DEUTERONOMIO 15

1Tuj wukchak abk'i cbel cynajsa'ne cyc'as ke c'asbenal cyuc'ile. 2Aju najsbil c'as ictzun ctembil cyja': Tcyakil xjal otok txi tk'o'n tch'ex jun tuc'il, cbel tnajsa'n aju otok txi tk'o'n te ch'ex. Mlay tz'oc tentl kanilte te tuc'il ex ka te t-xjalil tu'n tajtz tchjo'n, porque otok k'manjtz aju abk'i te najsbil c'as tu'n Kman. 3Atzun te jun stranjer xjal, ba'n tu'n t-xi cykanine tu'n tajtz tchjo'n tc'as, atzun te cyermaniye, cbel cynajsa'ne aju otok txi tch'exo'n cyeye; 4tu'ntzun mi'n tten jun meba cyxole, porque che bel cy'iwla'ne tu'n Kman Dios tuj tx'otx' ctzajel tk'o'n cyeye te cyetzbile. 5Ka cucx ma che nimane te, ex ka ma che japun cycyakil ke mandamyent lu cyu'ne akeju ma che'x nma'ne cyeye ja'lo, 6ax toc che bel cy'iwla'ne tu'n Kman Dios ic tza'nx o tzaj ttziyan cyeye, ex cxel cyk'o'ne cych'ex nimcu nasyon, atzun cyeye mi'n txi cykanine cych'exe cye. Nimcu nasyon che tel tjak' cycawbile, atzun cyeye mlay che ocx tene tjak' cycawbil. 7Ka at jun meba cyxol ke cyermaniye tuj jun tnam tuj tx'otx' ctzajel k'o'n cyeye tu'n Kman Dios, mi'n cub cycyuwsa'n cyanmiye ex mi'n cub cyxc'ayine onbilte, 8nok o'cx che onine ti'j ex cyk'onxe tch'ex, nok nic'pun at tajben te. 9Ten cycwente cyi'je, mi'n cub cyximane mya ba'n lu tuj cyanmiye tu'n cymanteye cyja': Ch'ix tul canun twukin abk'i, aju abk'i te najsbil c'as, jacu che chiye, ex tu'n jlu che oquele xc'a twitz cyermaniye meba ex minti' tch'ex cxel cyk'o'ne, porque mya yajcu txi tma'n xjal lu te Kman, ex aju cybinchbene lu c'oquel te il te cyeye. 10Il ti'j cxel cyk'o'ne tcyakil aju at tajben te, ex mi'n tzaj cybise oc t-xi cyk'o'ne, porque tu'n jlu che bel cy'iwla'ne tu'n Kman Dios ti'j tcyakil cyak'unbene ex ti'j tcyakilju cyajbile tu'n tbant. 11Cucx che tel ke xjal meba cyxole. Tu'ntzun jlu, in xi nma'ne cyeye tu'n t-xi cyk'o'ne tcyakilju at tajben cye cyermaniye meba ex cye keju minti' at cye, akeju ate' tuj cytanmiye. 12Ka at jun cyermaniye ax aj Hebrey ma tzaj tc'ayin tib cyeye tu'n toc te cymajene, ka xinak ex ka xu'j, o'cx kak abk'i c'ajbel cyeye; atzun tuj twukin abk'i cxel cytzokpi'ne. 13Octzun tex tuj cyjaye, mi'n tz'ex cytzokpi'ne nok cucx minti' ch'in k'i'n tu'n, 14nok o'cx cyk'onxe talun cyxol ke alumaj ate' cyuc'ile, tuc'ix triw ex ta'l twitz uva; cxel cyk'o'ne ch'in te ti'j cyk'inumable, ic tza'nx otok tzaj tk'o'n Kman Dios cyeye. 15Mi'n tzic' tna'l cyu'ne, ax icx cyeye o che tene te majen tuj Ejipt, ex tu'n Kman Dios e etz colpi'ne. Tu'ntzunju in xi nma'ne jlu cyeye ja'lo. 16Katzun ma tma cymajene cyja': Mlay cyaj ncolina porque at nc'u'je ti'ja ex cyi'j keju ate' tuj tjaya, ex tu'nju ba'na wi'je, ka chi, 17ctzajeltzun cyi'ne jun bak tz'u'p twi', cpol cylak'ba'ne t-ẍcyin majen ttzi tpwertil cyjaye, ex c'elex cyk'o'ne toy'; atzun jun yec'bil tu'n toc te cymajene te jumajx, ka xinak ex ka xu'j. 18Oc t-xi cytzokpi'ne cymajene, mi'n tz'oc jlu cyuw te cyeye, porque kak abk'i otok ak'nan cyuc'ile ex aju otok txi cyk'o'ne te, nok mij ic tza'n twi tc'u'j ak'nal; ex che bel cy'iwla'ne tu'n Kman Dios ti'j tcyakilju cbantel cyu'ne. 19Cyk'onxe te Kman Dios cycyakil ke cynejel cyal cywacẍe ex cynejel cyal cyẍne'le, akeju tman ke. Mi'n che oc cyk'o'ne te ak'nal ke cynejel cyal cywacẍe, akeju tor ke, ex mi'n tz'el cymatzo'ne cylan ke cynejel cyal cyẍne'le, akeju tman ke. 20Teyle te junjun abk'i che chyo'le cyi'j twitz Kman Dios, junx cyuc'il keju ate' tuj cyjaye, tuj lugar otok jaw t-sc'o'n Kman. 21Katzun at tpaltil, ka cox, ka moẍ ex ka at juntl tpaltil, mi'ntzun txi cyk'o'ne te jun chojbil te Kman Dios. 22A jlu cxel cychyo'ne tuj tnam jatum najl keye, ex cycyakile ba'n tu'n cychyo'ne ti'j, ka tz'il keye ex ka sak keye ic tza'n in tma'n ley, ba'n t-xi cychyo'ne ic tza'n in xi chyo't masat. 23Atzunju tchc'el alumaj, mi'n txi cychyo'ne, ax cbel cyko'ne twitz tx'otx' ic tza'n a'.

will be added

X\