AMÓS 9

1O wile Kman tcub ttxlaj t-altar ex tzaj tma'n weye: Pejcy'a'n oca twi tkan ja tu'ntzun cybaj yucch ke tkul, tu'ntzun tcub tilj cyibaj xjal. Atzun keju che cyjel ank'in che bel nbyo'ne tu'n spad; masque che el ok, pero mi jun ccletel; 2masque che'x ewal cyib max t-xe'pun tx'otx' tuj cynajbil cyimni, pero che jawitz wi'ne, ex masque che jax max twitz cya'j, pero che beletz wi'ne. 3Ka ma che jax ewal cyib twi witz Carmelo, max chin pole jyolte cye ex max che tzyetel wu'ne; ka ma che'x ewal cyib nwitze max t-xe'pun mar, cxel nsama'ne jun nintz lobaj cyi'j tu'n cyoc tx'a'n tu'n; 4ex ka ma che'x k'i'n pres najchak cyu'n aj k'oj cyi'j, max ma chixin cxel nsama'ne spad tu'n cycub byo'n tu'n. Cucx cbel ten nwitze cyibaj, pero mya tu'n tbinchet ba'n cye, nok o'cx tu'n tbinchet mya ba'n cyi'j, chi Dios. 5Oc toc maco'n tx'otx' tu'n Kman aju Tajaw Tcyakil, bi'x in cub ulj ex cycyakil xjal najl twitz in che oc ten ok'el. In jaw ch'iy tx'otx' ex in cub lak'e', ic tza'n in ch'iy nima Nilo ex in cub ti'j. 6Cub tk'o'n Dios tnajbil tuj cya'j ex tu'n o bant twitz cya'j tjax tibaj tx'otx'; in tzaj ttxco'n a' tuj mar ex in tzaj tko'n twitz tx'otx'; Kman Dios atzun tbiju. 7Chi Kman in tma'n cye aj Israel: Te weye mya mas mejor keye cywitz aj Etiopía. Ax toc e tzaj wi'ne tuj Ejipt, pero icxtzun e tzaj wi'ne ke aj Filistey tuj Cret ex ke aj Aramey tuj Kir, akeju ate' ttxlaj cytx'otx'e, chi Kman. 8Tcub twitz Kman cyibaj aj Israel akeju binchal il, ex in tma'n: Bi'x cnajel cycawbil wu'ne tu'n mi'n ttentl twitz tx'otx'; pero mlay che naj cycyakil tiyjil Jacob wu'ne, chi Kman. 9Cxel nma'ne tu'n cyoc aj Israel tuj sarand cyuj cycyakil nasyon ic tza'n nne'l txijet twitz triw tuj sarand, ex mi jun twitz nne'l tz'ak twitz tx'otx'. 10Il ti'j tu'n cycyim tu'n spad cycyakil keju in che binchan il cyxol ke xjal etzan wu'ne, akeju in cyma'n: Baka at jun mya ba'n tzul ki'j ex baka jacu tzaj xitbil, che chi. 11Aju tcawbil David o cub xitj ic tza'n jun ja in cub tilj, pero tzul tk'ijlalil tu'n tjaw nbincha'ne juntl maj. Cxel nk'o'ne ju cawbil juntl maj cye tiyjil David tu'n tten tcawbil icxix tza'n tten nej, 12tu'ntzun toc juntl maj te cyetzbil aj Israel aju cytx'otx' junjuntl aj Edom otok che cyaj ank'in, cyuc'ix cycyakil mastl nasyon etzantok wu'ne nej. Ate Kman in k'mante jlu, ex cjapunel tu'n icju. 13Tzul tk'ijlalil cucxtok cychmon xjal ti'j twitz triw oc tul canun naj tyemp tu'n tjaw k'u't tx'otx', ex na'nxtok tel baj yatz'o'n ta'l twitz uva otok jaw chmo'n, oc tul naj tk'ijlalil tu'n tcu'x awet triw. Cywi' ke nmak witz ex cywi' ke tal witz ctel nim ta'l twitz uva. 14Che ajetz wi'ne ke aj Israel akeju etzan wu'ne tuj tx'otx' jatum otok che pon k'i'n; cjawil cybincha'n juntl maj ke cytanmi otok che cub xitj ex atzun che najal cyuj; cbelex cyawa'n tkan uva ex che c'al ti'j ta'l twitz; cbelex cyawa'n mastl awal ex che lo'l ti'j twitz. 15Che bel nk'o'ne tuj cyex cytx'otx' ex mlay che ex k'i'n juntl maj tuj tx'otx' xi nk'o'ne cye. Akine Cydios in chin k'mante ju yol lu.

will be added

X\