DEUTERONOMIO 12

1Atzun ke ley lu ex ke xnak'tzbil il ti'j tu'n cyjapun cyu'ne tcyakil k'ij oc cytene tuj tx'otx' aju tzaj ttziyan Kman Dios cye cyxe'chele tu'n toc te cyetzbile. 2Bi'x che bajel cyxitune te jumajx cycyakil lugar jatum in che c'ulun ke xjal cywitz cydios, akeju c'elel cyi'ne cytx'otx' tu'n toc te cyetzbile: Che bajel cyxitune ke lugar lu cywi' ke nmak witz, cywi' ke tal witz ex cyjak' ke tze' nim cyxak. 3Cyxitun cube ke cy-altar, cypa'n cube ke abj binchamaj cyu'n te cydios tu'n cyc'ulun cywitz, cypatun cube ke cydios binchamaj cyu'n ti'j tze', ex cyk'uchin baje ke tilbilal cydios; cycyakil ke jlu bi'x che najel cyu'ne, tu'ntzun mi'n cytzaj na'ntl cyu'n xjal. 4Mi'n che c'ulune twitz Kman Dios nok tuj alcyex lugar. 5Ax cyxol cablaj c'loj cyiyjile, cjawil t-sc'o'n Kman jun lugar jatum tu'n tten tnajbil ex te nabl tbi, ex tujtzunju lugar lu ba'n tu'n cyxi'ye c'ulul twitz. 6Atzun cpol cyi'ne ke alumaj tu'n cycub patit te oyaj, ke alumaj te chojbil, ke tlaji'n, ke cyoyaje yec'un in xi' twitz Kman, ke oyaj cxel cytziyane te Kman, ex ke mastl oyaj tu'n cyexe cygan cxel cyk'o'ne, ax icx ke cynejel cyal cywacẍe ex ke cynejel cyal cyẍne'le. 7Atzun che wa'le twitz Kman Dios, ex che tzalajele ti'j twitz cyak'unbene junx cyuc'il keju ate' tuj cyjaye, porque otok che cub cy'iwla'ne tu'n Kman Dios. 8Mi'n cybinchaye ic tza'n in kbincha'n ja'lo, teylex te junjun in tbincha'n aju ba'n tuj twitz, 9porque na'nx cypone tuj lugar te ojlabl tuj cyetzbile, aju ctzajel tk'o'n Kman Dios cyeye. 10Pero cyic'xlenxiye tuj nima Jordán, ex oc cynajane tuj tx'otx' aju ctzajel k'o'n te cyetzbile tu'n Kman Dios, oc t-xi cycolin aj k'oj tu'n cyk'ojin cyi'je, akeju txolin cyi'je cyu'n, ex oc cytene minti'tl xobajil cyi'je, 11cpoltzun cyi'ne tcyakilju o txi nma'ne cyeye tuj lugar cjawil t-sc'o'n Kman Dios te nabl tbi: Ke alumaj patun in che cub, ke chojbil, ke tlaji'n, ke cyoyaje yec'un in xi' twitz Kman, ex tcyakil oyaj tbanilxix cxel cytziyane te Kman, 12ex che tzalajeltzune twitz Kman Dios junx cyuc'il ke cycy'ajale ex ke cyme'jele, ke cymajene xinak ex ke cymajene xu'j, cyuc'ix ke aj Leví najl cyxole, porque mi'n tzaj k'o'n jun piẍ tx'otx' te cyetzbil ke aj Leví, ic tza'n cyeye. 13Cyk'onque cwent cyi'je tu'n mi'n tcub cypatune alumaj te cyoyaje tuj nok alcyexcu lugar; 14nok o'cx che pole k'olte cyoyaje tuj lugar cjawil t-sc'o'n Kman cyxol cablaj c'loj cyiyjile. Atzun cbantel cyu'ne tcyakilju ma txi nma'ne cyeye. 15Masque icju, pero ba'n tcub cybyo'ne alumaj ex ba'n t-xi cychyo'ne nok tuj alcyex lugar jatum najl keye, nok alcyex k'ij cyajbile ex nok alcyex ctzajel k'o'n cyeye tu'n Kman Dios. Ka tz'il keye ex ka sak keye ic tza'n in tma'n ley, ba'n tu'n t-xi cychyo'ne, ic tza'n in xi chyo't tchibjal masat. 16Atzunju tchc'el mi'n txi cychyo'ne, ax cbel cyko'ne twitz tx'otx' ic tza'n a'. 17Mi'n txi cywa'ne cyuj ke cytanmiye aju tlaji'n ti'j twitz cytriwoye, mi'n txi cyc'a'ne aju tlaji'n ti'j ta'l twitz cy-uvaye, ex mi'n txi cychyo'ne aju tlaji'n ti'j cychi'ye aseyt, mi ke cynejel cyal cywacẍe, mi ke cynejel cyal cyẍne'le, mi ke oyaj in che'x cytziyane te Kman, mi ke mastl oyaj tu'n cyexe cygan in che'x cyk'o'ne. 18Che nic'bele cyi'j jlu twitz Kman Dios tuj lugar cjawil t-sc'o'n cyxole. Cycyakile che wa'le, che c'a'le ex che chyo'le cyi'j, cyuc'il ke cycy'ajale, ke cyme'jele, ke cymajene xinak, ke cymajene xu'j ex ke aj Leví najl ke cyxole. Junx che tzalajele cycyakile twitz Kman Dios ti'j cyak'unbene. 19Nok jte'x k'ij che tele twitz tx'otx', mi'n tzic' cyna'l ke aj Leví cyu'ne. 20Octzun tel lak'e' cytx'otx'e tu'n Kman Dios ic tza'nx o tzaj ttziyan cyeye, ka ma tzaj tkanin cyc'u'je chibj, ba'n t-xi cychyo'ne nok alcyex k'ij cyajbile. 21Katzun najchak ate'ye ti'j lugar otok jaw t-sc'o'n Kman Dios te nabl tbi, ba'n tu'n tcub cybyo'ne wacẍ te cychi'ye ex ka ẍne'l aju o tzaj tk'o'n cyeye, ex ba'n tu'n cychyo'ne ti'j tcyakil nok alcye cyajbile tuj lugar jatum najl keye, ic tza'nx ma txi nma'ne cyeye. 22Ic tza'n in xi cychyo'ne tchibjal masat, ax icx ba'n tu'n cychyo'ne cychibjal alumaj, ka tz'il keye ex ka sak keye ic tza'n in tma'n ley. 23Pero cyk'onque cwent cyi'je tu'n mi'n t-xi cychyo'ne chic', porque tuj tchc'el alumaj ta' tchwinklal; cyja'tzun mi'n txi cychyo'ne tchwinklal alumaj junx tuc'il tchibjal. 24Mi'n txi cychyo'ne chic', cucx cbel cyko'ne twitz tx'otx' ic tza'n a'. 25Mi'n txi cychyo'ne, tu'ntzun cytene ba'n cyuc'ix ke cyc'wa'le che ul itz'j te tibajxi; che tele ba'n ka ma bant cyu'ne aju ba'n tuj twitz Kman. 26Atzun ke cyoyaje pa'maj cyu'ne tu'n cyxi cyk'o'ne te Kman, ex akeju otok che'x cytziyane tu'n cyxi cyk'o'ne te, atzun che pol cyi'ne tuj lugar cjawil t-sc'o'n Kman, 27ex atzun tibaj t-altar Kman Dios che xel cyk'o'ne ke cyoyaje patun in che cub tuc'ix cychc'el. Atzun cychc'el mastl chojbil in xi cyk'o'ne, c'oquel cyko'ne ti'jele t-altar, ex atzun tchibjal ba'n tu'n t-xi cychyo'ne. 28Cybinxe ex japunx cyu'ne aju ma txi nma'ne cyeye, tu'ntzun cytene ba'n te jumajx cyuc'ix ke cyc'wa'le che ul itz'j te tibajxi; che tele ba'n ka ma bant cyu'ne aju in tzalaj Kman Dios ti'j ex aju ba'n tuj twitz. 29Oc cybaj naj ke nasyon tu'n Kman Dios cywitze jatum che pole tu'n cyoque tajwil cytx'otx', oc tel cyetzane cytx'otx' ex oc cynajane tuj, 30ten cycwente cyi'je tu'n mi'n cyoc lpe'ye cyi'j cybinchben ke nasyon lu tcublenxi cyi'j cyu'ne, ex mi'n cub cyximane tu'n cyxi'ye c'ulul cywitz cydios ic tza'n cye in bant cyu'n. 31Mi'n che c'ulune twitz Kman Dios ic tza'n cye in cybincha'n cywitz cydios, porque ic'bilxix tuj twitz Kman aju cye in cybincha'n cywitz cydios; ajunlpe cycy'ajal ex cyme'jel in cub cypatun te cyoyaj cywitz cydios. 32Tz'oc tililxix cyu'ne tu'n tjapun tcyakilju ma txi nma'ne cyeye; mi'n tz'oc cyk'o'ne juntl yol ti'j, ex mi'n tz'el cyi'ne jun yol ti'j.

will be added

X\