Colosenses 1

1Akine Pablo apostl kine te Jesucrist nok tu'n tajbil Dios, tuc'ix erman Timotey at wuc'ile. 2In xi ntz'ibane cyeye, akeye erman ate'ye tuj tnam Colosas, ocslal keye ti'j Crist ex wa'l ke'xixe. Awt Kman Dios tzaj k'onte xtalbil cyeye ex tu'n tke'xix cyc'u'je. 3Cucx in ko na'ne Dios cyi'je ex in xi kk'o'ne chjonte te Dios aju Tman Kajaw Jesucrist, 4porque ma kbiye at cyocslable ti'j Jesucrist ex at cyc'ujlalile cyi'j cycyakil ocslal, 5porque in che ayone ti'j ju ctzajel tk'o'n Dios cyeye c'u'n tuj cya'j; ojtxi cybiye jlu, atxix tej tpacbanjtz tkanil colbil cyeye, aju yol axix toc. 6Ic tza'n ma pon tkanil colbil tuj tcyakil twitz tx'otx', icxtzun ma pon cyuc'ile. Aju tkanil colbil ic tten ic tza'n jun awal in tk'o'n twitz ex in ch'iyixi tuj tcyakil twitz tx'otx', ax icx in ch'iy cyxole atxix tej cybinteye ex tej cyojtzkinteye t-xtalbil Dios axix toc. 7Atzun jlu o che xnak'tzanjtze ti'j tu'n Epafras, aju ak'nal junx kuc'ile ex at kc'u'je ti'j. Ate Epafras tmajen Crist, in ajben cyeye, ex in japunxix tu'n tuj ak'untl. 8Ax icx ma tzaj tchic'ba'n keye ti'j cyc'ujlalile in tzaj tk'o'n Xewbaj Xjan. 9Cyja'tzun, atxix tej kbinteye jlu, cucx kna'ne Dios cyi'je, ex in ko kanine te Dios tu'n cyojtzkinteye tcyakilju tajbil ex tu'n ttzaj tk'o'n Xewbaj Xjan cynable tu'n telxix cynic'e ti'j tcyakil, 10tu'ntzun cybete ba'nxix ic tza'n tajbil Kajaw, ex tu'n ttzalaj Kajaw cyi'je tuj tcyakil, ex tu'n cybinchanteye ba'n tuj tcyakil, ic tza'n jun awal in tk'o'n twitz, ex tu'n telxix cynic'e ti'j Dios junjun k'ij. 11Cuchiwt tu'n tocxix cyipune tu'n tipumal Dios tbanilxix, tu'ntzun tic'x cyu'ne tuj tcyakil ex tu'n tten cypasense ex tu'n cytzalaje. 12Cyk'onxe chjonte te Kman Dios, porque ma tzaj tk'o'n koclen tu'n kc'monte jun etzbil junx cyuc'il ocslal ate' tuj spic'un. 13Ma ko clet tu'n Dios, ma ko etz ti'n tuj tipumal klolj, ma ko pon ti'n tuj tcawbil Tc'wa'l aju c'ujla'n tu'n, 14ex ma ko colpet tu'n Crist [nok tu'nju tchc'el], ex ma najset kil tu'n. 15Ate Crist tilbilal Dios minti' k'ancha'l, ate Crist Tc'wa'l Dios, o'cxte attok nej na'nxtok tbant tcyakil, ex a tajaw tcyakil. 16Porque nok tu'n Crist o tbincha Dios tcyakil, tcyakilju at tuj cya'j ex tcyakilju at twitz tx'otx', tcyakilju k'ancha'l ex tcyakilju minti' k'ancha'l, cyuc'ix ke cawbil, cyuc'ix keju in che cawin, cyuc'ix ke nejenel, cyuc'ix keju at cyoclen; tcyakil o bant nok tu'n Crist, tcyakil o bant tu'n tajben te. 17Attok te Crist nej tej na'nxtok tbant tcyakil, ex nok tu'n Crist cytzuylaj cyib cycyakil. 18Ax icx xi tk'o'n Dios toclen Crist tu'n toc te nejenel cyibaj cycyakil ocslal, akeju cyoc te t-ximlal, ex ti'j Crist in tzaj cychwinklal cycyakil ocslal, porque ate Crist jatz itz'j nej cyxol cyimni tu'ntzun tten mas toclen twitz tcyakil. 19Porque ba'n ela tuj twitz Dios tu'n toc Crist ic tza'nx te Dios tuj tcyakil. 20Ex ba'n ela tuj twitz Dios tu'n tbant cyten cycyakil tuc'il nok tu'n Crist, cycyakil keju ate' twitz tx'otx', ax icx keju ate' tuj cya'j, ex ma bant tu'n Crist tu'n tten cymojbabl cyib xjal tuc'il Dios tu'nju tchc'el el twitz crus. 21Ax icx cyeye najchak ate'ye ti'j Dios ojtxi, ex aj k'oj keye ti'j Dios tuj cyanmiye tu'nju in cybincha'ntoke mya ba'n, 22atzun ja'lo ma bant cytene tuc'il Dios tu'n Crist, tej tc'ixbisanjtz t-ximlal ex tej tcyim, tu'ntzun cypon k'i'ne twitz Dios sak tuj cyanmiye, minti' ch'in tz'il cyi'je, ex minti' cypaltile. 23Cyja'tzun tz'oc tililx cyu'ne cucx tu'n tten cyocslable ex tu'n cywe'xixe, ex mi'n cyaj cycoline tkanil colbil aju ma ke' cyc'u'je ti'j, aju o cybiye ex in pacbanjtz cye cycyakil xjal tuj tcyakil twitz tx'otx'; akine Pablo ma chin oc k'o'ne tu'n wajbene tu'n tpacbet tkanil colbil. 24In chin tzalaje ja'lo tu'nju nnic'x wu'ne tu'n cylaje, nnic'x wu'ne tuj nximlale tu'ntzun tel elset aju yajbil te Crist, aju atxtok taj tu'n tic'x tu'n ti'j iglesi, aju iglesi atzun t-ximlal Cristju. 25Ma chin oc k'o'ne ajbel cyxol cycyakil ocslal, atzun wak'une tzaj tma'n Dios weye tu'n wajbene cyeye, tu'ntzun t-xi npacba'ne tcyakil tyol Dios. 26Aju yol lu ewantok ojtxi atxix t-xe tnejel, atzun ja'lo ma tzaj tyec'un Dios cye ke ocslal ti'j. 27Cub t-ximan Dios tu'n ttzaj tyec'un jlu cye ocslal, tu'n tel cynic' ti'j ju yol lu ewantok nej, ma' t-xilen ex tbanilxix ju yol lu cye xjal mya judiy, ex atzun in tma'n ju yol lu: At Crist tuj cyanmiye, ex tu'nju at Crist tuj cyanmiye, k'ukl cyc'u'je ti'j tu'n cypone tuj cya'j. 28In ko pacbane ti'j Crist, ex in xi kk'o'ne cynabl cycyakil xjal, ex in xi kk'o'ne xnak'tzbil cye cycyakil xjal tu'n ttz'aket-xix cynabl, tu'n cypon ki'ne cycyakil xjal twitz Dios tz'aklxix ke tuj cyocslabl ti'j Jesucrist. 29In chin ak'nane wen tu'n tjapun jlu, nno'c tilil wu'ne tu'n tipumal Crist, ex in chin cyuwsanjtze tuj wanmiye tu'n tipumal.

will be added

X\