DEUTERONOMIO 21

1Ka ma cnet t-ximlal jun cyimni cyu'ne tuj cojbil tuj tx'otx' ctzajel tk'o'n Kman Dios te cyetzbile, ex ka minti' otok ilwajtz al u'n otok cub byo'n, 2atzun cye tij xjal cyuc'ix ke jwes cxel cyechan t-xol lugar jatum tcubsa'n t-ximlal cyimni cyuc'il ke tnam nikayin ate'. 3Atzun cye tij xjal ate' tuj tnam mas nikayin ta', ctzajel cyi'n jun tal vac na'nxtok toc ti'j ak'untl ex na'nxtok tocx tjak' yuw, 4cbelex cyi'n tuj jun tk'ab xak in bet a' tuj, jatum na'nx tbaj ch'oc'an tx'otx' ex na'nx tcub aj awal tuj, atzun cjawil cytokin ti'j tkul tal vac. 5Te tibajxitzun che pol lak'e' ke pal aj LevĂ­, porque atzun ke o che jaw t-sc'o'n Kman tu'n cyajben te ex tu'n cycub cy'iwla'n xjal cyu'n tuj tbi Kman; nok tu'n cyyol jacu bant cyi'j xjal, ka at k'oj ex ka at jun ma c'ixbi tu'n juntl. 6Cycyakil ke tij xjal tuj tnam mas nikayin ta' jatum otok cyim xjal, c'elel cytx'jo'n cyk'ab tibaj tal vac otok jaw tokin ti'j tkul ttzi a', 7ex cxel cyma'n: Mya ku'ne cub kbyo'ne xinak lu, ex minti' o kile tza'n tten cub byo'n. 8Kman, najsama kile ako'ye aj Israel ex tu'na o ko colpete, mi'n tz'oc tk'o'na te kile aju tcamic xjal lu, che chi, cxel cyma'n. Cyja'tzun mlay che oque tuj xjel ti'j tcamic xjal lu. 9Ex mlaytzun tz'oc k'o'n tcamic xjal lu cyi'je ka ma cybinchaye aju in tma'n Kman. 10Octzun cyexe k'ojlel cyi'j aj k'oj cyi'je, ka ma che tzaj tk'o'n Kman Dios tuj cyk'abe tu'n cytzaj cypresine ke, 11ka at jun cyeye ma til jun xu'j tbanilxix que'yin cyxol, ex ka ma t-xo' tgan ti'j ex ma tzaj ti'n tu'n toc te t-xu'jil, 12cxeltzun ti'n aju xu'j lu max tja. Atzun te xu'j lu, c'elel ti'n tcyakil ttzmal twi', che elel ti'n ke twi t-xcy'ak, 13c'elel ti'n t-xbalun tocsa'ntok tej ttzaj k'i'n pres, ex axtzun cyjel ten tja xinak. Cjawiltzun ok' xu'j cyi'j tman cycyakil k'ij tuj enter jun xjaw. Tbajlenxitzun jlu, ba'ntzun tu'n tcub tmojban tib xinak aj Israel tuc'il; c'oqueltzun te tchmil xu'j lu, atzunte xu'j c'oquel te t-xu'jil. 14Katzun te tibajxi mya ba'n ma tz'ela xu'j tuj twitz, ba'n tu'n tcyaj ttzokpi'n; pero mi'n txi tc'ayin tu'n pwak ex mi'n tz'oc tk'o'n te majen, porque otok cub tan tuc'il xu'j lu. 15Ka at jun xinak at cabe t-xu'jil, ex ka mas c'ujla'nxix jun tu'n, atzun juntl myaxix c'ujla'n tu'n, pero ka cycabil xu'j lu k'a tnejel cyal, ex ka aju tnejel tcy'ajal atzun tal aju xu'j myaxix c'ujla'n tu'n, 16octzun tpon tk'ijlalil tu'n tcub tpa'n tk'inumabl cyxol ke tcy'ajal, mlay tz'oc tk'o'n te nej tcy'ajal aju tal ju xu'j c'ujla'nxix tu'n te t-xel ju tnejel tcy'ajal ti'j ju xu'j myaxix c'ujla'n tu'n, aju axix toc tnejel tcy'ajal. 17Il ti'j tu'n toc tk'o'n te tnejel tcy'ajal, ex mas nim tk'inumabl ctzajel tk'o'n twitzju cxel tk'o'n cye mastl tcy'ajal, porque atzun tnejel tcy'ajal tej matok k'i'n tipun, ex tetzun c'wa'lbaj lu tcyakilju oclenbaj te nej c'wa'lbaj xinak. 18Ka at jun cyxole at jun tc'wa'l miban niman, tx'u'j twi' ex minti' in xi tniman aju in cyma'n tman te, ex masque cub k'o'n tcastiw pero minti' in xi tniman, 19cxeltzun k'i'n cyu'n tman ttzi tpwertil ttanmi cywitz ke tij xjal te tnam, 20ex cxel cyma'n cye tij xjal cyja': Aju kc'wa'le lu miban niman, tx'u'j twi', minti' in ko'x nimane tu'n; jumajx mya ba'n ex puro c'al k'e'n. 21Cycyakiltzun ke xinak ate' tuj tnam c'oquel cyxo'n c'wa'lbaj lu tu'n abj tu'n tcyim. Cyja'tzun c'elel cyi'ne mya ba'n at cyxole tuj tnam, ex oc cybinte cycyakil aj Israel jlu, ctzajel cyxobil. 22Ka at jun xjal ma cub t-sentens tu'n tcyim ex ka ma jaw yobit ti'j tze' tu'n tlaj otok tbincha jun il ma'xix, 23mlay cyaj ten t-ximlal ti'j tze' tuj enter konic'an; il ti'j tu'n tcu'x makut ax k'ij lu, porque aju xjal in jaw yobin ti'j jun tze' tcub t-sentens tu'n Dios. Mi'n baj cytz'ilsa'ne tx'otx' aju ctzajel tk'o'n Kman Dios te cyetzbile.

will be added

X\