DEUTERONOMIO 17

1Mi'n txi cyk'o'ne jun tor ex ka ẍne'l at tpaltil, ex ka at juntl ti'xti mya ba'n toc ti'j, te chojbil te Kman Dios, porque ic'un jlu tu'n. 2Cyuj ke tnam che tzajel tk'o'n Kman Dios cyeye, ka at jun xinak ex ka jun xu'j ma tz'el cnet in tbincha'n aju minti' in tzalaj Kman ti'j, ka otok tzic' tibaj ju yol cyaj bant ti'j tu'n Dios cyuc'ile, 3ka in c'ulun cywitz junxitl dios ex in cub ẍmeje' cywitz, ka twitz k'ij, twitz xjaw ex ka cywitz ke che'w, aju minti' o tzaj tma'n Kman; 4ka ma cybiye jlu, cbajel cykanine wen ex cbajel cybi'ne; ex katzun ma tz'el cnet ax toc otok binchanjtz aju mya ba'n cyxol aj Israel, 5entons aju xjal otok binchante mya ba'n, cyi'n exe ttzi tpwertil tnam ex cyxo'n oque tu'n abj ocxi tcyim. 6Tu'n cyyol cabe ex ka ox testiw jacu cub t-sentens jun xjal tu'n tcyim; nok tu'n tyol junx testiw mi jun xjal jacu cub t-sentens tu'n tcyim. 7Ake testiw che oquel xo'nte abj ti'j xjal tnejel, ex te tibajxi c'oquel xo'n abj ti'j cyu'n cycyakil xjal aj tnam. Cyja'tzun cnajel aju mya ba'n cyxole. 8Katzun at jun xtis mlay bant ti'j cyu'ne tu'nju cyuw ma tz'ela te cyeye, ic tza'n jun byoj xjal, ka k'oj, ka otok tza'w jun tu'n juntl, ex ka juntl ti'xti in baj tuj tnam, che xe'le tuj lugar cjawil t-sc'o'n Kman Dios, 9tu'n cypone cyuc'il ke pal aj Leví ex tuc'il jwes tocsa'n, tu'ntzun t-xi cykanine alcye tu'n tbant ti'j. Atzun ke che k'malte cyeye alcye cbantel ti'j cyu'ne tu'n tcub cyk'o'ne t-sentens. 10Cybinchame tcyakil ic tza'nx otok tzaj k'ma'n cyeye max tuj lugar otok jaw t-sc'o'n Kman. 11Cbel cyk'o'ne t-sentens ic tza'nx otok tzaj tma'n jwes cyeye, ex japunx cyu'ne aju ctzajel k'man cyeye, mi'n baj cych'expu'ne. 12Katzun at jun ma jaw tniman tib ex minti' ma txi tniman tyol pal aju in ajben te Kman, ex ka tyol jwes, aju xjal lu il ti'j cbel byet. Cyja'tzun cnajel aju mya ba'n at cyxole, akeye aj Israel. 13Octzun cybinte cycyakil xjal jlu, ctzajel t-xobil cyi'j ex cxel cycolin tu'n tjaw cyniman cyib. 14Octzun cypone tuj tx'otx' ctzajel tk'o'n Kman Dios cyeye, cyoclenxiye tajwil, oc cynajane tuj ex oc cymanteye cyja': Kajbile jun kreye tu'n tcawin kibaje ic tza'n cye cycyakil nasyon kvesin kibe cyuc'il, ka che chiye, 15c'oqueltzun cyk'o'ne te cyreye jun cyermaniye aju cjawil t-sc'o'n Kman Dios. Mi'n tz'oc cyk'o'ne jun stranjer xjal te cyreye, aju mya cyerman cyibe tuc'il. 16Aju c'oquel te rey mi'n baj tchmo'n nim tchej, ex mi'n che aj t-sama'n ke xjal tuj Ejipt tu'ntzun cychmet nim tchej, porque o tma Kman cyeye cyja': Mi'n che aj meltz'aje juntl maj tuj be lu, chi Kman. 17Ax icx mi'n tzaj ti'n nim t-xu'jil tu'ntzun mi'n tel tzpet cyu'n; ex mi'n baj tchmo'n nimxix k'an pwak ex sak pwak. 18Octzun tc'monte toclen te rey, cxel tma'n tu'n tcub tz'ibet jun copya ti'j ley lu, ax ti'j ttxuylal at tuj cycwent ke pal aj Leví, tu'ntzun tajben te te. 19Cucx ctel aju copya lu tuc'il, ex cjawil t-sch'i'n tuj tcyakil k'ij oc tten tzalu twitz tx'otx', tu'ntzun t-xob twitz Kman Dios, tu'n t-xi tniman tcyakilju in tma'n ley lu, ex tu'n cyjapun tu'n; 20tu'ntzun mi'n toc tk'on tib te ma'xix cywitz ke terman, ex tu'n mi'n tel tpa'n tib cyi'j ke mandamyent lu. Cyja'tzun, tza'nxix te, ax icx ke tiyjil, che cawil nim tyemp cyxol aj Israel.

will be added

X\