1 Ka ma cyile jun twacẍ jun cyxjalile ex ka t-ẍne'l otok cyaj tzpet, mi'n nok cucx tz'oc cyque'yine, nok o'cx cyinxe tu'n tpon tuc'il cyxjalile. 2 Katzun mya cyvesine ex ka minti' ojtzki'n cyu'ne aju tajwil alumaj, cxeltzun cyi'ne max cyjaye, ex ax ctel cyuc'ile. Octzun tpon cyxjalile kanil te, cxeltzun cyk'o'ne. 3 Ax jlu cbantel cyu'ne ti'j jun bur, jun xbalun ex ka nok alcyex juntl ti'xti otok cyaj tz'ak te jun cyxjalile, ka ma che oc noje ti'j. Mi'n nok cucx tz'oc cyque'yine. 4 Ka ma cyile tbur jun cyxjalile ex ka twacẍ otok cub tz'ak tuj be, mi'n tz'el cycumin cyibe ti'j, nok o'cx tu'n cyonine tu'n tjaw twaban. 5 Mi'n tz'oc tk'o'n xu'j t-xbalun xinak ti'j, ax icx te xinak mi'n tz'oc tk'o'n t-xbalun xu'j ti'j, porque ic'un tu'n Kman Dios aju xjal in binchante jlu. 6 Ka ma che oc noje ti'j jun k'u' chyu'j tjax twi' jun tze' ex ka tcub twitz tx'otx', ka ate' ke tal chyu'j tuj tk'u' ex ka tjos, ex ka bunl cytxu' cyibaj, mi'n tzaj cyi'ne aju cytxu' cyuc'ix ke tal; 7 nok o'cx ke tal tu'n ttzaj cyi'ne, atzun cytxu' cxel cytzokpi'ne, tu'ntzun tten ba'n cyeye ex tu'n cyxi lak'e' tuj cyk'ije. 8 Oc tjaw cybincha'ne jun cyjaye, il ti'j tu'n tjaw cybincha'ne jun tal makbil ti'jele twi ja, tu'ntzun mi'n ttzaj cyil keju ate' tuj cyjaye ti'j tcamic jun xjal ka ma tzaj tz'ak twi ja. 9 Mi'n cu'x cyawa'ne juntl wik iyaj cyxol tkan uva, tu'ntzun mi'n tel k'i'n tcyakil cyeye tu'n tajben tuj tja Dios, tza'nx ju iyaj otok cu'x cyawa'ne, ax icx twitz uva. 10 Mi'n tz'oc cyk'o'ne jun bur ch'oquil tuc'il jun wacẍ. 11 Mi'n tz'oc cyk'o'ne cyxbalune smo'n lan ex nok' lino tuj. 12 Cyk'onque xc'alo'xin cyi'j cycyajil ttxa'n cymante toc cyi'je. 13 Ka at jun xinak ma tzaj ti'n jun txin tu'n toc te t-xu'jil, ex ka ma tz'el tic'un toclenxi moje' tuc'il, 14 ka ma tz'oc ten yolil mya ba'n ti'j ex ka ma tma' cyja': In moje'ye tuc'il xu'j lu, pero tej nmoje'ye tuc'il el nnic'e ti'j otok til xinak, ka chi, 15 atzun cye tman txin cxel cyi'n jun yec'bil cywitz ke tij xjal te tnam, tu'n cyyec'unte ka na'nxtok ttil txin xinak; 16 ex cxel tma'n tman txin cye tij xjal cyja': Xi nk'o'ne nme'jele te t-xu'jil xinak lu, atzun ja'lo minti'tl tgan ti'j 17 ex in tma'n ka at tpaltil ex ka otok tilxi nme'jele xinak, pero lu yec'bil k'i'n wu'ne tu'n tyec'unjtz ax toc na'nxtok ttil nme'jele jun xinak, chi tman txin cxel tma'n. Ex cbel cylic'un xbalun cywitz ke tij xjal te tnam. 18 Ctzajeltzun cytzyu'n ke tij xjal aju xinak lu, ex cbel cyk'o'n tcastiw, 19 c'elel cyi'n syen sak pwak tmult tu'n t-xi k'ot te tman txin, tu'n tlaj otok yolin mya ba'n ti'j jun txin aj Israel bajxtok til xinak; ex ax xu'j lu c'oquel te t-xu'jil, ex mlay cub tpa'n tib tuc'il xu'j tuj tcyakil tank'ibl. 20 Katzun ax toc otok tilxi txin xinak, 21 c'eletztzun cyi'n ttzi tlamel tja tman, ex c'oquel xo'n abj ti'j cyu'n ke tij xjal te tnam tu'ntzun tcyim, tu'nju otok tbincha jun mya ba'n ma'xix cyxol aj Israel ex otok yaẍin tuj tja tman. Cyja'tzun ctelba tu'n tnaj mya ba'n cyxole. 22 Ka at jun xinak ma tz'el cnet in tan tuc'il jun xu'j mejebni, cycabil che bel byet. Cyja'tzun ctelba tu'n tnaj mya ba'n cyxole, akeye aj Israel. 23 Ka at jun txin na'nxtok ttil xinak ex otok bant ti'j tu'n tmoje', ka ma tz'oc noj juntl xinak ti'j tuj tnam, ex ka ma cub tan tuc'il, 24 cycabiltzun che xel k'it ttzi tpwertil tnam, ex che oquel xo't tu'n abj tu'n cycyim. Cymel txin tu'n tlaj minti' jaw sch'in ex tuj tnam ta'tok, ex cymel xinak tu'n tlaj otok cub tmojban tib tuc'il t-xu'jil tuc'il. Cyja'tzun ctelba tu'n tnaj mya ba'n cyxole. 25 Katzun at jun xinak ma tz'oc noj ti'j jun txin tuj cojbil ex ka otok bant ti'j tu'n tmoje' txin, ex ka ma tz'oc tk'o'n il ti'j tu'n tcub tan txin tuc'il, o'cx te xinak lu cbel byet, aju otok cub tan tuc'il txin. 26 Atzunte txin mi'n cub byet, porque minti' otok tbincha jun il tu'n tcyim. Junx ta' jlu ic tza'n jun xinak nno'c tzokpaj ti'j juntl ex in cub tbyo'n, 27 porque otok tz'oc noj ti'j txin tjunalx ta'tok tuj cojbil, ex masque jaw sch'in, pero mi a'l jun jacu colin ti'j. 28 Ka at jun xinak ma tz'oc noj ti'j jun txin na'nx ttil xinak ex minti' ttrat tuc'il juntl tu'n tmoje', ka ma tz'oc tk'o'n il ti'j tu'n tcub tan txin tuc'il, ex ka ma che el cnet, 29 ate xinak lu cxel tk'o'n 50 sak pwak te tman txin; il ti'j tu'n tjaw t-xu'jla'n, porque otok cub tmojban tib tuc'il, ex mi'n cub tpa'n tib tuc'il tuj tcyakil tank'ibl. 30 Mi jun xinak cjawil t-xu'jla'n t-xu'jil tman, mi tu'n tcub tan tuc'il t-xu'jil tman.
