma Kman, 6cu'x maku'n tu'n Dios tuj chk'ajlaj tuj tx'otx' Moab tajtz jlajtzi Bet-peor, ex cucx ja'lo mi jun ojtzkilte jatum maku'n. 7Otok japun Moisés twi' 120 abk'i tej tcyim; ba'nxtok ate' ke tbak' twitz, ex atxtok tipun t-ximlal. 8Atzun cye aj Israel o che ok'xix ti'j Moisés tuj 30 k'ij tuj tchk'ajlajil tx'otx' Moab. Cyja'tzun e japun baj cyu'n ke k'ij te ok'el ex te bis ti'j tcyimlen. 9Atzunte Josué aju tcy'ajal Nun otok tz'oc nim tnabl tu'nju otok cub tk'o'n tk'ab Moisés tibaj twi'; tu'ntzun jlu xi cyniman ke aj Israel, ex o cybincha ic tza'nx otok tma Kman te Moisés. 10Mi a'l juntl t-sanjel Dios o ten cyxol aj Israel ic tza'n te Moisés, twitzelcu Kman o yolin tuc'il; 11mi a'l juntl o binchante ke techal ex ke binchben nim cyipumal ic tza'n keju e tzaj tma'n Kman te tu'n tbinchante tuj Ejipt, ti'j Faraón, cyi'j ke aj sanjelal ate'tok ttxlaj ex ti'j tcyakil tx'otx' Ejipt, 12ex mi a'l juntl o pon tipumal ic tza'n te Moisés, tej cybant ke binchben ma'xix ex xobajilxix tu'n cywitz cycyakil aj Israel.

will be added

X\