1 Akeye patrón, cybinchame aju tz'aklxix ex tuj tumelxix cye cymajene, porque ba'n cyu'ne icx cyeye at jun cypatrone tuj cya'j. 2 Cucx che na'ne Dios, che xk'ukine tuj na'j Dios ex cyk'onxe chjonte te Dios. 3 Ax icx che na'ne Dios ki'je, tu'n ttzaj tyec'un Kajaw jun tumel jatum tu'n t-xi kpacba'ne tyol Dios, ex tu'n t-xi kchic'ba'ne tyol Crist aju attok tuj ewaj nej; tu'ntzun tlaj ju yol lu pres kine. 4 Che na'ne Dios wi'je, tza'n tten tu'n t-xi nchic'ba'ne ju yol lu, porque il ti'j tu'n t-xi nma'ne. 5 Tenx cynable tza'n tten tu'n cybete tuj tumelxix cywitz xjal mya ocslal ke; tz'ajbenxwit tcyakil k'ij cyu'ne tu'n cybinchanteye ju ba'n. 6 Cheba che yoline tcyakil maj, atwit tchya'l cyyole, tu'ntzun tel cynic'e ti'j tza'n tten tu'n t-xi cytzak'we'ne teyle junjun xjal. 7 Tcyakilju tza'n ntene cxel ttx'olba'n Tíquico cyeye; atzun kerman at kc'u'j ti'j, in japunxix tu'n tuj tajbebl, ex tmajen Kajaw junx kuc'ile. 8 Cyja'tzun ma txi nsama'ne Tíquico cyuc'ile, tu'ntzun cybinteye tza'n ktene, ex tu'n tk'ukbanjtz cyc'u'je tu'n. 9 Tuc'ix Onésimo ma txi nsama'ne, atzun jun erman at kc'u'j ti'j ex in japunxix tu'n tuj ak'untl, ax tzaj cyxole. Tcyakilju in baj tzalu cxel cyma'n cyeye. 10 In che'x k'olbe'ne tu'n Aristarco aju at wuc'ile tuj pres; ex in che'x k'olbe'ne tu'n Marcos, cyerman cyib tuc'il Bernabé. O txi nma'ne jlu cyeye, ka ma pon Marcos cyuc'ile cyc'mome. 11 Ex in che'x k'olbe'ne tu'n Jesús aju Justo tbi; o'cx ke jlu cyxol ke ocslal judiy in che onin wuc'ile tu'n tpacbet tcawbil Dios, ex nim ma k'ukbanjtz nc'u'je cyu'n. 12 In che'x k'olbe'ne tu'n Epafras aju tmajen Jesucrist ax tzaj cyxole. Cucx nno'c tilil tu'n tu'n tna'n Dios cyi'je, tu'ntzun cywe'xixe, ex tu'n ttz'aket-xix cynable, ex tu'n tjapun cyu'ne tcyakilju tajbil Dios. 13 Porque ma wile, tocxix tc'u'j Epafras cyi'je ex cyi'j keju ate' tuj tman Laodicea ex cyi'j keju ate' tuj tnam Hierápolis. 14 In che'x k'olbe'ne tu'n doctor Lucas aju at kc'u'j ti'j, ex in che'x k'olbe'ne tu'n Demas. 15 Cyk'onxe kk'olbeble cye ke erman ate' tuj tnam Laodicea; ex cyk'onxe kk'olbeble te Ninfas ex cye ocslal nno'c cychmon cyib tuj tja. 16 Oc tbaj sch'i'n ju u'j lu cyxole, cysamanxe tuj tnam Laodicea tu'n tjaw sch'i'n cyxol ke ocslal, ax icx ju u'j xi nsama'ne cye aj Laodicea, ba'n tu'n tjaw cysch'i'ne. 17 Cymanxe te Arquipo cyja': K'o'nc tc'u'ja ti'j tu'n tjapun tu'na aju tajbebla o tzaj k'o'n teya tu'n Kajaw, che chicuye te. 18 Akine Pablo in xi ntz'ibane ju k'olbebl lu tu'nx nk'abe. Cyna'ntze ti'j ju presbil weye. Aju t-xtalbil Dios tenwt cyuc'ile. Icxwitju.
Copyright ℗ 2000 Hosanna Grabado por Producciones Cristianas Vina