1 Cyc'ujlame Kman Dios ex che japunx ke t-xnak'tzbil cyu'ne, cyuc'ix ke tley, ke tcawbil ex ke tmandamyent. 2 Tz'elx cynic'e ti'j ja'lo tza'n tten e cub cawine tu'n Kman Dios. Mya cyuc'il cyc'wa'le in chin yoline, akeju minti' ba'n cyu'n ex minti' o cyil tajwalil Kman ex tipumal ma'xix, 3 ke señ, ke binchben nim cyipumal e bant tu'n tuj Ejipt ti'j Faraón ex cyi'j ke t-xjalil, 4 aju tbincha cyi'j ke soldad aj Ejipt, cyi'j ke cychej ex ke cycarwaj in che ajben tuj k'oj, ex tza'n tten e aj mulk'aj tu'n tuj mar Cyak Que'yin tej cytzaj lpe' cyi'je. Ate Kman o cub xitunte cye te jumajx. 5 Ax icx cyna'ntze tcyakilju o tbincha cyi'je tuj tzkij tx'otx' tejxi cyule tzalu; 6 aju tbincha cyi'j Datán ex Abiram akeju tcy'ajal Eliab ex tiyjil Rubén, tej tel c'abchaj tx'otx' ex e cu'x tz'ak junx cyuc'il cycyakil ate' tuj cyja, cyuc'ix ke cyja xbalun ex cycyakil cyalun, ex cywitz cycyakil aj Israel o bant jlu. 7 Ax keye testiw cyi'j ke binchben nim cyipumal o bant tu'n Kman. 8 Japunx cyu'ne cycyakil ke mandamyent ma che'x nma'ne cyeye ja'lo, tu'ntzun tten cyipune oc cyocxe c'molte aju tx'otx' ctzyetel cyu'ne, 9 ex tu'n cyank'ine nim abk'i tuj tx'otx' lu, aju o tzaj ttziyan Kman tu'n ttzaj tk'o'n cye cyxe'chele ex cye cyiyjil che ul itz'j te tibajxi; aju tx'otx' lu k'inunxix ex tbanilxix. 10 Aju tx'otx' ctzyetel cyu'ne mya junx ta' ic tza'n tx'otx' Ejipt jatum o che etze; jatum in cu'x cyawa'ntoke iyaj ex a'lin nno'c cyu'ne tu'n toma, ic tza'n nno'c a'lit txkan itzaj. 11 Atzunju tx'otx' che oquele te tajwil, at tiwitz tx'otx', at chk'ajlaj ttzi a', ex in a'linjtz tu'n jbal in tzaj twitz cya'j. 12 Aju tx'otx' lu, twitzelcu Kman in cwentin ti'j, ex ax toc twitz ti'j tuj tcyakil abk'i. 13 Ka ma che japun ke mandamyent cyu'ne, akeju ma che'x nma'ne cyeye ja'lo, ka ma cyc'ujlaye Kman Dios, ex ka ma che ajbene te tu'n tcyakil cyanmiye ex tu'n tcyakil cyc'u'je, 14 ctzajeltzun tk'o'n Dios jbal tibaj cytx'otx'e tujxix tk'ijlalil, aju jbal in tzaj ttzi jbalil ex aju jbal in tzaj oc tjaw jbalil, tu'ntzun tjaw cychmo'ne triw, ex tu'n tten ta'l twitz uva cyuc'ile, tuc'ix chibj aseyt. 15 Ax icx ctzajel ch'iy c'ul tu'n tuj cojbil, tu'n cywa'n ke cywacẍe. Che wa'ltzune ex cnojel cyc'u'je. 16 Pero ten cycwente cyi'je tu'n mi'n cycub sbu'ne; mi'n tz'el cypa'n cyibe ti'j Kman, mi'n che ajbene cye junxitl dios, ex mi'n che cub ẍmeje'ye cywitz, 17 porque ka ma cybinchaye jlu, ctzajel tk'oj Kman cyi'je ex mi'n tzaj t-sama'ntl jbal cyibaje, mlay tzaj tk'o'ntl tx'otx' twitz cyawale, ex jurat che najele tuj tbanil tx'otx' aju ctzajel tk'o'n Kman cyeye. 18 Cyja'tzun, cyc'unxe ke yol lu tuj cyanmiye; cyc'alonque cyi'j cyk'abe ex tibaj cywitze te jun techal; 19 cyxnak'tzanxe cye cyc'wa'le, ex cyna'ntze ke yol lu tuj cyjaye ex tuj cybeye, ax icx oc cyxi'ye tal ex oc cyjaw we'ye. 20 Ax icx cytz'iban oque cyi'j tlamel cyjaye ex cyi'j tmarquil, 21 tu'ntzun ttzaj tk'o'n mastl cyank'ible ex cyank'ibl cyc'wa'le tuj tx'otx' tzaj ttziyan Kman cye cyxe'chele; ex cucx tu'n tten cyank'ible, ic tza'n cya'j cucx tten te jumajx tibaj tx'otx'. 22 Katzun ma txi cynimane ex ka ma japun cycyakil ke mandamyent cyu'ne, akeju ma che'x nma'ne cyeye, ka ma cyc'ujlaye Kman Dios, ka ma che oc lpe'ye ti'j ex ka ma che bete tuj tumelxix tuj twitz, 23 che elextzun tlajo'n Kman cycyakil ke nasyon lu cywitze, atzun cyeye cbel cyi'j cyu'ne ke nasyon mas nim cybet ex at mas cyipun cywitze. 24 Cycyakil lugar jatum cbel aj cykane c'oquel te cyeye. Aju tmojonil cytx'otx'e cxel ke' tuj tzkij tx'otx' ex cpol baj max jatum ta' witz Líbano, cxel ke'tl ttzi nima Éufrates ex cpol baj max ttzi Nintz Mar. 25 Mi a'l jun jacu cub twaban tib cywitze. Tu'n Dios ctzajel cyxobil xjal cywitze, ex ctzajel cychiye cyi'j tuj tcyakil twitz tx'otx' aju cbajel cybetine, ic tza'nx o tzaj ttziyan. 26 Ja'lo, ba'n tu'n tjaw cysc'o'ne alcye cyajbile; ka tu'n cycub cy'iwla'ne ex ka tu'n ttzaj castiw cyibaje. 27 Ka ma che'x cynimane ke tmandamyent Kman Dios, akeju ma che'x nma'ne cyeye ja'lo, oc cyc'ma'ye cy'iwbil. 28 Katzun ma che'x lpe'ye cyi'j ke dios minti' ojtzki'n cyu'ne, ka minti' ma che'x cynimane ke tmandamyent Kman Dios, ex ka ma tz'el cypa'n cyibe ti'j tbe aju ma txi nma'ne cyeye ja'lo, ctzajeltzun castiw cyibaje. 29 Octzun cyocx k'o'ne tu'n Kman Dios tuj tx'otx' ctzyetel cyu'ne, cxel cyma'ne ke yol te cy'iwbil twi witz Gerizim, atzun twi witz Ebal cxel cyma'ne ke yol tu'n ttzaj castiw. 30 Akeju witz lu ate' ke max jlajxi nima Jordán, ti'jxi be in xi' tuj telex k'ij tuj cytx'otx' aj Canaán akeju najl ke tuj chk'ajlaj, ex cycub tumlal twitz tnam Gilgal, nikayin jatum ate' ke tze' c'ol tuj lugar More. 31 Atzun cyeye ch'ix cyic'xe tuj nima Jordán, tu'n ttzyet tx'otx' cyu'ne aju ctzajel k'o'n cyeye tu'n Kman Dios. Octzun ttzyet tx'otx' cyu'ne ex oc cynajane tuj, 32 ten cycwente cyi'je tu'n cyjapun cycyakil ke ley ex ke xnak'tzbil cyu'ne, akeju ma che'x nma'ne cyeye ja'lo.
