DEUTERONOMIO 28

1Ka axix toc ma txi cynimane Kman Dios ex ka ma che japun cycyakil ke tmandamyent cyu'ne, akeju in che'x nma'ne cyeye ja'lo, che oqueltzun k'o'ne tu'n Kman te ma'xix cyoclene cyxol cycyakil nasyon twitz tx'otx'. 2Che tzajeltzun tk'o'n cycyakil ke cy'iwbil lu cyibaje ka ma txi cynimane Kman Dios: 3Che bel cy'iwla'ne tu'n Kman tuj tnam ex tuj cojbil. 4Che bel cy'iwla'n cyc'wa'le tu'n, tuc'ix twitz cyawale, cyal cyalune, cyal cywacẍe ex cyẍne'le. 5Che bel cy'iwla'n tu'n Kman tcyakilju twitz cyawale tcu'x tuj cychi'le, ex aju arin tcu'x tuj choc jatum in cub xyok'it. 6Che bel cy'iwla'ne tu'n Kman oc cyxi'ye tuj cybeye ex oc cyul meltz'aje. 7Che tzajel tk'o'n Kman ke aj k'oj tuj cyk'abe oc cyoc tzokpaj cyi'je. Tuj txolin cyten oc cyoc tzokpaj cyi'je, pero che elel ok cywitze ex bi'x cbajel cysputun cyib. 8Cbel tcy'iwla'n Kman aju at tuj cytx'utx'e ex tcyakilju cbantel cyu'ne, ex che ank'ile tu'n tuj tzalajbil tuj tx'otx' ctzajel tk'o'n cyeye. 9Ka ma che japun ke tmandamyent cyu'ne ex ka ma che bete tuj tbe, cucxtzun che tele te jun c'loj xjal pa'maj te Kman Dios ic tza'nx o tzaj ttziyan cyeye. 10Cycyakiltzun tnam twitz tx'otx' oc cyila' ka cyi'je toc tbi Kman, ex che xobel cywitze. 11Ctzajel tk'o'n Kman nim t-xtalbil cyeye, ctzajel tk'o'n nimxix cyc'wa'le, nimxix cyal cyalune ex nimxix twitz cyawale tuj tx'otx' tzaj ttziyan cye cyxe'chele tu'n ttzaj tk'o'n cyeye. 12Ctzajel tk'o'n Kman nim tk'inumabl cyeye aju at twitz cya'j, ctzajel tk'o'n jbal twitz cya'j tibaj cytx'otx'e tujxix tk'ijlalil, tu'ntzun tcy'iwla'njtz tcyakil cyak'unbene. Cxel cyk'o'ne cych'ex ela' nasyon, atzun cyeye mlay txi cykanine cych'exe cye. 13Che oquel k'o'ne te tnejel tu'n Kman, ex mya te mancbil; cucx che tele te ma' cyoclene cyxol mastl, ex mlay che oc k'o'ne te ch'in cyoclene ka ma txi cynimane ex ka ma che japun ke tmandamyent Kman Dios cyu'ne, akeju in che'x nma'ne cyeye ja'lo, 14ka mi'n ma tz'el cypa'n cyibe cyi'j, ex ka mi'n ma che'x lpe'ye cyi'j junxitl dios tu'n cyc'ulune cywitz. 15Katzun mi'n ma txi cynimane Kman Dios, ex ka mi'n ma che japun cycyakil ke tmandamyent ex ke tley cyu'ne, akeju in che'x nma'ne cyeye ja'lo, che tzajeltzun cycyakil ke mya ba'n lu cyibaje: 16Ctzajel mya ba'n cyibaje tuj tnam ex tuj cojbil. 17Ctzajel mya ba'n ti'j tcyakil twitz cyawale tcu'x tuj cychi'le, ex ti'j arin tcu'x tuj choc jatum in cub xyok'it. 18Ctzajel mya ba'n cyibaj cyc'wa'le, cyibaj twitz cyawale, cyibaj cyal cywacẍe ex cyal cyẍne'le. 19Ctzajel mya ba'n cyibaje oc cyxi'ye tuj cybeye ex oc cyul meltz'aje. 20Ctzajel t-sama'n Kman mya ba'n cyibaje, cbajel ttzpet-sa'n cynable ex ctzajel bis cyi'je ti'j tcyakilju cbantel cyu'ne, ocxi cynaje tu'n jurat naj, tu'n tlaj cybinchbene mya ba'n ex tu'nju otok cyaj cycoline. 21Ctzajel t-sama'n Kman jun tx'u'j yabil cyibaje tuj tx'otx' che najale tuj, ocxi cybaj naje tu'n. 22Ax icx ctzajel t-sama'n yabil cheba in che naj xjal tu'n, tuc'ix cyak ex mal; ctzkijel tx'otx' tu'nju mi'n tzaj jbal, ex ctzajel soj ex mastl yabil cyi'j awal. Cucx che tzajel ke jlu cyibaje ocxi cybaj naje. 23Mlay tzajtl jbal twitz cya'j cyibaje, ex aju tx'otx' ccyuwixtel ic tza'n c'uxbil. 24Ctzajel tk'o'n Kman kuk tuc'ix tza'j cyibaje te t-xel jbal, ocxi cynaje. 25Tu'n Kman cbel cyi'je cyu'n aj k'oj. Tuj txolin cytene oc cyoc tzokpaje cyi'j, pero che elel oke cywitz, bi'x cbajel cysputun cyibe, ex cycyakil ke cawbil twitz tx'otx' che jawil labin cyi'je. 26Ke txcup in che lipan twitz cya'j ex ke txcup te tjak' c'ul che chyo'l ti'j cyximlale ex mi a'l jun cxel sec'punte cye. 27Che c'ixbisetele tu'n tx'a'c tu'n Kman, ic tza'n e tenba aj Ejipt, che jawil cyakc'u ex cykach tx'a'c cyi'je, tuc'ix sal. Mlay che k'ananjtz ke yabil lu cyu'ne. 28Ax icx che oquele te loc tu'n, che oquele te moẍ, cbajel tzpet cynable tu'n, 29ex xmacan che betele k'ijtl ic tza'n moẍ in bet tuj klolj. Mi jun ti'xti oc cybinchaye ba'n c'elel. Cucx che bajel yajla'ne, cucx c'elel k'i'n aju at cyeye, ex mi a'l jun ctzajel onil cyeye. 30Cbantel ti'j tu'n cymoje'ye tuc'il jun xu'j, pero junxitl xinak cbel tan tuc'il; cjawil cybincha'ne cyjaye, pero mlay che najane tuj; cbelex cyawa'ne tkan uva, pero mlay che lo'ne ti'j twitz. 31Cywitzxe cbel byo'n cywacẍe, pero mlay che chyo'ne ti'j tchibjal; cywitzxe c'elel k'i'n cyburre, ex mlay tz'ajtz k'o'ntl; che xe'l k'i'n cyẍne'le cyu'n aj k'oj cyi'je, ex mi a'l jun c-onil cyi'je tu'n cyel k'it tuj cyk'ab. 32Cywitzxe che xel k'o'n ke cycy'ajale ex cyme'jele cye stranjer xjal, cucx che que'yile cyi'j tu'n cyul juntl maj, che sictel ke tbak' cywitze ex minti' jacu bant cyu'ne cyi'j. 33Ke xjal minti' ojtzkin cywitz cyu'ne che wa'l ti'j twitz cyawale tzul tk'o'n tx'otx' ex ti'j tcyakilju cyak'unbene; cucx che bajel yajla'ne cyu'n, ex cycyakil k'ij c'oquel cybincha'n mya ba'n cyi'je. 34Octzun tcyile tcyakil jlu, che oquele te loc tu'n. 35Che c'ixbisetele tu'n Kman tu'n tx'a'c plojxix cjawil jlet twi cych'eque, ti'j cycuxe ex ti'j tcyakil cyximlale, ex mlay che banixe. 36Che elex lajo'ne tu'n Kman tuc'ix cyreye; che pol k'o'ne tuj tx'otx' minti' ojtzki'n cyu'ne mi cyu'n cymane. Atzun che ajbele cye junxitl dios, akeju binchamaj ti'j tze' ex ti'j abj. 37Che jawil labin xjal cyi'je, che oquele te cyxmaybil, ex che tze'l cyi'je cyuj cycyakil tnam jatum che pol lajo'ne tu'n Kman. 38Cbelex cyawa'ne nim iyaj, pero nic'xi twitz cjawil cychmo'ne, porque cbajel cywa'n ẍplon. 39Cbelex cyawa'ne tkan uva ex c'oquel cycwentine, pero mlay jaw cychmo'ne twitz, ex mlay che c'ane ti'j ta'l twitz, porque cnajel tcyakil cyu'n ẍuk'. 40Ctel tkan olivo tuj tcyakil cytx'otx'e, pero mlay tz'oc cyk'o'ne aseyt cyi'je, aju nne'l ti'j twitz olivo, porque cyajx ke cywitz che tzajel tz'ak na'nxtok tpon cyk'ij. 41Che ul itz'j cycy'ajale ex cyme'jele, pero mlay che ten cyuc'ile, porque che xel k'i'n pres cyuj txkantl tnam. 42Che najel cycyakil tze' cyu'n ẍplon, tuc'ix tcyakil twitz awal ctzajel tuj cytx'otx'e. 43Ake stranjer xjal najl tuj cytx'otx'e c'oquel mas cyoclen, atzun cyeye nok cyja' c'elel cyoclene. 44Ctzajel cyk'o'n cych'exe, atzun cyeye minti' cypwake ctel tu'n t-xi cyk'o'ne te cych'ex. Che oquel te tnejel, atzun cyeye che oquele te mancbil. 45Tcyakil mya ba'n lu ctzajel cyibaje nok jatum che tele, ocxi cycub baje, porque minti' otok txi cynimane Kman Dios ex minti' otok che japun ke tmandamyent ex ke tley cyu'ne, akeju o tzaj tma'n cyeye. 46Akeju mya ba'n lu che ajbel te jumajx te jun yec'bil ma'xix t-xilen ex xobajilxix te cyeye ex cye cyiyjile. 47Tu'nju minti' otok che c'ulune twitz Kman Dios tuc'il tzalajbil ex axix toc tu'n tcyakil cyanmi oc ttzaj tk'o'n nimcu cyk'inumable, 48cyja'tzun che ajbele cye aj k'oj cyi'je, akeju che tzajel t-sama'n Kman. C'ic'ex nim we'yaj cyu'ne ex nim txketle'n, minti' cyxbalune ctel ex tuj mebayil che tele. Che oquel k'o'ne te cymajen xjal tu'n Kman, tu'ntzun tic'x nimcu cyu'ne ocxi cynaje. 49Max ttxa'npun tx'otx' najchak wen ctzajel ti'n Kman jun nasyon cyi'je, ic lipan ic tza'n t'iw, ex mlay tz'el cynic'e ti'j tyol. 50Ke xjal lu puro tx'u'j cywitz, mlay che niman cye tij xjal ex mlay tzaj tz'e'y cyc'u'j cyi'j c'wa'l. 51Che xel cychyo'n cyal cywacẍe ex cxel cywa'n twitz cyawale ctzajel tuj cytx'otx'e, ocxi cynaje cyu'n; mlay cyaj cyk'o'n cytriwoye mi cyc'aye ta'l twitz uva, mi cychi'ye aseyt, mi cyal cywacẍe ex mi cyal cyẍne'le, ocxi cynaje cyu'n. 52Cbajel cytxolban cyib cyi'j cycyakil cytanmiye, ex che oquel tzokpaj cyi'j, ocxi cycub cyxitun ke muro ma' cywa'l, akeju otok tz'oc ke' cyc'u'je cyi'j. Cbajel cytxolban cyib cyi'jele, ex che oquel tzokpaj cyi'j cycyakil tnam ate' tuj tx'otx' ctzajel k'o'n cyeye tu'n Kman Dios. 53Oc tbaj cytxolban cyib ke aj k'oj cyi'jele cytanmiye, ctzajel baj cyc'u'je, ctzajel nimxix we'yaj cyi'je, ex axpe cycy'ajale ex cyme'jele cxel cychyo'ne, akeju otok che tzaj k'o'n cyeye tu'n Kman Dios. 54Icxpeju xinak at cyxole, aju mas ba'n tmod ex che'w tc'u'j, mlay tzaj k'ak'an tc'u'j ti'j terman mi ti'j t-xu'jil aju c'ujla'nxix tu'n, ex mi cyi'j tc'wa'l akeju ate'x, 55ex mlay cub t-sipan cyxol aju tchibjal tc'wa'l in xi tchyo'n, porque misicyer jun ti'xti at tu'n t-xi twa'n oc cyoc tzokpaj ke aj k'oj cyi'je, ex oc cybaj yajla'ne nimxix cyuj cycyakil cytanmiye. 56Icxpeju xu'j at cyxole, aju mas ba'n tmod ex che'w tc'u'j, aju minti'tok in cub aj tkan twitz tx'otx' ka minti' t-xajab toc, mlay txi tk'o'n ch'in tchi' te tchmil aju c'ujla'nxix tu'n, ex mi cye tal; 57oc tul itz'j jun tal, tuj ewaj cxel tchyo'n tuc'ix tmuj, ex mi'n cub t-sipan cyxol keju ate' tuj tja; porque misicyer jun ti'xti at tu'n t-xi twa'n oc cyoc tzokpaj ke aj k'oj cyi'j ke cytanmiye. 58Ka mi'n ma che japun ke ley cyu'ne, aju tz'iban tuj u'j lu, ex ka mi'n ma che xobe twitz biybaj tbanilxix ex xobajilxix, aju tbi Kman Dios, 59che tzajeltzun t-sama'n Kman c'ixbisabl ma'xix ex xobajilxix cyibaje ex cyibaj ke cyiyjile che ul itz'j te tibajxi, ex che tzajel t-sama'n ke yabil plojxix cyi'je, akeju minti' k'anbil cyi'j. 60Ctzajel tk'o'n cycyakil c'ixbisabl cyibaje, akeju e tzaj tuj Ejipt, akeju tzaj nimxix t-xobil cyi'je cyu'n, ex cucx che c'ixbisetele cyu'n. 61Mya o'cx jlu, ax icx che tzajel t-sama'n Kman txkantl yabil ex c'ixbisabl cyibaje, akeju mya tz'iban tuj u'j te ley lu, ocxi cycub baje cyu'n. 62Masque otok chmet nim cybaje ic tza'n ke che'w twitz cya'j, pero nic'xi cybaje cyjel ten, tu'nju minti' otok txi cynimane Kman Dios. 63Ic tza'nx o tzalaj Kman cyi'je tu'n tbinchante ba'n cyeye ex tu'n tchmet cybaje, ax icxtzun ctzalajel oc cynaje tu'n; che elex k'i'ne tu'n tuj tx'otx' jatum che pole tu'n cyoque te tajwil. 64Che bajel sputune tu'n Kman cyuj cycyakil nasyon max ttxa'npun tx'otx'. Atzun che c'ulule cywitz junxitl dios, akeju tze' ex abj cytx'otx'il, akeju minti' ojtzki'n cyu'ne ex mi cyu'n ke cyxe'chele. 65Octzun cytene cyuj ke nasyon lu, mlay che tene tuj txubtxaj ex mlay che ojlane. Tu'n Kman che ank'ile tuc'il cyxobile, bis ctel cywitze, ex ctzajel baj cyc'u'je. 66Tuj xobajil che ank'ile, che xobtele k'ijtl ex konic'an ex mlayx che tene tuj segur. 67Te prim oc cyma'ye: Nokwit ba'n toc kax naj, ex te konic'an oc cyma'ye: Nokwit ba'n tcub naj k'ij, tu'nju nimxix t-xobil ctzajel cyi'je, ex tu'nju ti'chak c'oquel cyque'yine. 68Masque o tma Kman cyeye tu'n mi'n cyaj meltz'aje tuj tbeyil Ejipt, che ajel meltz'aje tu'n juntl maj tuj Ejipt cyuj barc. Atzun cxel cyc'ayin cyibe tu'n cyoque te majen cye aj k'oj cyi'je, pero mi jun cxel lak'onte cyeye.

will be added

X\