AMÓS 5

1Cybintze nyole akeye aj Israel; cybintze bitz bisbajilxix in chin bitzane cyi'je: 2Ic cyten aj Israel ic tza'n jun tal k'apoj na'nx tlonte xinak; ma che cub tz'ak ex mlay che jaw we'tl; ax ma che cub tx'aye' twitz cyex cytx'otx' ex mi a'l jun ba'n tjaw wabante cye. 3Chi Kman Dios in tma'n cye aj Israel: Ka at jun tnam ma txi t-sama'n jun mil xinak tuj k'oj, nok jun syent che ul meltz'aj, ex ka at jun tnam ma txi t-sama'n jun syent, nok lajx che ul meltz'aj. 4Chi Kman cye aj Israel: Chin cyjyome tu'ntzun cyank'ine. 5Mi'n che'xe kanil onbil tuj Betel, mi'n che'xe tuj Gilgal ex mi'n che'xe tuj Beerseba, porque ke xjal tuj Gilgal che xel k'i'n pres najchak ex mlayx tzic'x ti'j, atzunju tnam Betel cbajel xitj. 6Che jyone ti'j Kman tu'ntzun cyank'ine; katzun mi'n ma bant cyu'ne icju, ctzajel t-sama'n Kman k'ak' cyibaj aj Israel ex mi a'l jun tuj Betel jacu yupj k'ak' lu tu'n. 7Ay bec'bil cywitze tu'nju minti' in xi cybincha'ne cyi'j xjal tuj tumel, ex nno'c cyk'o'ne ley te minti' tajben. 8Ate Kman binchante cye che'w Wo'tz cybi ex ke che'w Tkan K'inbil cybi, in ch'expaj konic'an tu'n tu'n toc te k'ijtl, ex aju k'ij tu'n toc te konic'an puro klolj; in txocon ti'j a' tu'n tjatz tuj mar, ex in tzaj kojl tu'n tibaj tx'otx'; Kman, atzun tbiju. 9Keju at nim cyipun nok minaben in che naj tu'n ic tza'n tu'n k'ancyok, ex in che baj naj ke cwartel tu'n. 10Ay bec'bil cywitze akeye in che el ic'unte cye keju in che binchante ti'j xtis tuj tumelxix, ex nne'l cyic'une aju testiw in yolin tuj tumelxix. 11Mlay che najane tuj cyjaye abj xpe'limaj ma jaw cybincha'ne, ex mlay txi cynic'be'ne ta'l twitz uva tbanilxix ma cu'x cyawa'ne, tu'nju in che yajlane cyi'j ke meba ex nim twitz awal nne'l cykanine cyi'j te ta'l tx'otx'. 12Ma tz'el nnic'e ti'j nimcu mya ba'n in cybincha'ne, nic'lopun il in bant cyu'ne: In che yajlane cyi'j keju tz'aklxix, in tzaj cyc'mo'ne pwak nok tu'n mi'n tcub cysentens xjal cyu'ne ex minti' in xi cybincha'ne cyi'j ke meba tuj tumelxix tuj jusgad. 13Cyja'tzun, aju xjal at tnabl minti' in k'ajt, tu'nju mya ba'n in cybincha'n xjal tuj tk'ijlalil lu. 14Cyjyome aju ba'n ex mya aju mya ba'n, tu'ntzun cyank'ine, cyja'tzun ctel Kman cyuc'ile, aju Tajaw Tcyakil, ic tza'n in cyma'ne. 15Cyic'un ele aju mya ba'n ex cyc'ujlame aju ba'n. Cybinchanxe ti'j xtis tuj tumelxix tuj jusgad, kapelo jacu tzaj k'ak'an tc'u'j Kman Dios aju Tajaw Tcyakil cyi'j aj Israel, akeju otok che cyaj ank'in. 16Chi Kman Dios aju Tajaw Tcyakil, in tma'n cyja': Tuj tcyakil part c'oquel ok'el, ex tuj tcyakil cay che sch'il ke xjal tu'n ta'w c'ixc'oj. Che tzajel txco'n ak'nal xjal tu'n cyok' junx cyuc'il, cyuc'ix ke aj ok'el tu'n cyul ok'el. 17Tjak' tcyakil tkan uva c'oquel ok'el oc wule k'olte castiw cyibaje, chi Kman. 18Ay bec'bil cywitz keju in cyajbe'n tu'n tul tk'ijlalil tu'n ttzaj castiw tu'n Kman. ¿Ba'npe cyu'ne tza'n ctelba k'ij lu te cyeye? Aju tk'ijlalil lu puro klolj ex mya spic'un. 19Ic ctelba ic tza'n oc nne'l ok jun xjal twitz jun balun tu'n tclet, pero nno'c tc'ulban naj tib twitz jun txcup oso, ex ka ic tza'n jun xjal nno'cx ok tuj tja tu'n tclet, ex oc toc tk'o'n tk'ab twitz ja, nno'c tx'a'n tu'n jun lobaj. 20Ax toc, tuj tk'ijlalil Kman cbel kloljxix twitz tx'otx' ex minti' spic'un, puro kxopin c'oquel ex misicyer ch'in spic'un ctel. 21Chi Kman cyja': Ic'un wu'ne ke nink'ij in cub cyic'sa'ne ex misicyer in chin tzalaje ti'j buyj tibil ma' t-xilen nno'c cyu'ne. 22Masque cub cypatune alumaj te nimbil weye, ex masque tzul cyi'ne twitz cyawale te cyoyaje te weye, minti' waje cyi'j; mlay nc'ame ke tal wacẍ ulni cynabl oc tul cyi'ne te cyoyaje te mojbabl tibil. 23Cyel lak'e'ye wi'je tu'n mi'n nbinteye tk'ajk'ajel cybitze; nc'i'ye tu'n nbinteye tk'ajk'ajel twi cychinbe arpa. 24Atzun waje, tu'n cybinchanteye tz'aklxix tcyakil k'ij ic tza'n jun nima minti' nna'j tzkij, ex cucx tu'n cybete tuj tumelxix ic tza'n jun twi' a' cucx in pulwin. 25Akeye aj Israel, ¿baka weye tzaj cyk'o'ne chojbil ex cyoyaje tbanilxix tej cytene 40 abk'i tuj tzkij tx'otx'? 26Nok o'cx xi cyikane tilbilal Sicut aju oc cyk'o'ne ic tza'n jun cyreye, ex ju tilbilal che'w Quiún, akeju tilbilal cydiose lu, cyu'nxe e bant. 27Cyja'tzun, che xel wi'ne pres max ti'jxi Damasco, chi Kman aju Dios Tajaw Tcyakil; atzun tbiju.

will be added

X\