DEUTERONOMIO 24

1Oc tmoje' jun xinak tuc'il jun xu'j, ka te tibajxi mya ba'n ma tz'ela tuj twitz tu'n tlaj jun tpaltil, ba'n tu'n tcub ttz'iban jun u'j tu'n tcub pa't mejeble'n; cxel tk'o'n te xu'j ex c'elex tlajo'n tuj tja. 2Texlenxi xu'j tja tchmilben, jacu moje' tuc'il juntl xinak. 3Katzun ma tz'el ic'un xu'j tu'n tcabin xinak ex ka ma cub ttz'iban jun u'j tu'n tcub pa't mejeble'n, ka ma txi tk'o'n tuj tk'ab xu'j ex ma tz'ex tlajo'n tuj tja; ex ka ma cyim tcabin tchmil, 4mlay bant tu'n tmoje' juntl maj tuc'il nej tchmil, tu'n tlaj otok txi aj tja juntl tchmil, ex tu'nju otok tz'ilix, porque mya ba'n jlu tuj twitz Kman. Mi'n baj cytz'ilsa'ne cytanmiye aju ctzajel tk'o'n Kman Dios te cyetzbile. 5Ka at jun xinak c'itzketok toclen moje', mi'n tz'ex tuj k'oj ex mi'n cyaj ten te sanjelal tuj enter jun abk'i; tu'ntzun tten tuj tja tuj enter abk'i, ex tu'n ttzalaj t-xu'jil. 6Mi'n txi cykanine tcya' xjal te prent ex mi tal tcya', porque a jlu mer ic tza'n acu tchwinklal xjal nne'l cyi'ne te prent. 7Ka at jun aj Israel ma cnet cyu'ne in xi telk'a'n jun t-xjalil tu'n toc te tmajen ex ka tu'n t-xi tc'ayin, aju xjal lu il ti'j tu'n tcub byet, tu'ntzun tcub naj mya ba'n cyxole. 8Atzun ti'j tx'a'c minti' k'anbil te, ten cycwente ti'j tu'n tjapun tcyakilju ctzajel k'ma'n cyeye cyu'n ke pal aj LevĂ­. Il ti'j tu'n tjapun cyu'ne ic tza'n o txi nma'ne cye. 9Cyna'ntze aju tbincha Kman Dios ti'j Mariy tuj be, tej otok che etze tuj Ejipt. 10Ka ma txi cyk'o'ne tch'ex jun cyuc'ile, mi'n che ocxe tuj tja tu'n tetz cyi'ne jun ti'xti te prent; 11ax che ayone ttxa'n pe'n, ex ax te xjal c'eletz k'o'nte jun prent cyeye. 12Katzun meba xjal, mi'n cyaj cytzyu'ne prent oc toc konic'an; 13c'ajel cyk'o'ne oc tex k'ij, tu'ntzun t-xi tbok'in tib xjal tuj t-xbalun oc t-xi' tal. Tu'ntzun jlu ctzajel tkanin xjal tcy'iwbil Dios cyibaje, ex ba'n c'elel jlu tuj twitz Kman Dios. 14Mi'n cub cyyajla'ne jun majen meba ex minti' at te, ka ax cyxjalile ex ka jun stranjer xjal ax najl cyxole. 15Bi'x cychjonxe twi tc'u'j oc tex k'ij, porque meba xjal lu, ex in ajben twi tc'u'j tu'n tank'in. Ka minti' ma txi cyk'o'ne twi tc'u'j, cxel tma'n jlu te Dios, ex attzun cyile twitz Dios ti'j jlu. 16Mi'n che cub byet ke mambaj tu'n tlaj cyil cyc'wa'l, ax icx ke c'wa'lbaj, mi'n che cub byet tu'n tlaj cyil cyman; teylex te junjun cymel tu'n tlaj tex til. 17Mi'n cybinchaye jun ti'xti mya tuj tumel cyi'j ke stranjer xjal, mi cyi'j ke c'wa'l minti' cyman ex cytxu', ex mi'n tzaj cyi'ne te prent t-xbalun jun meba xu'j. 18Mi'n tzic' tna'l cyu'ne, ax icx cyeye o che tene te majen tuj Ejipt, ex tu'n Kman Dios e etz tzokpi'ne. Tu'ntzun jlu in xi nma'ne cyeye tu'n tjapun tcyakil jlu cyu'ne. 19Oc tjaw cychmo'ne twitz cyawale, ka ma tzic' tna'njtz tu'n ttzaj cyi'ne jun che'l triw, mi'n che aje k'il te; ax e tcyaj ten tu'n tajben cye stranjer xjal ax najl cyxole, cye c'wa'l minti' cyman ex cytxu' ex cye meba xu'j, tu'ntzun cycub cy'iwla'ne tu'n Kman Dios ti'j tcyakilju cbantel cyu'ne. 20Oc t-xi cyyucune tkan olivo tu'n tcub twitz, ka ma cyaj junjuntl twitz twi tkan, mi'n cub cyi'ntle; ax e tcyaj ten tu'ntzun tajben cye stranjer xjal ax najl cyxole, cye c'wa'l minti' cyman ex cytxu' ex cye meba xu'j. 21Oc tcub twitz cy-uvaye, mi'n che aje k'ilte aju otok cyaj ten twi tkan; ax e tcyaj ten, tu'ntzun tajben cye stranjer xjal ax najl cyxole, cye c'wa'l minti' cyman ex cytxu' ex cye meba xu'j. 22Cyna'ntze, ax icx cyeye o che tene te majen tuj Ejipt. Tu'ntzun jlu in xi nma'ne cyeye tu'n tjapun tcyakil jlu cyu'ne.

will be added

X\