DANIEL 3

1Xi tma'n rey Nabucodonosor tu'n tcub binchet jun tilbilal k'an pwak ttx'otx'il; aju twa'l te 30 var ex aju twitz te cyaje var tuc' mey; ex xi tma'n tu'n tcub ten tuj chk'ajlaj Dura tbi, tujx partament Babilonia. 2Te tibajxi, xi tma'n tu'n cyxi txocbaj cycyakil ke cawil ma' cyoclen, cyuc'ix ke nejenel cye soldad, ke gobernador tuj junjun partament, ke k'ol tnabl rey, ke c'u'l pwak, ke jwes, ke ajcal, ex cycyakil aj sanjelal cye mastl tnam, tu'n cyten tuj ic'sbil k'ij ti'j tilbilal otok txi tma'n rey tu'n tbant. 3Cycyakiltzun xjal lu ma' cyoclen oc cychmon cyib twitz tilbilal tu'n tic'set tk'ijlalil. 4Attok jun otok cyaj k'o'n toclen tu'n t-xi tma'n cye xjal oc ttzyet ic'sbil k'ij, ex tej tjaw tk'ajk'ajel twi' cyuw, tma: Cybintze akeye xinak cye cycyakil tnam, cye cycyakil nasyon ex cycyakil c'loj yol: 5Oc t-xi cybi'ne oc tk'ajt chun, xux, tal quitar, arpa, chkitz', chirimiy ex mastl chnab, ba'n tu'n cycub ẍmeje'ye ex tu'n cyc'ulune twitz tilbilal k'an pwak ttx'otx'il aju ma baj tbincha'n rey Nabucodonosor. 6Ka at jun xjal minti' ma cub ẍmeje', ex ka minti' ma c'ulun twitz tilbilal lu, jurat naj cxel xo't tuj jorni in c'ant tu'n k'ak', chi xjal. 7Tejtzun cybinte cycyakil xjal otok cub cybuyin cyib aju tk'ajk'ajel cywi' cycyakil txcaj chnab, e cub ẍmeje' ex e c'ulun twitz tilbilal k'an pwak ttx'otx'il, aju otok bant tu'n rey Nabucodonosor. 8At junjun aj Caldey e je'x k'ol part cyi'j ke xjal Judiy tuc'il rey Nabucodonosor, 9ex xi cyma'n te: —Tat Rey, ba'nwt tz'el tk'ija. 10Aya ma k'mante tu'n cycub ẍmeje' cycyakil xjal jurat naj ex tu'n cyc'ulun twitz tilbilal k'an pwak ttx'otx'il oc cybinte tk'ajk'ajel cywi cycyakil txcaj chnab, 11ex alcyetzun minti' ma cub ẍmeje' twitz tilbilal, jurat naj cxel xo't tuj jorni in c'ant tu'n k'ak'. 12Pero at junjun xjal Judiy, akeju e oc tk'o'na te nejenel ti'j tcyakil ak'untl tuj tx'otx' Babilonia, minti' in che niman teya ex minti' in che c'ulun cywitz ke tdiosa ex twitz tilbilal k'an pwak ttx'otx'il aju ma baj tbincha'na. Atzun ke jlu: Sadrac, Mesac ex Abed-nego. 13Tzajtzun nim tk'oj Nabucodonosor ex xi tma'n tu'n cytzaj k'i'n Sadrac, Mesac ex Abed-nego twitz. Tejtzun cypon k'i'n twitz, 14xi tkanin cye: —¿Maj minti' in che c'ulune cywitz ke ndiose ex twitz tilbilal k'an pwak ttx'otx'il ma bant wu'ne? 15¿Ba'npe tuj cywitze, oc cybinteye tk'ajk'ajel cywi chnab, jurat naj tu'n cycub ẍmeje'ye c'ulul twitz tilbilal k'an pwak ttx'otx'il aju ma baj nbincha'ne? Porque ka mi ma che cub ẍmeje'ye twitz, bi'x che oquex xo'te tuj jun jorni in c'ant tu'n k'ak', ex mi a'l jun dios jacu che clete tu'n tuj nk'abe. 16—Tat Rey, mya il ti'j tu'n kyoline ti'j jlu, che chi ox cu'xun. 17—Aju keye Kdios, aju in ko c'ulune te, jacu ko clete tu'n tuj k'ak' tuj jorni, ex ko cletele tu'n tuj tk'aba. 18Ex katzun mlay ko clete tu'n Kdiose, tz'elx tnic'a ti'j Tat Rey, mlayx ko c'ulune cywitz tdiosa ex mlayx ko cub ẍmeje'ye twitz ju tilbilal k'an pwak ttx'otx'il, aju ma baj tbincha'na. 19Tej tbinte Nabucodonosor aju yol lu, bi'x japun tcyakal tu'n tk'oj cyi'j keju ox cu'xun lu. Entons tma tu'n tmek't-xix wuk maj jorni mas ic tza'n in tenba nej; 20ex xi tma'n cye junjun t-soldad mas at-xix cyipun, tu'n cybaj c'alo'n Sadrac, Mesac ex Abed-nego ex tu'n cyocx xo'n tuj jorni in c'ant tu'n k'ak'. 21Akeju ox cu'xun lu e baj c'alo'n, tuc'ix cycamiẍ, cywex, c'albil cywi' ex mastl cyxbalun toc cyi'j, ex e ocx xo'n tuj jorni in c'ant tu'n k'ak'. 22Tu'nju o tma rey tu'n tjapun naj ex tu'nju in c'ant-xix wen k'ak' tuj jorni, cyja'tzun, aju tkan k'ak' pon canun cyi'j ke soldad akeju e ocx k'onte cye ox cu'xun; bi'x e tz'e'y soldad tu'n ex e cyim, 23atzun cye oxe cu'xun lu c'alo'n ke tej cycupun tz'ak tuj jorni in c'ant-xix wen tu'n k'ak'. 24Atzunte Nabucodonosor bi'x naj tnabl ex jurat jaw we' naj ex xi tma'n cye ke xinak at cyoclen ttxlaj: —¿Myapetzun ox xinak c'alo'maj ẍe ocx kxo'n tuj k'ak'? —Ax toc, che chi. 25—Pero ma wile cyaje xjal pju'maj in che bet tuj k'ak' ex minti' in che tz'e'y, ex aju tcyajin xinak ic que'yin ic tza'n jun dios, chi rey. 26Entons pon lak'e' Nabucodonosor ttzi jorni in c'ant tu'n k'ak' ex tma: —Aya Sadrac, tuc'ix Mesac ex Abed-nego, tmajen Dios ma' toclen keye, cyetze ex cytzaje tzalu. E je'tztzun ke ox cu'xun tuj jorni, 27ex cycyakil aj sanjelal ma' cyoclen otok che pon, e pon lak'e' cytxlaj, pero akeju cu'xun lu, minti' ch'in otok che tz'e'y tu'n k'ak', ex baj cyque'yin, mi jun ttzmal cywi' otok tz'e'y ex ttenx cyxbalun ic tza'n nej ex minti' ch'in t-xewil tz'e'ynak cyi'j. 28Atzunte Nabucodonosor tma: Nimanxwit tbi Cydios Sadrac, Mesac ex Abed-nego, tu'nju ma tzaj t-sama'n t-anjel te clolte cye ke tmajen k'ukl cyc'u'j ti'j; minti' ma txi cyniman nleye, akine rey, ex ma cyajbe tu'n cycyim twitzju tu'n cycub ẍmeje' twitz juntl dios aju mya cye Cydios. 29Ja'lo cxel nk'o'ne jun ley: Alcye jun xjal ma yolin mya ba'n ti'j Cydios ke cu'xun lu, bi'x cbel paẍut ex aju tja bi'x cbel xitet, nok alcyex ttanmi ex tyol, porque mi a'l juntl Dios jacu che clet xjal tu'n ic tza'n jlu, chi rey. 30Atzunte rey oc tk'o'n cyoclen Sadrac, Mesac ex Abed-nego te ma'xix tuj partament Babilonia.

will be added

X\