DEUTERONOMIO 31

1O yolin Moisés juntl maj cyuc'il cycyakil aj Israel ex xi tma'n cye cyja': 2Ma chin japune twi' 120 abk'i, ex mlay chin cub nejtle cywitze. Ax icx o tzaj tma'n Kman weye cyja': Mlay tz'icxa jlajxi nima Jordán, chi Kman. 3Axte Kman Dios cbel nej cywitze, ex cywitzxe che najel ke nasyon lu tu'n, tu'ntzun cyoque tajwil cytx'otx'. Ate Josué c'oquel te nejenel tu'n tcub nej cywitze ic tza'nx o tma Kman. 4Oc tbincha' Kman cyi'j ke nasyon lu ic tza'nx o tbincha ti'j Sehón ex Og, akeju rey cye aj Amorrey; e naj ke jlu tu'n, cyuc'ix cytanmi. 5Che tzajel tk'o'n Kman ke nasyon lu tuj cyk'abe. Cybinchame cyi'j ic tza'nx o txi nma'ne cyeye. 6Tenx cyipune ex cyuwx cyc'u'je, mi'n che xobe ex mi'n tzaj baj cyc'u'je oc cypon we'ye cywitz, porque ctel Kman Dios cyuc'ile; mlay che cyaj k'o'ne ex mlay che cyaj coline tu'n. 7Tzajtzun txco'n Josué tu'n Moisés, ex cywitz cycyakil aj Israel xi tma'n te cyja': Tenx tipuna ex cyuwx tc'u'ja, porque aya cbel nej cywitz xjal lu tu'n cypon tuj tx'otx' aju tzaj ttziyan Kman cye cyxe'chel tu'n ttzaj tk'o'n cye. Aya cbel sipante cyetzbil. 8Axte Kman cbel nej twitza ex ctel tuc'ila; mlay cyaj k'o'na tu'n, ex mlay cyaj colina tu'n. Tu'ntzun jlu, mi'n xoba ex mi'n baj tc'u'ja. 9Cub ttz'iban Moisés aju ley lu ex xi tk'o'n cye pal aj Leví, akeju toc cyoclen tu'n t-xi cyi'n aju cax c'ubl tley Dios, ax icx xi tk'o'n cye cycyakil tij xjal cyxol aj Israel, 10ex xi tma'n cye cyja': Tuj wukchak abk'i, oc tjapun abk'i te najsbil c'as, tuj nink'ij oc cyjaw binchet ke ja t-xak tze'yin cywi', 11oc toc cychmon cyib cycyakil aj Israel twitz Kman Dios tuj lugar cjawil t-sc'o'n, cjawiltzun cysch'i'ne u'j te ley lu cywitz. 12Cycyakil xjal il ti'j tu'n cyoc chmet, tza'nx ke xinak icx ke xu'j, ke c'wa'l ex ke stranjer xjal ax najl cyxole, tu'ntzun cybinte oc tjaw sch'it u'j te ley, tu'n tbant cyniman te Kman Dios, ex tu'n tjapun cyu'n tcyakilju in tma'n ley, 13tu'ntzun cybinte ke c'wa'l akeju na'nxtok cybinte, ex tu'n tbant cyniman te Kman Dios tuj tcyakil k'ij oc cyten twitz tx'otx', aju ctzajel k'o'n cyeye cyic'xlenxiye tuj nima Jordán. 14Tzaj tma'n Kman te Moisés cyja': Bintza, in lak'e' ttzaj tk'ijlalil tu'n tcyima. Tu'ntzun jlu txcontza Josué, ex cycabile cyxi'ye tuj ja te mojbabl tibil tu'ntzun t-xi nma'ne te alcye tu'n tbant tu'n. Xi'tzun Moisés tuc'ix Josué, ex e ocx tuj ja te mojbabl tibil. 15Tujtzun ja lu cub tyec'un tib Kman cywitz tuj txkan muj cub ten ttzi ja. 16Tmatzun Kman te Moisés cyja': Ch'ix tpon tk'ijlalil tu'n tcyima. Ke xjal lu c'elel cypa'n cyib wi'je, porque che oquel ten c'ulul cywitz cydios xjal tuj tx'otx' jatum che pol; atzun weye chin cyjel coline cyu'n ex mlay japun cyu'n aju yol cyaj bant ti'j wu'ne cyuc'il. 17Octzun tel cypa'n cyib wi'je ctzajel nimxix nk'oje cyi'j, che cyjel ncoline, c'elel wewan wibe cywitz ex che najel cycyakil, ctzajel nim mya ba'n cyibaj ex nim yajbil cye tzul. Maxitzun oc cyma': ¿Myapelo tu'nju mi a'l Dios kuc'il o tzaj tcyakil mya ba'n lu kibaj? 18Oc tbant tcyakil jlu cyu'n, ax toc c'elel npa'n wibe cyi'j tu'n tlaj tcyakil mya ba'n otok cybincha, ex tu'n tlaj otok che c'ulun cywitz junxitl dios. 19Ja'lotzun, cytz'iban cube aju bitz lu ex cyxnak'tzanxe cye aj Israel, tu'ntzun t-xi cybitzan ex tu'n toc bitz lu te jun testiw wu'ne cyi'j, 20porque cyocxlenxi nk'o'ne tuj tx'otx' aju xi ntziyane cye cyxe'chele, aju tx'otx' k'inunxix ex tbanilxix, atzun che nojel wen ex che gordyixel, ex octzun cynoj wen che oquel lpe' cyi'j junxitl dios ex che c'ulul cywitz, atzun weye chin elel ic'une cyu'n, ex mlay japun cyu'n aju yol ma cyaj bant ti'j wu'ne cyuc'il. 21Octzun ttzaj nim mya ba'n ex yajbil cyibaj, atzunju bitz lu c'oquel te testiw cyi'j, porque ctzajel cyna'n ex cxel cybitzan ke cyiyjil che ul itz'j te tibajxi. Tej na'nxtok cyocx nk'o'ne tuj tx'otx' o txi ntziyane cye, ya ba'ntl wu'ne alcye cyximbetz, chi Dios. 22Tujx k'ij lu cub ttz'iban Moisés aju bitz lu, ex xi t-xnak'tza'n cye aj Israel tu'n tbant cyu'n. 23Xitzun tma'n Kman te Josué aju tcy'ajal Nun, chi cyja': Tenx tipuna ex cyuwx tc'u'ja, porque aya c'oquex k'inte cye aj Israel tuj tx'otx' o txi ntziyane cyeye, ex akine chin tel tuc'ila. 24Tej tbaj ttz'iban Moisés tcyakil ley lu tuj jun u'j, 25xi tma'n cye aj Leví akeju at cyoclen tu'n t-xi cyi'n cax c'ubl tley Dios, ex chi cyja': 26Cyi'nxe aju u'j lu jatum tz'iban ley, ex cyk'oncuye ttxlaj cax c'ubl tley Dios tu'ntzun ax tu'n tten te jun testiw cyi'je. 27Ba'n wu'ne, akeye jun c'loj xjal miban che niman ex cyuw cywi'ye. Katzun minti' ma txi cynimane Kman acux itz'x kine cyxole, pyortzunlo cyu'ne oc ncyime. 28Cyi'ntze cycyakil ke tij xjal ex ke nejenel cyxol cycyakil c'loj cyiyjile, tu'ntzun t-xi nma'ne tcyakil yol lu cye, ex che oquel nk'o'ne cya'j ex tx'otx' te testiw cyi'j. 29Ba'n wu'ne, ncyimlenxiye che elel txalpuje ex cyjel cycoline be otok txi nma'ne cyeye. Ax icx ba'n wu'ne, tzul mya ba'n cyibaje tu'n tlaj mya ba'n otok cybinchaye twitz Kman, ex tzul tk'oj cyi'je tu'n tlaj cybinchbene mya ba'n, chi Moisés. 30Xitzun tma'n Moisés aju bitz lu cye cycyakil aj Israel otok baj cychmon cyib, tzajx ke' tu'n t-xe tnejel tejxi tpon baj:

will be added

X\