DANIEL 7

1Tuj tnejel abk'i ttzyetlen tcawin Belsasar tuj Babilonia, tej coẍltok Daniel twi twatbil, oc jun twitzic' ex tzaj yec'un nimcu te ic tza'n tuj witzic', ex cub ttz'iban aju mas il ti'j otok til, chi cyja': 2Tuj nwitzic'e ma wile aju cyaje cyk'ik' in che xupin ex in pulwin nintz mar cyu'n. 3Ex minaben o wile cyaje nintz txcup, part che que'yin, e jatz tuj mar. 4Aju tnejel txcup ic que'yin ic tza'n jun balun, pero at t-xic' ic tza'n t-xic' t'iw. Matok in chin que'yine ti'j tej ẍe el bako'n ke t-xic', jaw waban, o'cx ke tkan, e cub wale' twitz tx'otx' ic tza'n jun xjal, ex oc tnabl ic tza'n tnabl jun xjal. 5Aju tcabin txcup ic que'yin ic tza'n jun oso; jun pac' ttxlaj mas ma' tjaw twitz juntl, ex jacun ox tbakil xu'cbaj tu'n, ex o nbiye tej t-xi k'ma'n te: We'ctza ex chyo'na ti'j chibj nok nic'punx jacu baj tu'na. 6Aju toxin txcup ic que'yin ic tza'n jun tigre, pero at cyaje t-xic' ttzal ti'j; ax icx o wile at cyaje twi', ex xi k'o'n toclen tu'n tcawin. 7Aju tcyajin txcup o wile ic tza'n tuj witzic' nno'c konic'an, puro xobajilxix, at nim tchiylal ex nim tipun wen. Matijxix ke twitz te' ex puro c'uxbil ke; tcyakil in baj tpach'u'n, tcyakil in baj tchyo'n ex ke ttx'akan in che baj tbetz'an tu'n tkan. Aju txcup lu at laj tcach toc ti'j twi' ex junxitl que'yin cywitz keju otok che wile nej tuj nwitzic'e. 8Matok in chin que'yine cyi'j ke tcach, tej twile tzaj ch'iy juntl tcach mas ch'in cyxol mastl. Entons e jatz bako'n ox tcach, tu'ntzun tbant tten aju otok tzaj ch'iy te tibajxi. Aju tal cach lu at tbak' twitz ic tza'n tbak' twitz jun xjal, at ttzi' ic tza'n ttzi' xjal ex in jaw tniman tib tu'n tyol. 9Cucxtok in chin que'yine ti'j tejxi cycub k'o'n junjun k'ukbil te cawbil ex cub ke' jun Tij Xjal tibaj jun. Aju t-xbalun toc, puro sak que'yin ic tza'n ttxa che'w, ex aju ttzmal twi' ic que'yin ic tza'n sak lan tx'jomaj wen. Aju tk'ukbil ic que'yin ic tza'n tkan k'ak', atzun ke t-rwedil ic che que'yin ic tza'n k'ak' in c'ant wen, 10ex twitz nne'tz jlet jun nima ic tza'n k'ak'. Ela' mil xjal in che ajben te, ex ela' miyón wa'lketok twitz. Cubtzun ke' jwes tu'n ttzyet tu'n tcub cysentens ke xjal tu'n, ex e jaket ke libro. 11In chin que'yintoke ex in chin ximantoke ti'j ju yol te nimbil tib in tma'ntok cach mas ch'in. Tej matok in chin que'yine ti'j, cub byo'n nintz txcup, baj paẍu'n ex ocx k'o'n tuj k'ak' tu'n tbaj tz'e'y. 12Ax icx ke mastl txcup el k'i'n cyoclen, pero e cyaj k'o'n tu'n cyank'in ch'intl ex maxi tu'n cynaj oc tpon or cye. 13Cucxtok in chin que'yine ti'j jlu, mer ic tza'n tuj witzic' nno'c konic'an, ex minaben o wile cyja' ttzaj jun tuj muj, ic que'yin ic tza'n jun xjal, xi' jatum ta'tok Tij Xjal ex pon lak'ba'n nikayin twitz. 14Tetzun jlu xi k'o'n ipumalj, ajwalil ex cawbil, ex cycyakil xjal cyuj cycyakil nasyon ex cycyakil xjal junxitlchak cyyol in che ajbentok te. Aju tipumal ex tcawbil cucx ctel te jumajx, mlay ch'expaj ex mlay cub xitun. 15Akine Daniel bi'x naj nnable ex bi'x in jaw sec'paje ti'j ju otok wile. 16In pon lak'e'ye ttxlaj jun ajbel wa'ltok tcub, ex xi nkanine te tu'n ttzaj tchic'ba'n tcyakilju otok wile. Tzajtzun tchic'ba'n weye ex tma: 17Akeju cyaje txcup lu, atzun ke cyaje rey che cawil twitz tx'otx'. 18Pero te tibajxi, aju cawbil cxel k'o'n cye ke xjal etzan tu'n Dios ma'xix toclen, ex atzun ke jlu che cawil tuj tcyakil tabk'iyil te jumajx. 19O wajbeye tu'n nbinteye ti t-xilen aju tcyajin txcup, porque junxitl que'yin cywitz mastl ex aju tilbilal puro xobajilxix, ke twitz te' puro c'uxbil ke ex ke tpas tk'ab puro k'an c'uxbil ke, tcyakil in baj tpaẍu'n ex in baj tchyo'n; atzun ke ttx'akan in che baj tbetz'an tu'n tkan. 20Ax icx o wajbeye tu'n nbinteye cyi'j laj tcach, ex ti'j tal tcach mas ch'in, aju at tbak' twitz ex at ttzi' ex in jaw tniman tib tu'n tyol, ex mer ic tza'n mas ma' toclen cywitz mastl cach, porque otok che el k'i'n ox cach tu'ntzun tbant tten. 21Entons o wile, oc ten tal cach lu k'ojlel cyi'j ke xjal etzan tu'n Dios ex cub cyi'j tu'n, 22max tejxi tpon Tij Xjal, ex xi tbincha'n cyi'j tu'n cyclet ke xjal etzan tu'n Dios ma'xix toclen, porque otok pon tk'ijlalil tu'n ttzyet cycawin ke xjal etzan tu'n. 23Ax icx tzaj tma'n weye: Aju tcyajin txcup, atzun tcyajin cawbil ctel twitz tx'otx' ex junxitl tnabl cywitz ke mastl cawbil. Cbel cyi'j cycyakil xjal twitz tx'otx' tu'n, che bajel tbetz'an tjak' tkan ex che bajel tpaẍu'n. 24Akeju laj cach, atzun ke laj rey che cawil tuj cawbil lu. Te cyibajxi jlu, tzul juntl rey tu'n tcawin, junxitl tnabl cywitz laj ex c'elel ti'n cyoclen ox rey cyxol ke jlu, 25c'oquel ten xmayil ti'j Dios ma'xix toclen ex c'oquel ten yajlal cye xjal etzan tu'n, cjyol tumel tu'n tch'expet tley Dios ex ke nink'ij, ex ke xjal etzan tu'n Dios che tel tjak' tcawbil tuj ox abk'i tuc' mey. 26Cbel ke' Jwes ex cbel t-sentens rey lu tu'n, c'elel ti'n toclen ex bi'x cnajel te jumajx. 27C'elel k'i'n cycawbil, cyipumal ex cyajwalil cycyakil nasyon ate' twitz tx'otx', ex cxel k'o'n cye ke xjal etzan tu'n Dios ma'xix toclen. Aju tcawbil Dios cyjel ten te jumajx, ex cycyakil xjal te twitz tx'otx' che ajbel te ex cxel cyniman tyol. 28Atzun in pon baj tx'olbabl ti'j ju o wile. Atzun weye bi'x naj nnable ex puro spelin in oque, pero minti' el tkanil wu'ne ti'j ju o wile, chi Daniel.

will be added

X\