DEUTERONOMIO 13

1Ka ma jaw jlet jun pacbal ex ka witzcy'al cyxole, ka ma tma tkanil ti'j jun señ ex ka jun binchben nim tipumal na'nxtok tbaj, 2katzun ma japun aju señ ex ka binchben nim tipumal aju otok yolin ti'j, ex ka ma tma cyeye: Ko'ke, ko lpex cyi'j junxitl dios minti' ojtzki'n cyu'ne, ex ko c'ulun cywitz, ka chi, 3mi'n txi cybi'ne tyol aju xjal lu; porque taj Kman Dios tu'n tic' twitz cyi'je, ka in cyc'ujla'ne tu'n tcyakil cyc'u'je ex tu'n tcyakil cyanmiye. 4O'cx che lpe'que ti'j Kman Dios, o'cx twitz che xobe, japunx ke tmandamyent cyu'ne, cybinxe tyol, che c'ulune twitz, ex tenx cymojbabl cyibe tuc'il. 5Aju pacbal ex ka witzcy'al lu il ti'j tu'n tcub byet, tu'nju otok tz'oc ten ocsalte cyc'u'je tu'n mi'n t-xi cynimane Kman Dios, aju etz colpinte cyeye tuj Ejipt, jatum ate'toke te majen, ex tu'nju in tma'ntok tu'n tel cypa'n cyibe ti'j be tzaj tma'n Kman Dios cyeye tu'n cybete tuj. Atzun tumel jlu tu'n tnaj aju mya ba'n otok tz'octz cyxole. 6Ka at jun termaniya, ka tcy'ajala, ka tme'jela, ka tamiwoya ex ka ax t-xu'jila aju c'ujla'n tu'na, ma k'ma'nte teya tuj ewaj cyja': Ko' c'ulul cywitz junxitl dios, ka chi, akeju dios lu minti' ojtzki'n cyu'ne mi cyu'n cymane, 7ic tza'n ke cydios mastl xjal ate' cyi'jele, akeju nikayin ate' ex keju najchak ate' tuj tcyakil part twitz tx'otx', 8mi'n txi tbi'na tyol, mi'n tzaj k'ak'an tc'u'ja ti'j, mi'n tzaj tz'e'y tc'u'ja ti'j, ex mi'n cub tewana til xjal lu, 9nok o'cx tu'n tcub tbyo'na. Aya c'oquel xonte tnejel abj ti'j xjal lu nej, ex te tibajxi c'oquel xo'n abj ti'j cyu'n cycyakil xjal. 10Xo'n oca tu'n abj tu'ntzun tcyim, porque o tajbe tu'n tel pa'na tu'n ti'j Kman Dios aju etz k'inte cyeye tuj Ejipt, jatum ate'toke te majen. 11Cyja'tzun, oc cybinte cycyakil aj Israel, tzul tchi cyi'j ex mlay cybinchatl jun il ic tza'n jlu. 12Nok tuj alcyex jun tnam ctzajel tk'o'n Kman Dios cyeye tu'n cynajane tuj, ka ma cybiye tkanil cyi'j 13junjun xjal minti' in che niman te Dios, in che baj cytzpet-sa'n ke xjal najl tuj cytanmi ex nno'c cyocsa'n cyc'u'j tu'n cyxi' c'ulul cywitz junxitl dios, ka chi, 14cbajel cykanine, cbajel cybi'ne ex cbajel cyjyo'ne wen. Katzun ma tz'el cnet ka ax toc otok tz'ocx jun mya ba'n ic'bilxix cyxole, 15cbeltzun cybyo'ne tu'n spad cycyakil xjal najl tuj tnam lu ex cycyakil alumaj; bi'x cnajel tcyakilju at tuj tnam. 16Cbajel cychmo'ne tcyakil cyk'inumabl tuj tmij plas, ex c'oqueltzun cykoptz'i'ne k'ak' ti'j k'inumabl tuc'ix tnam; cbeltzun cypatune tcyakil ic tza'n oyaj patun in cub te Kman Dios. Aju tnam lu jumajx cbajel xitj ex mlay jaw bincha'n juntl maj. 17Mi'n cyaj cyi'ne te cyeye jun ti'xti aju bi'x tu'n tnaj, tu'ntzun tchewix tk'oj Kman ex tu'n ttzaj k'ak'an tc'u'j cyi'je, tu'n ttzaj tz'e'y tc'u'j cyi'je ex tu'n tchmet nim cybaje tu'n ic tza'nx o tzaj ttziyan cye cyxe'chele. 18Cbantel jlu tu'n Kman ka ma txi cynimane tyol, ka ma che japun cycyakil ke mandamyent cyu'ne akeju ma che'x nma'ne cyeye ja'lo, ex ka ma cybinchaye aju tz'aklxix twitz.

will be added

X\