Colosenses 2

1Porque waje tu'n cybinteye, nimxix in chin na'ne Dios cyi'je, ex cyi'j keju ate' tuj tnam Laodicea, ex cyi'j cycyakil keju na'nx toc cyque'yin nwitze. 2Waje tu'n tk'ukbanjtz cyc'u'je, ex tu'n tten cymojbabl cyibe tu'n cyc'ujlalile, ex tu'n telxix cynic'e ti'j tu'ntzun tke'xix cyc'u'je, ex tu'n tel cynic'e ti'j tyol Kman Dios ewantok nej, in yolin ti'j Crist. 3Porque atzun ta' tcyakil tbanil nabl tuc'il Crist, tewan tib, ex tcyakil ojtzki'n tu'n Crist. 4Ma txi nma'ne jlu cyeye tu'n mi'n cysbunjtze cyu'n xjal in cub ti'j cynabl xjal tu'n cyyol. 5Porque masque mi a'l kine cyuc'ile pero aju wanmiye at cyuc'ile, in chin tzalaje tu'nju ba'n cytene in xi nbi'ne, ex tu'nju wa'l ke'xixe tuj cyocslable ti'j Crist. 6Cyja'tzun, ic tza'n ma cyc'ame Kajaw Jesucrist, icxtzun tu'n cyank'ine junx tuc'il. 7Cyawam cyibe ti'j Crist ex cybincha'n jawe cychwinklale tibaj, porque ate Crist simyent; che we'xixe tuj cyocslable ic tza'n ju xnak'tzbil ma cyc'ame, ex nimxix cyk'onxe chjonte te Dios. 8Ten cycwente cyi'je tu'n mi'n cysbunjtze tu'n cyxnak'tzbil xjal tuj cyex cynabl in tzaj, ex tu'n mi'n cysbunjtze tu'n cysbubl nokx gan; porque in che oc lpe' ti'j ju yol cyajni k'ma'n cyu'n cytijil xjal, in che oc lpe' ti'j jun xnak'tzbil mya tz'aklxix in cyk'o'n xjal, minti' in che oc lpe' ti'j Crist. 9Porque tcyakilju tten Dios najl tuj t-ximlal Crist, 10atzun cyeye ma che tz'akete tu'nju cymojbabl cyibe tuc'il Crist. Ate Crist nejenel cyibaj cycyakil keju at cyipumal ex at cyoclen twitz tx'otx' ex tuj cya'j. 11Tu'nju ocslal keye ti'j Crist ma che sircunsidarinjtze, mya tu'n cyk'ab xjal ma bant jlu, nok o'cx tu'n Crist ma che sircunsidarinjtze, tu'nju ma tz'el cycotpi'ne aju ojtxi cytene mya ba'n, tuc'ix ju tajbil cychibjale. 12Junx e cu'x maku'ne tuc'il Crist tej cybyane, ex junx ma che jaw ank'ine tuc'il Crist tu'nju ma ke' cyc'u'je ti'j tipumal Dios, aju jaw ank'in Crist tu'n cyxol cyimni. 13Cyimni keye nej tu'n tlaj cyile ex tu'n tlaj cucx cybinchanteye tajbil cychibjale, atzun ja'lo ma tzaj tk'o'n Dios cychwinklale junx tuc'il Crist, ex ma cub tnajsa'n tcyakil cyile. 14Cub tnajsa'n Dios aju tu'jil kc'as jatum in tma'n ka at kil, bi'x el ti'n, cyaj tclawsiyi'n twitz crus. 15Tu'n Crist cub cyi'j ke nejenel minti' k'ancha'l ex keju at cyipumal; e cub tk'o'n tu'n cyque'yinjtz cyu'n cycyakil xjal, cub cyi'j tu'n tej tjaw k'o'n twitz crus. 16Cyja'tzun, mi'n txi cyk'o'ne ambil cye xjal tu'n cyyolin cyi'je tu'n tlaj alcye in xi cywa'ne ex in xi cyc'a'ne, ex ka ti'j jun nink'ij, ex ka ti'j tu'n tic'set nink'ij oc ttzaj que'yin ac'aj xjaw, ex ka ti'j ju k'ij te ojlabl. 17Tcyakil jlu nok jun techal ti'j ju attok tulel, pero ate Crist ttxuylal, ex tcyakil jlu ti'j Crist in japun baj. 18Mi'n txi cyk'o'ne ambil tu'n tel k'i'n cycambable cyu'n xjal nok nno'c cyk'on cyib mans ke, ex in cyma'n tu'n cyc'ulun xjal cywitz anjel. In che yolin ti'j ju na'nx cylonte, ex nokx gan in jaw cyniman cyib tu'n cyex cynabl. 19Mya cytzyun cyib ti'j Crist aju wibaj, porque tu'n Crist in ch'iy tcyakil t-ximlal, tc'a'ch tib ex ttzyun tib tu'n tyakamil ex tu'n tbotx'il, in ch'iy porque a Dios ch'isal te. 20O che cyime tuc'il Crist tu'n cytzokpete tjak' ju xnak'tzbil mya tz'aklxix in cyk'o'n xjal, ┬┐tiku'ntzun in xi cyk'on cyibe tjak' cyxnak'tzbil xjal mer ic tza'n atx cyoclene cyxol? 21Achaktzun cymandamyent jlu: Mi'n tzaj ttzyu'na jlu, mi'n txi tnic'be'na jlu, mi'n tz'oc tmaco'na jlu, che chi. 22Tcyakil jlu cymandamyent xjal ex cyxnak'tzbil xjal, tcyakil jlu cnajel oc tbaj tajben cye xjal. 23Ke xjal in che japun ke mandamyent lu cyu'n, mer ic tza'n at cynabl, porque cyu'nx cyib in cub cyximan tza'n tten tu'n cyc'ulun, in cyyec'un cyib mans ke, ex in baj cyc'ixbisa'n cyximlal; pero mlay maket tajbil cychibjal tu'n tcyakil jlu.

will be added

X\