DANIEL 10

1Tuj toxin abk'i ttzyetlen tcawin Ciro aju rey te Persia, at jun tzaj yec'un mer ic tza'n tuj witzic' te Daniel aju ax juntl tbi Beltsasar. Aju tkanil lu axix toc ex cyuw tu'n tel nic'baj ti'j, pero oc ten Daniel ximal ti'j ex el tnic' ti'j t-xilen aju otok tzaj yec'un te. 2Cyuj ke tk'ijlalil lu, akine Daniel nimxix o chin bisune tuj ox seman. 3Minti' xi nchyo'ne jun ti'xti mas tbanil, minti' xi nchyo'ne chibj, minti' xi nc'ane ta'l twitz uva ex minti' oc nk'o'ne perjum wi'je, tejxi tbaj ox seman. 4Tuj 24 tajlal tnejel xjaw te abk'i, atintoke ttzi matij nima Tigris. 5Nok minaben xi nque'yine ex o wile jun xinak toc t-xbalun lino ex toc jun c'albil tc'u'j puro k'an pwak tbanilxix. 6Aju t-ximlal in koptz'aj ic tza'n tal abj topacio, aju twitz in koptz'aj wen mer ic tza'n xle'laj cya'j, ke tbak' twitz ic che que'yin ic tza'n ttxa'n tzaj in c'ant, ke tk'ab ex ke tkan in che koptz'aj ic tza'n k'an c'uxbil, ex aju tk'ajk'ajel twi' in k'ajt ic tza'n tk'ajk'ajel cywi' nim xjal. 7O'cx akine o wile jlu ic tza'n tuj witzic'; akeju xinak ate'tok wuc'ile minti' o cyil, tu'nju tzaj nimxix cyxobil ex e je'l ok tu'n t-xi cyewan cyib. 8Njunalxtoke atine tej ttzaj yec'un jlu weye ic tza'n tuj witzic', ex puro spelin in oque ex in cyaj tene minti'tl wipune. 9Tejtzun nbinteye tej toc ten yolil, in cub mutzk'aje ex in ic' tane. 10At jun k'abaj tzaj tzyunte weye ex in jaw wabane tu'n, tejxi njaw txaque'ye, 11ex tzaj tma'n weye: Aya Daniel aju c'ujla'nxix tu'n Dios, chebaxix bintza aju cxel nma'ne teya: We'ctza, porque ma chin tzaj sama'ne tuc'ila, chi weye. Tej tbaj tma'n ke yol lu, in jawtzun we'ye in chin lu'lune wen. 12Tzajtzun tma'n weye cyja': Aya Daniel mi'n xoba, porque atxix tuj tnejel k'ij tej o tajbeya tu'n tel tnic'a cyi'j ke ti'xti cyuwxix cyxilen ex tej tcub tmansin tiba twitz Tdiosa, o tbi Dios aju tcubsbila ex cyja'tzun ma chin tzaje tuc'ila. 13Aju ju'ẍ nejenel in cawin tibaj nasyon Persia oc tzokpaj wi'je tuj 21 k'ij, pero ate Miguel, jun cye keju anjel ma'xix cyoclen, ul onil weye, porque njunaltoke otok chin cyaj tene cytxlaj ke rey te Persia. 14Ma chin tzaje tuc'ila tu'n t-xi nma'ne teya aju cbajel cyi'j t-xjalila te tibajxi, porque aju o tzaj yec'un teya ic tza'n tuj witzic', atzun in yolin ti'j mancbil tk'ijlalil. 15Tej in k'mantok ke yol lu, atzun weye nok cyja' cub nque'yine twitz tx'otx' ex minti' jun yol xi nma'ne. 16Pero at jun ic que'yin ic tza'n jun xinak oc maconte ntzi'ye. Xitzun nma'ne teju wa'l tcub nwitze: Tat, ma tzaj nimxix nbise tu'n tlaj ju ma wile ex ma chin cyaj tene minti' wipune tu'n. 17¿Tza'n tten tu'n nyoline tuc'ila, akine tmajena? Jumajx ma tz'el baj wipune ex minti'tl in jawil nxewe, nchiye. 18Ex aju ictok que'yin ic tza'n jun xinak in oc tmaco'n juntl maj, tzaj tk'o'n ac'aj wipune, 19ex tzaj tma'n weye: Mi'n xoba ex mi'n bisuna. C'ujla'nxixa tu'n Dios, cyuwx tc'u'ja ex tenx tipuna, chi xinak. Acux in yolin wuc'ile, o nna'ye cyja'tok toc wipune ex xi nma'ne: Tat, chux yolina wuc'ile porque ma tzaj tk'o'na juntl maj wipune. 20Tzajtzun tma'n weye cyja': ¿Ba'npe tu'na tiku'n ma chin ule tuc'ila? Porque ja'lo chin ajel meltz'aje juntl maj k'ojlel tuc'il ju ju'ẍ nejenel in cawin tibaj nasyon Persia. Ex octzun nbaj k'ojine tuc'il, ctzajel aju ju'ẍ nejenel in cawin tibaj nasyon Grecia. 21Ja'lo cxel nma'ne teya aju tz'iban tuj ju libro axix toc. Tuj k'oj nno'c wu'ne cyuc'il, o'cxcu a Miguel in onin wi'je, aju anjel in colin cyi'j aj Israel.

will be added

X\