DEUTERONOMIO 32

1Bintza cya'j, chin yolile; ex aya tx'otx', k'ontz twi'ya ti'j nyole. 2Cbel chitj nxnak'tzbile ic tza'n jbal; ic c'oquel nyole ic tza'n tk'ab che'w, ic tza'n xmu's in cub tibaj ch'im, ex ic tza'n tkan jbal in cub tibaj c'ul. 3Chin yolile ti'j tbi Kman; cynimsa'nctze tbi Kdios. 4Ate Colol ic tza'n jun pic; tz'aklxix ke tbinchben, tuj tumelxix tcyakilju in tbincha'n. Ate Dios axix toc tyol, minti' jun mya ba'n in tbincha'n; tz'aklxix te ex jikun ti'j tmod. 5Akeye xjal mya ba'n keye ex miban che bine; o cybinchaye mya ba'n twitz Dios, ex mya ba'n keye tu'n cyoque te tc'wa'l. 6¿Maj cyja'tzun tten in chjet cyu'ne te Kman, akeye xjal miban che bine ex minti' cynable? ¿Myapetzun ate Cymane pok'salte cyeye? Tu'n o che cub bincha'ne, ex tu'n o che oque te jun nasyon. 7Cyna'ntze ke tk'ijlalil ojtxi, che ximane cyi'j ke abk'i o che ex; cykaninxe te cymane ex ctzajel tma'n cyeye, cykaninxe cye tij xjal ex ctzajel cytx'olba'n cyeye. 8Tej tbaj pa'n tx'otx' cyxol xjal tu'n Dios ma'xix toclen, tej tcyaj techan aju tmojonil ttx'otx' junjun c'loj xjal, bi'xtzun el tpa'n Dios aju tx'otx' jatum tu'n cyten ke tiyjil Israel ic tza'nx cyajlal. 9Aju tetzbil Kman, atzun ke xjal etzan tu'n, akeju tiyjil Jacob. 10E cnet tu'n tuj tzkij tx'otx', tuj tx'otx' jumajx tzkij, jatum in jumin nim cyk'ik'; e tzaj tchle'n tuj tk'ab, e baj t-xnak'tza'n, ex e oc tcwentin ic tza'n t-santil tbak' twitz. 11Ic tza'n jun ttxu' t'iw in putin cyibaj ke tal ate' tuj cyk'u', ex in xmoxin cyi'j tu'n tbant cylipan, in che el tlic'un t-xic', in che tzaj ti'n tal ex in che'x ti'n cyibaj t-xic', 12ax icxtzun te Kman, o'cx te xi ẍaklunte cye ex mi a'l juntl; mi jun dios nno'c cydiosin xjal o onin te. 13E je'x ti'n twi witz, e oc tc'a'chin tu'n twitz awal tuj cojbil, tzaj tk'o'n cylo' ta'l cab etz tuj toy' pic, ex tzaj tk'o'n cychi' aseyt cyi'j ke tze' in che ch'iy cyxol abj cyuwxix. 14Tzaj tk'o'n cyc'a lech ex cychi' cyes el cyi'j vac ex cyi'j cytxu chip in che tzaj tuj tx'otx' Basán. Tzaj tk'o'n cywa triw tbanilxix, ex tzaj tk'o'n cyc'a ta'l twitz uva cyak que'yin. 15Pero tejtzun cygordyix aj Israel oc cyxajo'n Cyajaw, o che gordyix wen ex puro k'iban oc cyi'j; cyajtzun cycolin Cydios aju binchal cye, ex el cyic'un aju Cwentil cye ex Clol cye. 16Tzaj tlo'ch tc'u'j Dios cyu'n, ex tzaj tk'oj cyi'j tej cyoc ten c'ulul cywitz tilbilal ic'un tu'n, akeju nno'c cydiosin xjal cyuj mastl nasyon. 17Xi cyk'o'n chojbil cywitz ju'ẍ ex mya twitz Dios, cywitz ke dios minti'tok ojtzki'n cyu'n; ac'aj dios ke jlu, ac'aj cyponlen k'i'n, ex minti' o che c'ulun cyman cywitz. 18O tzic' tna'l Dios cyu'n, aju Pok'sal cye ex Colol cyi'j; o tzic' tna'l Dios cyu'n, aju binchal cye. 19Tzajtzun tk'oj Kman tej ttil jlu, tu'nju el ic'un cyu'n ke tcy'ajal ex ke tme'jel; 20ex tma cyja': C'elel wewan wibe cywitz, jacu cyil ti che oquel; axix toc mya ba'n ke xjal lu; c'wa'lbaj ke, minti' in pon Cyman ti'j cyc'u'j. 21Tzaj tlo'ch nc'u'je cyi'j tu'nju e c'ulun twitz jun dios mya Dios; tzaj nk'oje cyu'n tu'n cylaj ke tilbilal minti' cyajben. Ax icx cye ctzajel tlo'ch cycu'u'j wu'ne tu'n tlaj juntl tnam aju in cyma'n ti'j ka minti' tajben, ex che jawil k'ojl wu'ne tu'n tlaj jun tnam minti' tnabl. 22Ma tzaj nk'oje mer ic tza'n k'ak' ex max cpol c'ant tuj cynajbil cyimni; cbajel tz'e'y twitz tx'otx' ex twitz awal tu'n, ex che bajel patun ke cyk'ukbil nmak witz tu'n. 23Ctzajel nk'o'ne nim mya ba'n cyibaj, che xe'l nxo'ne cycyakil npleche cyi'j; 24che cymel tu'n we'yaj ex tu'n cyak oc ttzaj cyi'j; che najel tu'n tx'u'j yabil nim ta'w; che xe'l nsama'ne ke txcup te tjak' c'ul cyi'j te chyo'lte cye, cyuc'ix ke lobaj jurat in che cyim xjal cyu'n. 25Tuj cay che cymel xjal tu'n spad, ex tuj cyja ctel nim t-xoblal. Che cymel ke cu'xun ex ke k'apoj, ax icx ke tij xjal ex ke tal ne' cucx cych'u'n. 26Otok cub nximane tu'n cybaj nsputine najchak, ex tu'n tcub naj cybi cyxol xjal tu'n mi'n cytzaj na'ntl, 27pero minti' cub tuj nwitze tu'n woc xmayine cyu'n aj k'oj cyi'j; minti' wajbeye tu'n tjaw cyniman cyib keju in che k'ojin cyi'j, ex tu'n mi'n cymante cyja': Tu'nx kipumal o bant tcyakil jlu; mya ate Dios binchante, jaculo che chi. 28Ke aj Israel jun c'loj xjal o tz'el tzpet cynabl, ex jumajx minti' cynabl. 29Nokwit at cynabl mawtlo che ximan ti'j jlu, ex mawtlo tz'el cynic' ti'j alcye tu'n ttzaj cyibaj te bajsbil. 30¿Tza'n tten jlu: Nok tu'n jun xjal e je'l ok jun mil, ex nok tu'n cabe xjal e ic' lajo'n laj mil? O bant jlu nok tu'nju ate Kman, aju Clol ke, xi tk'o'n ko' tuj cyk'ab ke aj k'oj ki'j. 31Ax toc bi'n cyu'n ke aj k'oj ki'j, aju cye clol cye mlay pon tipumal ic tza'n ke Clol ke. 32Porque cye, ic cyten ic tza'n tkan uva mya ba'n, ax cyiyjil ic tza'n ke xjal e ten tuj Sodoma ex Gomorra; ke xjal lu ic cyten ic tza'n tkan uva c'a twitz ex in che cyim xjal tu'n; 33aju ta'l twitz puro mya ba'n ic tten ic tza'n ttx'aben k'anti'; ka ma txi tc'a'n jun xjal jacu jurat cyim tu'n, mer ic tza'n otok tz'oc tx'a'n tu'n lobaj. 34Cycyakil cybinchben mya ba'n c'u'n ke wu'ne; c'u'n ke wu'ne tuj nc'uble. 35Wu'ne c'ajel t-xel; akine chin bel k'onte castiw oc tpon tk'ijlalil tu'n cycub tz'ak. Ma tzul lak'e' tk'ijlalil tu'n cynaj, ch'ix tpon tk'ijlalil tu'n tcub cycastiw, aju banimaj ti'j. 36Tzul Kman colol cyi'j xjal etzan tu'n oc tque'yinte minti'tl cyipun; ctzajel k'ak'an tc'u'j Kman cyi'j ke tmajen oc tque'yinte mi jun xjal cyjel ten, mi ke xjal majen ex mi ke xjal mya majen. 37Ctzajeltzun tma'n Kman: ¿Jatumtzun ate' ke cydiose, ke clol cyeye, akeju oc ke' cyc'u'je cyi'j, 38akeju e je'x chyonte t-sebyil cyoyaje patun in che cub, akeju e je'x c'ante ta'l twitz uva xi cyoyine cye? Etzun cyjaw we' tu'n cyonin cyi'je. E cytzaj tu'n cycolin cyi'je. 39O'cx akine Dios, minti' juntl Dios, o'cx akine. Wu'ne in tzaj camic ex wu'ne in tzaj ank'ibl; wu'ne in che c'ixbi xjal ex wu'ne in che banix. Mlay colpaj jun xjal tuj nk'abe tu'n juntl. 40In jaw nk'o'ne nk'abe twitz cya'j te cyuwsabl nyole, ex in xi nma'ne cyja': Axix toc itz' kine te jumajx, 41oc tbaj njaku'ne ttzi nspadiye in koptz'aj wen, ex oc cyoc xjal tuj xjel wu'ne, c'ajel nk'o'ne t-xel cybinchben aj k'oj wi'je, cbel nk'o'ne castiw cyibaj keju in che el ic'unte weye. 42Cnojel cyi'j npleche tu'n cychc'el xjal ex che najel cycyakil tu'n nspadiye; keju otok che cyim ex keju otok che'x k'i'n pres nim cychc'el c'elel, ex c'elel k'i'n cywi' ke nejenel cyxol aj k'oj, akeju matij ttzmal cywi'. 43Akeye txkantl xjal cyuj mastl nasyon, che tzalajxe junx tuc'il ju tnam etzan tu'n Dios, porque cbel tk'o'n cycastiw keju e cub byonte cye tmajen; c'ajel tk'o'n t-xel cybinchben aj k'oj ti'j, cbajel t-saksa'n ttx'otx', ex cbel tnajsa'n cyil ke xjal etzan tu'n. 44Bajtzun tma'n Moisés aju bitz lu wa'ltok cywitz cycyakil aj Israel, junx tuc'il Josué aju tcy'ajal Nun. 45Tej tbaj tma'n Moisés jlu cye aj Israel, 46xi tma'n cye cyja': Che ximane ti'j tcyakil yol ma txi nma'ne cyeye ja'lo, ex cymanxe cye cyc'wa'le, tu'n tjapun tcyakil ley lu cyu'n, 47porque aju ley lu mya nok ch'in t-xilen te cyeye; aju ley lu k'ol cychwinklale, ex tu'ntzun ley lu che tele nim tyemp twitz tx'otx' jlajxi nima Jordán, aju ctzyetel cyu'ne te cyetzbile. 48Ax k'ij lu xi tma'n Kman te Moisés cyja': 49Txi'ya cywi witz Abarim ex tjaxa twi witz Nebo, aju tcub tuj cytx'otx' aj Moab, twitz Jericó, ex axtzun que'yinxa tx'otx' Canaán aju cxel nk'o'ne te cyetzbil aj Israel. 50Twi'tzun witz lu, aju cjawixa twi', axtzun cymela ex cpola cyuc'il ktzan t-xe'chela, ic tza'nx ktzan ttzica Aarón, aju cyim twi witz Hor ex o pon cyuc'il ktzan t-xe'chel, 51porque cycabile e binchane il nwitze, tu'nju minti' oc cyk'o'ne kine te nim woclene cywitz aj Israel tej ate'tok ttzi a' Meriba-cades tuj tzkij tx'otx' Zin. 52Tu'ntzun jlu, nok cxel tque'yina najchak aju tx'otx' cxel nk'o'ne cye aj Israel, pero mlay pona tuj, chi Dios te Moisés.

will be added

X\