DEUTERONOMIO 1

1Atzun ke yol lu xi tma'n Moisés cye cycyakil aj Israel tej cyten tuj tzkij tx'otx' tuj tumlal tjawitz k'ij te nima Jordán, tuj tx'otx' Arabá. Atzun ta' lugar lu twitz Suf, cyxol ke tnam Parán, Tofel, Labán, Hazerot ex Dizahab. 2Tu'n ktzaj t-xe witz Horeb tu'n kul tuj Cades-barnea, junlaj k'ij be ka ma ko tzaj tuj be tuj tiwitz tx'otx' Seir. 3O yolin Moisés cyuc'il aj Israel tuj tnejel k'ij te tjunlajin xjaw, tbajlenxi 40 abk'i cyetzlen tuj Ejipt, ex xi tma'n cye alcye tu'n cybinchante ic tza'nx otok tzaj k'ma'n te tu'n Kman. 4Atzun jlu o baj tcublenxi ti'j Sehón aju rey cye aj Amorrey, aju najl tuj tnam Hesbón, ex tcublenxi ti'j Og aju rey tuj tx'otx' Basán, aju najl tuj tnam Astarot ex tuj tnam Edrei. 5Atzun cub ten Moisés chic'balte ley lu tuj tumlal tjawitz k'ij te nima Jordán tuj tx'otx' Moab, ex tma: 6—T-xe witz Horeb o tzaj tma'n Kman Dios ke cyja': Ma bet-xi k'ij ma che tene t-xe witz lu. 7Cybincham cytene ex cyxi'ye tuj tiwitz tx'otx' cye aj Amorrey ex cyuj ke tx'otx' nikayin ate' ttxlaj: tuj tx'otx' Arabá cyxol witz ex t-xe witz, ex tuj tx'otx' Néguev, ax icx tuj tx'otx' ttzi Nintz mar aju cytanmi aj Canaán, ax icx tuj Líbano, ocxi cypon baje max ttzi nima Éufrates. 8O txi nk'o'ne tx'otx' lu te cyeye; cyxi'ye ex cyoque tajwil, porque tziyimaj wu'ne cye cyxe'chele: te Abraham, te Isaac, te Jacob, ex cye cyiyjil che ul itz'j te tibajxi, chi Kman, chi Moisés. 9Ax tuj tk'ijlalil lu o txi nma'ne cyeye cyja': Mlayx bant tu'n cycyaj tene tuj ncwente njunalxe. 10Nimcu cyc'wa'le o tzaj tk'o'n Kman Dios, ja'lo ma chmet cybaje, ic tten cyajlale ic tza'n ke che'w twitz cya'j. 11Chmet-xwit nimxix cyajlale tu'n Kman aju Cydios cyxe'chele, ex che cubxwit cy'iwla'ne tu'n ic tza'nx o tzaj ttziyan. 12Ka o'cx kine, ¿tza'n tten tu'n tc'isj tcyakil iktz wu'ne, tu'n t-xi nbincha'ne cyi'je ti'j tcyakil mya ba'n in tzaj cyxole, cyuc'ix ke k'oj? 13Cyja'tzun xi nma'ne cyeye: Cysc'o'n jawe cyxol cycyakil c'loj cyiyjile, junjun xinak at cynabl, at cysec'al ex at cyojtzkibl, tu'ntzun cyoc nk'o'ne te nejenel cyxole. 14Atzun cyeye tzaj cytzak'we'ne weye: Ba'n ma tz'ela tuj kwitze tu'n tbant aju ma tzaj tma'na. 15Tzajtzun wi'ne junjun xinak cyxole, akeju at nimxix cynabl ex at cyojtzkibl, ex xi nk'o'ne cyoclen tu'n cycawin cyibaje. At junjun xi nk'o'ne mil xjal tuj tcwent, junjuntl 100; junjuntl 50; ex at junjuntl xi nk'o'ne laj xjal tuj tcwent; ax icx at junjuntl e jo'c nk'o'ne te cawil cyibaj junjun c'loj cyeye. 16Tujx tk'ijlalil lu xi nma'ne cye jwes cyja': Cybinxe cyyol cycyakil ex cybinchanxe cyi'j tuj tumelxix, tza'nx cyi'j ke cyxjalile ax icx cyi'j ke stranjer xjal ate' cyxole. 17Oc cyoc xjal tuj xtis cyu'ne, mi'n tz'oc cyk'o'ne cywitze ti'j ju cyxilen; nok o'cx cybinchanxe cyi'j cycyakil, ka ch'in cyoclen ex ka ma'. Mi jun tu'n cyxobe cywitz, porque te te Dios aju cawbil. Katzun at jun ma pon cyuc'ile ex mlay bant ti'j cyu'ne, cysamantze wuc'ile, jacutzun txi nbincha'ne ti'j tzalu, nchiye cye. 18Tujx tk'ijlalil lu xi nma'ne cyeye tcyakil alcye tu'n cybinchanteye. 19Tejtzun ketz tuj Horeb, atzun o ko tzaj tuj be in xi' cyuj tiwitz tx'otx' cye aj Amorrey ic tza'n tzaj tma'n Kman Dios ke. Baj kbetin tcyakil tzkij tx'otx' ma'xix ex xobajilxix ic tza'n o cyile, max tejxi kul tuj lugar Cades-barnea. 20Xitzun nma'ne cyeye cyja': Ma ko ul ttxa'n tiwitz tx'otx' cye aj Amorrey, aju ctzajel tk'o'n Kman Dios ke. 21Ctzajel tk'o'n Kman Dios aju tx'otx' lu te ke. Chux keye, cytzyume ic tza'nx o tma Kman aju Cydios cyxe'chele. Mi'n che xobe ex mi'n baj cyc'u'je. 22Atzun cyeye tzaj cyma'ne weye cyja': Maslo ba'n atwit junjun ke ẍe'x nej que'yilte tx'otx', ex tu'n cyul k'malte ke alcye be tu'n t-xi ki'n, ex alcye ke tnam tu'n kocx cyuj. 23Ba'n ela tuj nwitze aju tzaj cyma'ne weye, ex jaw nsc'o'ne cablaj xinak cyxole, jun cyxol junjun c'loj cyiyjile. 24Cubtzun be cyu'n, e jax tuj tiwitz tx'otx' tejxi cypon tuj chk'ajlaj Escol, ex baj cybetin tcyakil tx'otx'. 25Tzaj cyi'n junjun twitz awal at tuj tx'otx' lu, ex tej cyul meltz'aj tzaj cyma'n cyja': Tbanilxix aju tx'otx' ctzajel k'o'n ke tu'n Kman Dios, che chi. 26Atzun cyeye, minti' cub tuj cywitze tu'n cyxi'ye c'molte te, minti' xi cynimane aju otok tzaj tma'n Kman Dios, 27e jaw wululune tuj cyjaye ex o cymaye cyja': Minti'tl taj Kman ki'j ja'lo; o ko etz ti'n tuj Ejipt nok tu'n kxi tk'o'n tuj cyk'ab aj Amorrey ex tu'n kcub baj cyu'n. 28¿Jatum ko xe'l clol kib ja'lo? Porque ke xjal ate' ma chixin mas nim cyipun ex mas matij cywa'l kwitz, ex ma' cywa'l ke muro cyoc cyi'j cytanmi. Ax icx ma kile ke tiyjil Anac ma' cywa'l, che chi. Tu'n tlaj tcyakil jlu, bi'x ma tzaj baj kc'u'je, che chiye. 29Atzun weye xi nma'ne cyeye: Mi'n tzaj baj cyc'u'je ex mi'n che xobe cywitz. 30Ate Kman Dios cbel nej cywitze, ex a c'oquel ten k'ojlel te cyxele ic tza'n o cyile aju o tbincha tuj Ejipt 31ex tuj tzkij tx'otx'. A Kman Dios tzaj ẍaklunte cyeye tuj tcyakil be jatum o che bete tejxi cyule tuj lugar lu, ic tza'n jun mambaj ẍaklu'n tc'wa'l tu'n. 32Masque icju, pero minti' oc ke' cyc'u'je ti'j Cymane aju Cydiose; 33aju cub nej cywitze tuj be tu'n tjaw t-sc'o'n aju lugar jatum tu'n cycub tene. Te konic'an tzaj tyec'un cybeye tu'n tkan k'ak', atzun k'ijl tzaj tyec'un cybeye tu'n muj. 34Tej tbinte Kman aju cyyole tej cyjaw wululune, tzaj nim tk'oj cyi'je ex tma jun tyol axix toc cyja': 35Cyxol ke xjal mya ba'n lu, mi jun oc tila' aju tbanil tx'otx' xi ntziyane cye cyxe'chel; 36o'cx Caleb aju tcy'ajal Jefone oc tila'; ex cxel nk'o'ne te ex cye tiyjil aju tx'otx' o baj tbetin tuj, tu'nju o bet tz'aklxix nwitze, chi Kman. 37Nok tu'n cyeye cylaj jaw k'ojl Kman wi'je, ex tzaj tma'n weye cyja': Ax icx teya mlay tz'ocxa tuj tx'otx' lu; 38aju c'oquex, atzun Josué aju tcy'ajal Nun ex onil teya. Cyuwsanxa tc'u'j, porque atzun cxel sipante cytx'otx' aj Israel. 39Atzun ke cyc'wa'le, akeju na'nx tel cynic' ti'j alcye ba'n ex alcye mya ba'n, akeju o cymaye cyi'j ka tu'n cyxi k'i'n cyu'n ke aj k'oj cyi'je, alpe ke che oquex tuj tx'otx' lu; wu'ne cxel nk'o'ne cye tu'n cyoc te tajwil. 40Atzun cyeye, cyaj meltz'aje juntl maj tuj tzkij tx'otx', ex cyxi'ye juntl maj jatum ta' mar Cyak Que'yin, chi Dios. 41Tzajtzun cytzak'we'ne: Ma ko binchane il twitz Kman, atzun ja'lo ko xe'le k'ojlel ic tza'nx o tma Kman Dios keye, che chiye. Xitzun cyi'ne ke cymacbile in che ajben tuj k'oj; tuj cywitze mya cwest tu'n cyjaxe cyuj ke tiwitz tx'otx'. 42Atzunte Kman tzaj tma'n weye cyja': K'manxa cye tu'n mi'n cyxi' k'ojlel, tu'ntzun mi'n tcub cyi'j cyu'n ke aj k'oj cyi'j, porque mi a'l kine cyuc'il. 43Xitzun nma'ne cyeye tu'n mi'n cyxi'ye, pero minti' xi cybi'ne ex minti' xi cynimane aju tzaj tma'n Kman; e jaxe cyuj ke tiwitz tx'otx' tuc'il cynimbil cyibe. 44E je'tztzun ke aj Amorrey k'ojlel cyi'je, akeju najl cyuj tiwitz tx'otx'; e jo'c lpe' cyi'je ic tza'n in cybincha'n ttxu ak, ex e cube cyu'n, xi'x ke' tuj Seir ex pon baj tuj tx'otx' Horma. 45Tejtzun cyul meltz'aje, e jaw ok'e twitz Kman pero minti' tzaj tbi'n tk'ajk'ajel cywi'ye, ex minti' tzaj tk'o'n twi' cyi'je. 46Cyja'tzun, ax e cyaj tene najal nimcu k'ij tuj tx'otx' Cades.

will be added

X\