DEUTERONOMIO 20

1Oc cyexe tuj k'oj cyi'j ke aj k'oj cyi'je, ka ma cyile k'i'n chej cyu'n, cyuc'ix carwaj in che ajben tuj k'oj, ex ka mas nim cyajlal soldad ic tza'n cyeye, mi'n che xobe cywitz, porque ate Kman Dios ctel cyuc'ile, aju etz k'inte cyeye tuj Ejipt. 2Octzun tpon or tu'n ttzyet k'oj, cpol lak'e' pal tu'n tyolin cyuc'il soldad aj Israel, 3ex cxel tma'n cye cyja': Cybintze akeye aj Israel, ja'lo che k'ojele cyi'j aj k'oj cyi'je. Mi'n baj cyc'u'je ex mi'n che xobe; mi'n che tzaj lu'lune ex mi'n che jaw sec'paje, 4porque ate Kman Dios at cyuc'ile; ate ck'ojel cyi'j ke aj k'oj te cyxele, ex cyja'tzun akeye che cambal. Atzun jlu cxel tma'n pal. 5Ax icx cxel cyma'n ke nejenel cyja': Ka at jun cyeye ma bant jun tja ac'aj ex na'nx tocx ten najal tuj, e taj tja; mya yajcu cyim tuj k'oj ex jacu juntl tz'ocx ten najal tuj tja. 6Ka at jun cyeye ma cu'x tawa'n uva ex na'nx tnic'ben ti'j, e taj tja; mya yajcu cyim tuj k'oj ex jacu juntl jaw chmonte twitz t-uva. 7Ka at jun cyeye ma bant ti'j tu'n tmoje' ex na'nx tmoje', e taj tja; mya yajcu cyim tuj k'oj ex jacu juntl moje' tuc'il txin attok tmojebel tuc'il. Atzun jlu cxel cyma'n ke nejenel. 8Te tibajxi oc cyma'tl ke nejenel cyja': Ka at jun in xob ex mya cyuw tc'u'j tuj k'oj, e taj tja tu'ntzun mi'n tbaj cyc'u'j ke tuc'il tu'n. 9Octzun cybaj yolin ke nejenel, c'oqueltzun k'ot cyoclen ke capitán tu'n cycub nej cywitz junjun c'loj soldad. 10Octzun cypon lak'e'ye ti'j jun tnam tu'n cyoc tzokpaje ti'j, tnejel cxel cyma'ne cye ka jacu cub tuj cywitz tu'n cycyaj tjak' cycawbile. 11Katzun ma cub tuj cywitz ke xjal najl tuj tnam, ex ka ma cyak' ambil tu'n cyocxe tuj tnam, octzun che oquel te cymajene ex che ajbel cyeye. 12Katzun cyc'i' ex ka ma cyma tu'n toc k'oj, bixtzun baj cytxolin cyibe ti'jele tnam ex bix che oc tzokpaje cyi'j. 13Octzun cycub tz'ak tu'n Kman Dios tuj cyk'abe, che bel cybyo'ne tu'n spad cycyakil ke xinak najl tuj tnam. 14Atzun ke xu'j, ke c'wa'l, ke wacẍ, ex tcyakilju at tuj tnam, te cyeye che oquel; che nic'bele ti'j tcyakilju c'elel cyi'ne cye aj k'oj cyi'je, aju ctzajel tk'o'n Kman Dios cyeye. 15Cyja'tzun che tembil cycyakil ke tnam cyu'ne, akeju ate' najchak cyi'je, akeju mya ax ate' cyuj ke nasyon jatum che tele. 16Atzun ke tnam cye nasyon che tzajel tk'o'n Kman Dios tu'n cyoc te cyetzbile, mi jun cyjel ank'in cyu'ne cyuj; 17nok o'cx tu'n cynaj cyu'ne te jumajx cycyakil ke xjal lu: Ke aj Hetey, ke aj Amorrey, ke aj Cananey, ke aj Ferezey, ke aj Hevey ex ke aj Jebusey, ic tza'nx o tma Kman, 18tu'ntzun mi'n cytzaj xnak'tza'ne cyu'n tu'n cybinchanteye aju ic'bilxix in bant cyu'n te nimbil cye cydios, ex tu'n mi'n cybinchane il twitz Kman Dios. 19Katzun nim k'ij che tele ti'jele jun tnam tu'n ttzyet cyu'ne, mi'n jaw cytx'emine ke tze' ba'n tlonjtz cywitz ate' ti'jele tnam, porque jacu tz'ajben cywitz tu'n cylo'ne cyi'j, ex ake jlu, tze' ke, mya xjal ke tu'n cyoc tzokpaj cyi'je. 20Atzun ke tze' ojtzki'n cyu'ne miban tlo'njtz cywitz, ba'n tu'n cyjaw cytx'emine, ka tu'n cyajben cyu'ne te cyxwe'tzbile ti'j tnam aju che oquel tzokpaje ti'j, ocxi ttzyet cyu'ne.

will be added

X\