DEUTERONOMIO 26

1Oc cyocxe tuj tx'otx' ctzajel tk'o'n Kman Dios te cyetzbile ex oc cynajane tuj, 2ctzajel cyi'ne ch'in ti'j tnejel twitz cyawale, aju tzul tk'o'n tx'otx', ex cxel cyi'ne tuj jun chi'l, tuj lugar cjawil t-sc'o'n Kman Dios te nabl tbi. 3Che poltzune twitz pal aju in ajben tuj k'ij lu, ex teyle junjun cxel tma'n te cyja': Cxel nma'ne twitz Kman Dios ja'lo, o chin octze tuj tx'otx' tzaj ttziyan Kman cye kxe'chel tu'n ttzaj tk'o'n ke. 4C'ic'eltzun ti'n pal aju chi'l tuj cyk'abe ex cbel tk'o'n twitz t-altar Kman Dios, 5atzun cyeye cxel cyma'ne twitz Kman Dios cyja': Aj Arameytok ke nxe'chele nej, mya nimtok cybet ex betin xjaltok ke. E pon tuj Ejipt ex ax e cyaj ten najal. Te tibajxi e oc te jun nasyon matijxix at tipun ex nim cyajlal. 6Pero o cybincha aj Ejipt nim mya ba'n cyi'j, e baj yajla'n cyu'n, ex cub cyk'o'n ak'untl cyuwxix cyibaj. 7E cubsantzun twitz Kman aju Cydios kxe'chel tu'n tonin cyi'j; tzaj tbi'n cykanbetz, tzaj tque'yin cymebayil ex ak'untl cyuwxix tcubtok cyibaj, tuc'ix yajbil cye, 8e etz k'i'n tu'n Kman tuj Ejipt tu'n tipumal ma'xix, tuc'il xobajil nimxix, cyuc'ix ke techal ex ke binchben nim cyipumal; 9e ul k'i'n tu'n tuj lugar lu ex o tzaj tk'o'n tx'otx' lu te cye, jun tx'otx' k'inunxix ex tbanilxix. 10Tu'ntzun jlu ma tzaj wi'ne aju tnejel twitz awal ma jaw nchmo'ne twitz tx'otx', aju o tzaj tk'o'n Kman weye, che chicuye txi cyma'ne. Cbeltzun cyk'o'ne chi'l twitz Kman Dios, ex che bel ẍmeje'ye c'ulul te. 11Te tibajxi cbel cyic'sa'ne jun nink'ij, junx cyuc'il aj Leví ex ke stranjer xjal najl cyxole, ti'j tcyakilju otok tzaj tk'o'n Kman Dios cyeye ex cye keju ate' tuj cyjaye. 12Octzun tjapun toxin abk'i, aju abk'i tu'n t-xi k'ot tlaji'n ti'j tcyakil, c'elel tpa'n teyle junjun cyeye tlaji'n ti'j tcyakil twitz tawal, ex cxel tk'o'n cye aj Leví ex cye stranjer xjal najl cyxole, cyuc'ix cye c'wa'l minti' cyman ex cytxu' ex cye meba xu'j, tu'ntzun cywa'n ti'j tuj cytanmiye nok nic'pun cyajbil. 13Cxeltzun cyma'ne twitz Kman Dios cyja': Ma tz'el npa'ne ch'in ti'j twitz wawale at tuj njaye, tu'n tajben teya, ex ma baj nsipane cye aj Leví ex cye stranjer xjal najl tuj ntanmiye, cyuc'ix cye c'wa'l minti' cyman ex cytxu' ex cye meba xu'j, ex ma japun wu'ne tcyakilju tzaj tma'na weye; minti' ma chin ic'e cyibaj tmandamyenta, ex minti' ma tzic' cyna'l wu'ne. 14Minti' o chin wa'ne ti'j tej atintoke tuj bis ti'j jun cyimni, minti' o chin wa'ne ti'j tej tz'iltok kine, ex minti' o txi woyine cye cyimni. Nman Dios, ma txi nnimane tyola ex ma japun wu'ne tcyakilju tzaj tma'na weye. 15Ko tque'yintza tuj tnajbila xjan max tuj cya'j, ex cy'iwlan cuba ke aj Israel akeju etzan tu'na, tuc'ix tx'otx' aju tzaj tk'o'na keye, ic tza'nx xi ttziyana cye kxe'chele. Aju tx'otx' lu k'inunxix ex tbanilxix, che chicuye. 16In tma'n Kman Dios cyeye ja'lo tu'n cyjapun ke ley ex ke mandamyent lu cyu'ne. Ten cycwente cyi'je tu'n cyjapun cyu'ne tu'n tcyakil cyanmiye ex tu'n tcyakil cyc'u'je. 17Ma txi cytziyane ja'lo ka ate Kman Cydiose, ex ka cucx tu'n cyxi lpe'ye ti'j, cucx tu'n t-xi cynimane te jumajx, ex cucx tu'n cyjapun ke tley, ke tmandamyent ex ke tcawbil cyu'ne. 18Ax icx ma tzaj tma'n Kman cyeye ja'lo, ka akeye aj Israel jun c'loj xjal etzan tu'n ex o'cx tecuxix ic tza'nx o tzaj ttziyan cyeye, ex ma tma tu'n cyjapun cycyakil ke tmandamyent cyu'ne. 19Tu'n Kman che oquel k'o'ne te jun nasyon ma'xix toclen cywitz ke mastl nasyon o che bant tu'n, tu'ntzun cyjaw nimsa'ne, tu'n cyyolin xjal ba'n cyi'je, ex tu'n tten nimbil cyeye; ex che oquele te jun c'loj xjal pa'maj tu'n cyajbene o'cx te, ic tza'nx o tma.

will be added

X\