AMÓS 7

1Atzun jlu tzaj tyec'un Kman Dios weye: O wile e jaw tpok'sa'n nimxix ẍplon tej matok in tzaj ch'iy awal yaj nnu'l tk'ij, tjawlenxi baj chmet te rey. 2Tejtzun tbaj cywa'n ẍplon tcyakil awal, xi nma'ne cyja': —Ay, Nman Dios, najsama kile. ¿Tza'n tten c'ic'elex cyu'n ke tiyjil Jacob, baka nim cybaj? Nchiye. 3Atzunte Kman tzaj chewix tc'u'j ex tma: —Ya mlay tzaj nsama'ne castiw lu. 4Atzun jlu tzaj tyec'un Kman Dios weye: O wile tej ttzaj t-sama'n k'ak' tu'n tcub cycastiw xjal, ex bi'x baj tz'e'y ju mar ma' t-xe' tu'n, ex cyja'tok tcub baj tz'e'y cycojbil xjal tu'n. 5Atzun weye xi nma'ne te: —Nman Dios, binchama xtalbil tu'n twe' jlu tu'na. ¿Tza'n tten c'ic'elex cyu'n ke tiyjil Jacob, baka nim cybaj? Nchiye. 6Atzunte Kman tzaj chewix tc'u'j ex tma: —Ax icx ju castiw lu mlay tzaj nsama'ne. 7Ax icx tzaj tyec'untl Kman jlu weye: Lu Kman wa'l ttxlaj jun muro ex k'i'n jun plom tu'n aju in ajben cyu'n albañil. 8Tzajtzun tkanin weye: ¿Ti ma tila, Amós? —Ma wile jun plom in ajben cyu'n albañil, nchiye, xi ntzak'we'ne. —Tu'nju plom lu c'elel nnic'e ti'j ka tuj tumel in che bet aj Israel akeju etzan wu'ne. Mlay cub nnajsa'ntle cyil. 9Bi'x che najel wu'ne ke lugar cywi witz akeju in che ajben te cyc'ulbil tiyjil Isaac, bi'x che bel xitj ke ja wu'ne jatum in che c'ulun aj Israel cywitz cydios ex che najel ke tiyjil rey Jeroboam wu'ne tu'n nspadiye, chi Dios. 10Ate Amasías aju pal te tnam Betel xi t-sama'n tkanil lu tuc'il Jeroboam aju rey cye aj Israel: In bet Amós cyxol aj Israel ex in yolin ti'ja, ka tu'n tel k'i'n toclena. Mya ba'n ka cucx ma yolin, 11porque in tma'n: Cymel Jeroboam tu'n spad ex cycyakil aj Israel che xel k'i'n najchak tuj juntl nasyon, chi Amós, chi Amasías. 12Xitzun tma'n Amasías te Amós: —Texa tzalu Amós, aya ba'n nabin tu'n Dios. Ka taja tu'n twa'na ti'j ju yol in pacbana ti'j, txi'ya pacbal tuj Judá, 13ex mi'n pacbana mastl tuj Betel, porque atzun ta' ja te c'ulbil banimaj tu'n rey tuj tnam lu, aju ja ma' toclen te cyc'ulbil cycyakil xjal, chi Amasías. 14Atzunte Amós xi ttzak'we'n: —Myatok t-sanjel Dios kine ex mya t-xnak'tzben t-sanjel Dios kine. Nok o'cx pastoril alumaj kine ex in chin k'intoke twitz higo te tjak' c'ul, 15pero ate Kman o tz'el k'inte weye ti'j pastorj alumaj ex tma weye: Txi'ya cyxol aj Israel akeju etzan wu'ne, ex pacbanxa nyole cye. 16Cyja'tzun bintza aju tyol Kman. Teya in tma'na weye: Mi'n txi tma'na tyol Dios cye aj Israel, ka tu'n tcub cycastiw, ex mi'n txi tma'na jun yol mya ba'n cyi'j ke tiyjil Isaac, chitzuna, 17atzunte Kman in tma'n teya: Aju t-xu'jila c'oquel te cyyaẍ xinak tuj tnam lu, atzun ke tcy'ajala ex ke tme'jela che cymel tu'n spad. Cjawil k'i'n swert ti'j ttx'otx'a tu'n tbaj sipan cyxol xjal, ax icx teya cymela tuj cytx'otx' stranjer xjal, atzun ke aj Israel che xel k'i'n tuj juntl tx'otx' najchak, chi Amós.

will be added

X\