DEUTERONOMIO 14

1Tc'wa'l Kman Dios keye. Mi'n baj cykesine cyximlale, ex mi'n tz'el cymatzo'ne ttzmal cywi'ye tibaj cywitze tu'n tlaj otok cyim jun xjal, 2porque jun tnam xjan keye te Kman Dios; ate jaw sc'onte cyeye cyxol cycyakil xjal twitz tx'otx' tu'ntzun cyoque te jun c'loj xjal etzan tu'n. 3Mi'n txi cychyo'ne jun txcup tz'il, aju mayo'n tu'n ley. 4Atzun ke txcup lu ba'n tu'n cyxi cychyo'ne: Wacẍ, ẍne'l, chip, 5cyuc'ix cycyakil wik masat atzun cybi jlu: Ciervo, gacela, gamo, corzo, íbice ex antílope, ex chip ex ẍne'l te tjak' c'ul. 6Ba'n tu'n cyxi cychyo'ne cycyakil ke txcup ba'n che coc'san cywa ex pa'n tten t-xol t-xpac'il cykan. 7Pero mi'n che'x cychyo'ne ke txcup lu: Chej camey, ẍic ex cwatusa; masque in baj cycoc'sa'n cywa, pero mya pa'n tten t-xol t-xpac'il cykan; ake jlu che oquel cyk'o'ne te tz'il. 8Ax icx ke boch, masque pa'n tten t-xol t-xpac'il cykan, pero minti' in baj cycoc'san cywa; a jlu c'oquel cyk'o'ne te tz'il. Mi'n txi cychyo'ne cychibjal ke txcup lu, ex mi'n tz'oc cymaco'ne cyximlal ka otok che cyim. 9Cyxol ke txcup najl tuj a', ba'n tu'n cyxi cychyo'ne keju at cyk'ab ex at tpwakil cyi'j, 10pero mi'n che'x cychyo'ne keju minti' cyk'ab ex minti' tpwakil cyi'j; ake jlu che oquel cyk'o'ne te tz'il. 11Ba'n tu'n t-xi cychyo'ne tcyakil txcaj chyu'j akeju sak, 12o'cxcu ke jlu mi'n che'x cychyo'ne: t'iw, buchil bak, juntl wik t'iw at ttzi mar, 13milano, tcyakil txcaj halcón, 14tcyakil txcaj joj, 15avestrúz, xitx', gaviota, tcyakil txcaj k'anjan, 16tol, ibis, cisne, 17pelícano, c'utz, somormujo, 18tcyakil txcaj garza, abubilla ex sotz'. 19Ke tal jil at cyxic', che oquel cyk'o'ne te tz'il ex mi'n che'x cychyo'ne, 20pero ke chyu'j sak, ba'n tu'n cyxi cychyo'ne. 21Mi'n txi cychyo'ne jun txcup tajx cymel, tu'nju akeye jun c'loj xjal pa'maj tu'n Kman Dios; atzun ke stranjer xjal najl cyuj cytanmiye ba'n tu'n t-xi cychyo'n, ex ka ba'n tu'n t-xi cyc'ayine cye betin xjal. Mi'n jax cytxco'ne tal chip tujx ta'l tim ttxu'. 22Teyle junjun abk'i il ti'j tu'n tel cypa'ne tlaji'n ti'j tcyakil twitz cyawale cjawil cychmo'ne. 23Cxel cywa'ne tlaji'n c'elel cypa'ne ti'j cytriwoye, ti'j ta'l twitz cy-uvaye ex ti'j cychi'ye aseyt, cyuc'ix cyi'j ke tnejel cyal cywacẍe ex ke tnejel cyal cyẍne'le; che xel cywa'ne twitz Kman Dios tuj lugar cjawil t-sc'o'n te nabl tbi, tu'ntzun tbant cynimane te Kman te jumajx. 24Oc cycub cy'iwla'ne tu'n Kman, ka najchak tu'n t-xi cyi'ne aju tlaji'n otok tz'el cypa'ne, tu'nju najchak najl keye ti'j lugar otok jaw t-sc'o'n Kman te nabl tbi, 25cyc'ayinxe aju tlaji'n, atzun twi' cxel cyi'ne tuj lugar otok jaw t-sc'o'n Kman. 26Aju pwak lu c'ajbel cyeye tu'n tjaw cylak'o'ne ma chixin nok alcye cyajbile: Ka wacẍ, ka ẍne'l, ka ta'l twitz uva ex ka nok alcyexcu c'abj tx'amsamaj. Atzun cxel cywa'ne twitz Kman Dios nok alcye cyajbile, ex cbantel jun nink'ij cyu'ne junx cyuc'il keju ate' tuj cyjaye. 27Mi'n tz'ic cyna'l aj Leví cyu'ne, akeju najl ke tuj cytanmiye, porque minti' cye cytx'otx' oc cyc'ma te cyetzbil ic tza'n cyeye. 28Oc tel oxchak abk'i, c'elel cypa'ne aju tlaji'n ti'j twitz cyawale tuj abk'i lu, ex cxel cyc'u'ne cyuj ke tnam jatum ate'ye, 29tu'ntzun tajben cye aj Leví, akeju mi'n cyc'am cytx'otx' te cyetzbil ic tza'n cyeye, tuc'ix cye stranjer xjal akeju ax najl cyxole, ex tu'n tajben cye c'wa'l minti' cyman ex cytxu' ex cye meba xu'j. Ba'n tu'n cywa'n ti'j ocxi tnoj cyc'u'j wen. Cyja'tzun che bel cy'iwla'ne tu'n Kman Dios ti'j tcyakilju cbantel cyu'ne.

will be added

X\