DEUTERONOMIO 29

1Atzun yol lu cyaj bant ti'j tu'n Kman cyuc'il aj Israel, aju tzaj tma'n te Moisés tuj tx'otx' Moab, ex part aju otok cyaj bant ti'j tu'n cyuc'il twi witz Horeb. 2Octzun tchmo'n Moisés cycyakil aj Israel ex xi tma'n cye cyja': O cyile tcyakilju o tbincha Kman tuj tx'otx' Ejipt ti'j Faraón, ex cyi'j ke xjal at cyoclen ttxlaj ex ti'j tcyakil ttanmi, 3ex akeye testiw cyi'j ke nmak c'ixbisabl, ke techal ex ke binchben nim cyipumal e bant. 4Pero asta ja'lo, na'nx ttzaj tk'o'n Kman cynable, na'nx ttzaj tk'o'n ambil tu'n tel cynic'e ti'j, mi tu'n tex tuj cywi'ye ti t-xilen tcyakil jlu. 5Tuj 40 abk'i akine ma chin ẍaklunte cyeye tuj tzkij tx'otx'. Tuj tyemp lu minti' o baj cyxbalune ex mi cyxajbiye, 6minti' o che wa'ne pan in bant ti'j triw, minti' o che c'ane ta'l twitz uva, ex minti' o che c'ane k'e'n tu'ntzun tel cynic'e ti'j Kman Dios. 7Tej kul tuj lugar lu, etz tzokpaj Sehón ki'j, aju rey te tnam Hesbón, tuc'ix Og aju rey te tx'otx' Basán, pero cub cyi'j ku'n; 8tzyettzun cytx'otx' ku'n, ex o txi kk'o'n te cyetzbil ke tiyjil Rubén, ke tiyjil Gad, tuc'ix mij tiyjil Manasés. 9Tu'ntzun jlu, cynimanxe ex japunx cyu'ne aju yol ma cyaj bant ti'j cyuc'ile, tu'ntzun tel ba'n cyeye tuj tcyakilju cbantel cyu'ne. 10Ja'lo, lu keye cybuyin cyibe cycyakile twitz Kman Dios: Ke nejenel cye junjun c'loj cyiyjile, ke tij xjal, ke xjal at cyoclen, ex cycyakil ke xinak aj Israel, 11cyuc'ix ke c'wa'l, ke xu'j ex ke stranjer xjal akeju ax najl cyxole, tza'nx ke xjal tx'emil cysi'ye ax icx ke xjal ikal cya'ye; 12tu'ntzun tocx cyk'on cyibe axix toc tjak' yol cyjel bant ti'j tu'n Kman Dios cyuc'ile ja'lo. 13Aju yol cyjel bant ti'j cyuc'ile ja'lo atzun jlu: Akeye che oquel te jun c'loj xjal etzan tu'n, atzunte c'oquel te Cydiose, ic tza'nx o tma cyeye ex ic tza'nx tzaj ttziyan cye cyxe'chele Abraham, Isaac ex Jacob. 14Pero mya o'cx cyuc'ile cyjel bant ti'j yol ma tzaj ttziyan Kman, 15akeye cycubsa'ne twitz; ax icx cyuc'il keju che ul itz'j te tibajxi. 16Ba'n cyu'ne tza'n tten o ko ank'in tuj Ejipt, ex tza'n tten o ko ic' cyuj ke nasyon e cnet ku'n tuj kbe. 17Atzun o cyile ke cydios xjal mya ax toc dios ke, ex ke tilbilal ic'bilxix binchamaj ti'j tze', ti'j abj, ti'j sak pwak ex ti'j k'an pwak, akeju in che c'ulun xjal lu cywitz. 18Ten cycwente cyi'je, minti'wt jun xinak ex mi jun xu'j, minti'wt jun ja xjal ex mi jun c'loj cyiyjil aj Israel, cyaj colinte Kman Dios tu'n toc ten c'ulul cywitz cydios ke nasyon lu. Miwt tz'oc jun cyeye ic tza'n jun c'ul c'a ex venen tloc'. 19Tbajlenxi cybi'ne ke yol lu cyi'j mya ba'n ctzajel cyi'je, ka at jun cyeye oc tna'nte puro ba'n ta' ex ma cub t-ximan cyja': Tcyakil c'elel ba'n weye masque nbinchaye nok alcyex wajbile, ka chi; tu'n tlaj xjal lu, oc che najel cycyakil xjal. 20Mlay cub tnajsa'n Kman til xjal lu, mlay cub tuj twitz aju il otok tbincha, nok o'cx ctzajel tk'oj ti'j; ctzajel ti'j xjal lu tcyakilju mya ba'n tz'ibamaj tuj u'j lu, ex bi'x che najel ke tiyjil twitz tx'otx' tu'n Kman. 21C'elel tpa'n Kman aju xjal lu cyi'j cycyakil c'loj cyiyjil aj Israel, tu'n ttzaj mya ba'n ti'j ic tza'nx tcyakil mya ba'n ma cyaj bant ti'j, aju tz'iban tuj u'j te ley lu. 22Ke cyiyjile che ul itz'j tuj k'ijlalil tzul, ax icx ke stranjer xjal che tzajel cyuj tx'otx' najchak, oc cyila' ke c'ixbisabl ex ke yabil che tzajel t-sama'n Kman tibaj tx'otx' lu. 23Tuj tcyakil tx'otx' lu oc cyila' puro azufre ex atz'an ex otok baj tz'e'y tx'otx', mlay bant tu'n toc awal tuj, ex misicyer jun ti'xti ctzajel tpok'sa'n; milpe jun wi' c'ul cch'iyil tuj. Ic c'oquel ic tza'n o tenba tej cynaj ke tnam Sodoma, Gomorra, Adma ex Zeboim, akeju e baj tz'e'y tu'n tk'oj Kman ex tu'n ttx'u'jil. 24Cycyakiltzun xjal cyuj mastl nasyon che kanil ti'j cyja': ¿Tiku'n o tbincha Dios jlu ti'j tx'otx' lu? ¿Tiku'n o tzaj nimxix ttx'u'jil? 25Ctzajeltzun tzak'we'n cye cyja': Tu'nju o cyaj cycolin aju yol cyaj bant ti'j tu'n Dios cyuc'il, aju Cydios cyxe'chel, aju bant ti'j tu'n cyuc'il tej cyetz k'i'n tu'n tuj Ejipt, 26ex tu'nju e c'ulun ex e cub ẍmeje' cywitz txkantl dios, akeju minti' ojtzki'n cyu'n ex minti' o tzaj k'o'n jun ti'xti cye cyu'n. 27Tu'ntzun jlu tzaj tk'oj Dios ti'j tx'otx' lu ex tzaj tk'o'n tcyakil mya ba'n tibaj, aju tz'iban tuj u'j lu. 28Tuc'il tk'oj ex nimxix ttx'u'jil, e je'x tlajo'n ke xjal tuj cytx'otx' tu'n cyxi k'i'n tuj juntl tx'otx', ic tza'n in baj ja'lo, che chilo xjal cxel cytzak'we'n. 29Tcyakilju minti' ma tzaj tyec'un Dios ke, te Kman Dios ke; atzun keju o che tzaj yec'un, ke ke jlu ex cye ke kc'wa'l te jumajx, tu'ntzun cyjapun ku'n cycyakil ke mandamyent in tma'n tuj u'j te ley lu.

will be added

X\