DANIEL 6

1Jaw t-sc'o'n rey Darío jun syent tuc' winkin gobernador te onil te ex tu'n cycawin cyuj cycyakil lugar te tcawbil. 2Cyxol keju cawil lu, e jaw sc'o'n oxe xjal mas ma' cyoclen tu'n cyoc te nejenel cye mastl, tu'ntzun toc cyk'o'n cwent cyi'j ke mastl gobernador ka ba'n in che ak'nan, tu'n mi'n ttzaj jun mya ba'n ti'j rey. Ajun Daniel cyxol ke oxe lu. 3Tu'nju tojtzkibl Daniel, jurat el nic'baj ti'j ka a at mas tnabl cywitz mastl nejenel ex gobernador; tu'ntzunju o ximan rey ti'j tu'n toc k'o'n Daniel tu'n rey te nejenel tuj enter cawbil. 4Atzun ke gobernador ex ke cabetl tuc'il Daniel e oc ten jyolte tumel tu'n tcub tz'ak Daniel tuj jun til ti'j ak'untl in bant tu'n tuj tcawbil rey, pero tu'nju puro tz'aklxix te Daniel, minti'x cnet jun til cyu'n tu'n t-xi cyma'n te rey. 5Cyja'tzun o cyma: Mlay cnet jun til Daniel ku'n, nok o'cx jacu cnet til ku'n ti'j tocslabl ti'j Tdios, che chi. 6Cyja'tzun, moje' jun cyyol ke gobernador ex ke nejenel, tu'n cyxi' yolil twitz rey Darío, ex tej cypon twitz rey xi cyma'n te: —Tat Rey, ba'nwt tz'el tk'ija te jumajx. 7Ma bant ti'j ku'ne kcyakile ako'ye gobernador ex ke mastl at cyoclen tu'n cycawin cyuj ke tnam, tu'n tbant jun ley tu'na, ka tuj jun xjaw mi jun xjal tu'n tcub ten cubsal twitz juntl dios ex mi twitz juntl xinak, nok o'cx twitza, Tat Rey. Alcyetzun jun minti' ma txi tniman, il ti'j tu'n tcu'x xo't tuj cyjul balun. 8Cyja'tzun, ba'n tu'n tex tma'na ju ley lu ex k'o'nc tbiya ti'j tu'ntzun mi'n tch'expet, ic tza'nx cyley aj Media ex aj Persia minti' tumel tu'n cych'expet, che chi. 9Tu'ntzun jlu oc tk'o'n rey Darío tbi ti'j ley lu. 10Tejtzun tbinte Daniel ka otok tz'oc tbi rey ti'j ley lu, aj tja ex ocx tjako'n tventan tja tumlal tnam Jerusalén, ex ox maj junjun k'ij in cub ẍmeje' na'l Dios ex in tk'o'n chjonte te, ic tza'nx in bant tu'n nej. 11Entons akeju aj k'oj ti'j Daniel oc cychmon cyib ex e je'x que'yilte, ex o cnet Daniel cyu'n; lu in na'n Dios ex in kanin onbil te Tdios. 12Jurat naj e je'x k'malte te rey cyja': —Tat Rey, ¿Myapetzun o bant jun ley tu'na ex o tz'ex k'met cye xjal, ka tuj jun xjaw mi jun xjal tu'n tcubsan twitz jun dios ex ka twitz juntl xjal, nok o'cx twitza, ex alcyetzun jun xjal mi'n ma japun ju ley lu tu'n cbelex xo't tuj cyjul balun? ¿Myape ax toc jlu? Che chi. Xi ttzak'we'n rey: —Ax toc, aju ley lu il ti'j tu'n tjapun ic tza'nx cyley aj Media ex aj Persia ex mlay ch'expet. 13Atzun cye xi cyma'ntl te rey: —Ate Daniel, aju tzaj k'i'n junx cyuc'il mastl xjal e tzaj tuj Judá, minti' in niman teya, ax icx minti' ma txi tniman aju ley ma tz'ex k'met, porque ma ko oc noje ti'j in na'n Dios ox maj jun k'ij. 14Tej tbinte rey jlu, tzaj nimxix tbis ex o jyon tumel tu'n tclet Daniel tu'n. Tuj enter k'ij o jyon ti'j alcye tumel tu'n tclet tu'n, 15pero akeju xinak lu e pon juntl maj twitz rey ex cyma: —Tat Rey, ba'n tu'na, aju cyley aj Media ex aj Persia mlay ch'expet. Tcyakilju in mayonjtz tu'n rey, ex cycyakil ke ley toc tbi rey cyi'j, mlay tzic'x ti'j tu'n mi'n cyjapun, che chi. 16Xitzun tma'n rey tu'n ttzaj k'i'n Daniel ex tu'n tcu'x k'o'n tuj cyjul balun. Pero tej na'nxtok tcu'x k'o'n, xi tma'n rey te: —Awt ju Tdiosa, aju in ajbena te tcyakil k'ij, clonte teya, chi rey. 17Tejtzun tcu'x xo'n Daniel tuj cyjul balun, tzaj cyi'n jun abj ex cub cyk'o'n ttzi jul, atzunte rey tzaj ti'n t-sey ex oc t-seyarin ttzi jul, ax icx ke aj sanjelal ma' cyoclen tuj tcawbil oc cyseyarin ttzi jul tu'ntzun tjapun t-sentens Daniel ic tza'nx in tma'n ley otok bant ti'j. 18Ajtzun rey tja ex cub coẍe', minti' o wa'n ex minti' o tajbe tu'n cyul xjal k'ol chnab twitz ic tza'n in bant tcyakil konic'an; ax icx minti' ocx watl tuj twitz enter konic'an. 19Tej ttzaj t-xe cya'j, jaw we' ex xi' naj ttzi cyjul balun. 20Tejtzun tpon rey ttzi cyjul balun, xi sch'in tuc'il tk'ajk'ajel twi' bisbajilxix ex tma: —Daniel, aya tmajen Dios itz', ¿mape cleta tuj cytzi balun tu'n Tdiosa aju in ajbena te tcyakil k'ij? Chi rey. 21Atzunte Daniel tzaj ttzak'we'n: —Tat Rey, ba'nwt tz'el tk'ija te jumajx. 22Ma tzaj t-sama'n Ndiose t-anjel, ex ma lamet cytzi balun, tu'n mi'n nxi chyo'ne cyu'n, porque ba'n tu'n Dios minti' wile twitz, ax icx minti' jun wile ma nbinchaye twitza, Tat Rey. 23Jawtzun tzalaj rey nimxix ex xi tma'n tu'n tjatz k'i'n Daniel tuj cyjul balun. Tejtzun tjatz cyi'n, minti' cnet jun ẍil ti'j Daniel cyu'n, tu'nju o ke'xix tc'u'j ti'j Tdios. 24Xitzun tma'n rey tu'n cytzaj k'i'n ke xinak, akeju otok che k'mante te rey ka at til Daniel, ex e cu'x xo'n tuj cyjul balun, cyuc'ix cyxu'jil ex cyc'wa'l; ex na'nxtok cycu'pun tz'ak cyxol balun tej cyjatz t'icpaj balun tzyulte cye twitz cya'j, ex bi'x e baj tzakun cyu'n. 25Xitzun ttz'iban rey Darío jun u'j cye xjal cyuj cycyakil nasyon, tuj teyle junjun yol ba'n cyu'n tuj tcyakil tcawbil, chi cyja': Cuchiwt ba'n ate'ye ex ba'nwt tz'el cyk'ije. 26Akine rey Darío in xi nk'o'ne jun ley tuj tcyakil tx'otx' jatum in chin cawine, tu'n cynimane cycyakile te Dios, aju Tdios Daniel, ex tu'n cyxobe twitz. Porque atzun Dios itz', ex cucx tten te jumajx. Aju tcawbil mlay naj ex aju tipumal minti' bajsbil te. 27Ate Dios colol cye xjal ex k'ol tzokpibl, ex in tbincha'n ke binchben ma' cyxilen tza'nx tuj cya'j ax icx twitz tx'otx'. A ma clonte Daniel tuj cytzi balun, chi rey tuj u'j. 28Cyja'tzun, ax toclen Daniel xi ti'n ic tza'n nej tuj enter tyemp tej tcawin Darío, ax icx tej tcawin Ciro aju rey te Persia.

will be added

X\