DEUTERONOMIO 30

1Octzun ttzaj cyibaje tcyakilju ma txi nma'ne cyeye, ka cy'iwbil ex ka mya ba'n, ex oc cyximane cyi'j jlu cyuj ke nasyon jatum che pol lajo'ne tu'n Kman Dios, 2ka ma che ajtz meltz'aje tuc'il cyuc'ix ke cyc'wa'le, ex ka tu'n tcyakil cyanmiye ex tu'n tcyakil cyc'u'je ma txi cynimane aju yol in xi nma'ne cyeye ja'lo, 3che ajetztzun k'i'ne juntl maj tu'n Kman Dios, ctzajel k'ak'an tc'u'j cyi'je, ex che ajetz chmo'ne tu'n juntl maj, nok jatum otok che pon sputje tu'n cyuj txkantl nasyon. 4Masque otok che ex lajo'ne tuj cytanmiye ex otok che pon sputje cyuj lugar mas najchak wen, pero che ajetz k'i'ne tu'n Kman Dios ex max ma chixin che ajetz chmo'ne tu'n. 5Che ajetz k'i'ne tu'n Kman Dios juntl maj tuj tx'otx' aju cyetzbil cyxe'chele ojtxi, che oqueltzune tajwil juntl maj, ba'n c'elel tcyakil te cyeye tu'n, ex cchmetel mas nim cybaje ic tza'n cye ktzan cyxe'chele. 6Cch'expetel cyanmiye tu'n Kman Dios ax icx cye cyiyjile che ul itz'j te tibajxi, tu'ntzun cyc'ujlanteye Kman Dios tu'n tcyakil cyc'u'je ex tu'n tcyakil cyanmiye, tu'ntzun tten cychwinklale. 7Cbeltzun tk'o'n Kman Dios tcyakil mya ba'n lu cyibaj ke aj k'oj cyi'je, akeju o che el ic'unte cyeye ex o che baj yajla'ne cyu'n; 8atzun cyeye che ajetz meltz'aje tuc'il Kman, cxel cynimane, ex c'oquel tilil cyu'ne tu'n cyjapun cycyakil ke tmandamyent cyu'ne, akeju in che'x nma'ne cyeye ja'lo. 9Che beltzun cy'iwla'ne tu'n Kman Dios ti'j tcyakilju cbantel cyu'ne, che ul itz'j nim cyc'wa'le ex nim cyalune ex cchmetel nim twitz cyawale. Ctzalajel Kman Dios cyi'je juntl maj, ex oc tbincha' ba'n cyeye, ic tza'n o tzalaj nej cyi'j ke cyxe'chele ex o tbincha ba'n cye. 10Tzul tk'o'n tcyakil jlu cyeye ka ma txi cynimane Kman Dios, ka ma che japun ke tmandamyent ex ke tley cyu'ne, akeju tz'iban tuj u'j te ley lu, ex ka ma che ajtz meltz'aje tuc'il tu'n tcyakil cyc'u'je ex tu'n tcyakil cyanmiye. 11Aju mandamyent in xi nma'ne cyeye ja'lo mya cyuw te cyeye, ex mya mlay bant cyu'ne. 12Mya max ta' tuj cya'j, tu'ntzun cymanteye cyja': ¿Alcye jun jacu jax tuj cya'j tu'n ttzaj tbi'n ex tu'n ttzaj tma'n ke, tu'ntzun tjapun ku'n? 13Ax icx mya max ta' jlajxi mar, tu'ntzun cymanteye cyja': ¿Alcye jun jacu tzic'x jlajxi mar tu'n ttzaj tbi'n ex tu'n ttzaj tma'n ke, tu'ntzun tjapun ku'n? 14Nika' ta' mandamyent cyuc'ile; ax ta' tuj cytzi'ye, ex ax ta' tuj cyanmiye, tu'ntzun tjapun cyu'ne. 15Cybintze ja'lo: Cbel nk'o'ne cabe tumel cywitze tu'n tjaw cysc'o'ne alcye cyajbile; ka chwinklal ex ka camic; ka tu'n cytene ba'n ex ka tu'n cytene mya ba'n. 16Ka ma txi cybi'ne aju in xi nma'ne cyeye ja'lo, ka ma cyc'ujlaye Kman Dios, ka ma che oc lpe'ye ti'j, ka ma che japun ke tmandamyent cyu'ne cyuc'ix ke tley ex ke tcawbil, che ank'iltzune, cchmetel nim cyc'wa'le, ex che cy'iwlanjtzele tu'n tuj tx'otx' ctzajel tk'o'n cyeye tu'n cyoque te tajwil. 17Katzun ma tz'el cypa'n cyibe ti'j Kman, ka minti' ma txi cybi'ne tyol, ka ma txi cyk'o'ne ambil tu'n cyxi lpe'ye cyi'j junxitl dios tu'n cyc'ulune cywitz ex tu'n cycub ẍmeje'ye cywitz, 18bi'x cxel nma'ne cyeye ja'lo, ax toc il ti'j che najele, ex mlay che tene nim k'ij tuj tx'otx' ctzyetel cyu'ne cyic'xlenxiye tuj nima Jordán. 19Tuj k'ij lu in che oc nk'o'ne cya'j tuc'ix tx'otx' te testiw cyi'je, ka ax toc ma txi nma'ne tu'n tjaw cysc'o'ne cyxol cabe tumel lu: Ka chwinklal ex ka camic, ka cy'iwbil ex ka mya ba'n. Cyja'tzun cysc'on jawe chwinklal, tu'ntzun cyank'ine cyuc'ix ke cyiyjile che ul itz'j te tibajxi. 20Cyc'ujlame Kman Dios, cynimanxe, ex cucx che lpe'que ti'j, porque a k'olte cychwinklale, ex tu'n che tele nim k'ij twitz tx'otx' tzaj ttziyan tu'n ttzaj tk'o'n cye cyxe'chele Abraham, Isaac ex Jacob.

will be added

X\