DEUTERONOMIO 18

1Ke pal aj Leví, ake jlu cycyakil ke tiyjil Leví, minti' cyoclen ti'j etzbil ic tza'n cye txkantl aj Israel. O'cx che ank'il cyi'j ke chojbil ex ke oyaj che xel k'ot te Kman. 2Mi'n cyc'am cyetzbil ic tza'n cye txkantl cyerman, porque ate Kman c'oquel te cyetzbil, ic tza'nx o tma Kman cye. 3Aju at cyoclen ke pal ti'j cyi'j ke tor ex ke ẍne'l che xel cyk'o'n xjal te chojbil, atzun ke jlu: Jun tk'ab, tuc'ix chibj tjak' tbakil ttzi', ex tpans. 4Ax icx c'oquel te cye, tnejel twitz triw, tnejel ta'l twitz uva, tnejel chibj aseyt, ex aju tnejel lan c'elel matzet cyi'j ke ẍne'l; 5porque o che jaw t-sc'o'n Kman Dios cyxol cycyakil c'loj cyiyjil aj Israel tu'n cyajben te jumajx tuj c'ulbil te, cyuc'ix ke cyc'wa'l. 6Ka at jun aj Leví ma tz'etz tuj jun tnam cyxole, ex ka ma pon tu'n tcyakil tgan tuj lugar otok jaw t-sc'o'n Kman, 7jacu tz'ajben te pal tuj tbi Kman, ic tza'nx in che ajben te Kman cycyakil ke txkantl tuc'il ax aj Leví ke, 8ex oc tc'ma' twa ic tza'nx cye txkantl in cyc'mo'n, ex part aju oc tc'ma' ti'j tetzbil. 9Oc cyocxe tuj tx'otx' ctzajel tk'o'n Kman Dios cyeye, mi'n tz'el cycano'ne aju costumr ic'bilxix in cybincha'n ke nasyon ma chixin. 10Mi jun cyeye txi k'onte jun tc'wa'l te chojbil tu'n tcub patit tuj k'ak', mi jun tu'n tbant tk'ijin, mi jun tz'oc tk'o'n tib k'malte alcye tzul te tibajxi, mi jun tu'n tbant tcy'a'n, 11mi jun tu'n tbant mañ tu'n, mi jun tu'n t-xi tkanin jun t-xjel cye aj k'ij ex mi cye keju in tzaj cytxco'n cyanmi cyimni, ex mi jun tu'n t-xi tkanin jun t-xjel cye cyimni. 12Porque ic'un tu'n Kman aju xjal in tbincha'n tcyakil jlu, ex tu'ntzunju ic'bilxix in cybincha'n ke nasyon lu, che elex tlajo'n Kman Dios cywitze. 13Che ocxe tz'aklxix twitz Kman Dios. 14Akeju nasyon lu, akeju che oquele te tajwil cytx'otx', in xi cybi'n cyyol ke chman ex ke aj k'ij; atzun cyeye minti' tzokpi'n keye ti'j tu'n Kman Dios tu'n tbant jlu cyu'ne. 15Cjawil t-sc'o'n Kman Dios jun t-sanjel cyxole ic tza'nx kine, ex cxel cynimane tyol. 16Atzun jlu xi cykanine te Kman Dios tuj k'ij tej toc cychmon cyibe cycyakile t-xe witz Horeb, tej cymanteye cyja': Kc'i'ye ko bine juntl maj tk'ajk'ajel twi Kman Dios, mi tu'n tkile aju nintz k'ak' lu, tu'ntzun mi'n kcyime, che chiye. 17Tzajtzun tma'n Kman weye: Ba'n aju yol ma cyma aj Israel. 18Ax cyxol cyerman cjawil nsc'o'ne jun nsanjele ic tza'nx aya, ex cxel tma'n cye tcyakil nyole cxel nma'ne te. 19Katzun at jun xjal minti' ma txi tbi'n tyol nsanjele, aju c-yolil cyuc'il te nxele, c'oquel te xjal lu tuj xjel wu'ne. 20Aju sanjel tu'nx tib in yolin jun yol ex in tman ka wu'ne otok txi nsama'ne, ex minti' otok txi nma'ne jun yol te, ex ka in tma'n ka otok tzaj sama'n cyu'n junxitl dios, il ti'j cbel byet, chi Kman. 21Katzun ma cymaye cyja': ¿Tza'ntzun tten c'elel knic'e ti'j ka mya tyol Kman in yolin ti'j? ka che chiye, il ti'j tu'n toc cycwente ti'j jlu: 22Ka minti' ma japun aju yol otok tma sanjel tuj tbi Kman, atzun c'elel cynic'e ti'j mya a Kman otok k'mante te, nok tu'nx otok tz'oc tk'o'n tib te t-sanjel Dios tu'n tnimbil tib; tu'ntzun jlu mi'n che xobe twitz.

will be added

X\