DEUTERONOMIO 25

1Ka ma tzaj k'oj cyxol cabe xjal, ex ka ma che pon tuj jusgad tu'n t-xi bincha'n cyi'j cyu'n ke jwes, atzun ke jwes che k'malte alcye minti' til, ex cbel cyk'o'n t-sentens aju at til. 2Ka at tu'n tbaj asyalit aju at til, cxel tma'n jwes te tu'n tcub mutze' twitz tx'otx', ex twitzx jwes cxel jato'n asyal ti'j, ic tza'nx til otok bant. 3Pero mlay tzic' tibaj 40 asyal tu'n t-xi' ti'j, porque ka nimxix tcastiw cyermaniye ma cub, jacu tzaj t-ximbetz ka minti'x tajben tuj cywitze. 4Mi'n tz'oc cyc'alo'ne ttzi' boys in bet tibaj triw tu'n tel ttxc'omal. 5Ka at cabe xinak cyitz'in cyib ex junx najl ke, ka ma cyim jun cye ex minti' jun tcy'ajal ma cyaj, mlay moje' t-xu'jil cyimni tuc'il juntl xinak te ti'jxi; ax terman ktzan tchmil cjawil xu'jilante te, tu'ntzun ttzaj tiyjil ktzan terman tu'n. 6Aju tnejel tal xu'j k'a tzul itz'j, ax tbi c'oquel ic tza'n tbi ktzan tchmil tu'ntzun mi'n tcub naj tbi ktzan tchmil cyxol aj Israel. 7Katzun tc'i' xinak jaw t-xu'jla'n t-xu'jil ktzan terman, cxe'ltzun xu'j tuj jusgad ex cxel tma'n cye tij xjal te tnam cyja': Tc'i' nbalque tu'n tcyaj ten tbi ktzan terman cyxol aj Israel, ex tc'i' jaw moje' wuc'ile. 8Ctzajeltzun cytxco'n ke tij xjal te tnam aju xinak lu, ex cxel cykanin te katzun cucx ma cub t-xc'ayin tib tu'n tmoje' tuc'il t-xu'jil ktzan terman, ex ka ma tma: Mlayx chin moje'ye tuc'il xu'j lu, ka chi, 9cxeltzun lak'e' t-xu'jil ktzan terman ti'j, ex cywitz ke tij xjal, c'elel ti'n xu'j t-xajab xinak, c'oquex ttzuban xu'j tuj twitz, ex cxel tma'n te cyja': Atzun in bant ti'j ju xinak tc'i' moje' tuc'il t-xu'jil ktzan terman tu'n ttzaj tiyjil tu'n, chi xu'j cxel tma'n. 10Cyxol aj Israel bi'x c'oquel bya'n tbi xinak lu cyuc'ix ke tiyjil: Ke tiyjil xjal minti' t-xajab toc. 11Ka in che k'ojin cabe xinak, ka ma pon lak'e' t-xu'jil jun cye tu'n tcolin ti'j tchmil, ex ka ma che tzaj ttzyu'n ke tbak' aju nno'c c'ixbisante te tchmil, 12c'eleltzun cytx'emine tk'ab xu'j lu, ex mi'n tzaj tz'e'y cyc'u'je ti'j. 13Mi'n tz'ajben cabe marc cyu'ne, jun al ex juntl mya al; 14ex mi'n tz'ajben cabe malbil cyu'ne, jun matij ex juntl mya matij. 15Nok o'cx tu'n tajben marc cabalxix cyu'ne ex malbil tz'aklxix, tu'ntzun cyank'ine nim abk'i tuj tx'otx' ctzajel tk'o'n Kman Dios cyeye. 16Porque cycyakil ke jlu ic'un tu'n Kman ex keju in cybincha'n aju mya tz'aklxix. 17Cyna'ntze aju cybincha aj Amalec cyi'je tej ate'toke tuj be, cyetzlenxiye tuj Ejipt: 18E oc tzokpaj cyi'je tuj be, ex tc'ulbacu sicni keye ex minti'tl cyipune, ex e oc tzokpaj cyi'j keju lepchix cytzaj; minti' e xob twitz Dios. 19Cyja'tzun, oc cyclete tu'n Kman Dios cywitz cycyakil aj k'oj txolin cyten cyi'je, tuj tx'otx' ctzajel tk'o'n tu'n toc te cyeye, che najel ke aj Amalec cyu'ne, tu'n mi'n cytzaj na'ntl tzalu twitz tx'otx'. Mi'n tzic' tna'njtz jlu cyu'ne.

will be added

X\