AMÓS 2

1Atzun yol lu in tma'n Kman: Nimcu mya ba'n ma cybincha aj Moab, cyja'tzun mlay tzic'x ti'j wu'ne tu'n mi'n tcub cycastiw, tu'nju cub cypatun tbakil rey cye aj Edom tejxi tcub tza'jix. 2Tu'n tlaj jlu c'oquel nkoptz'i'ne k'ak' ti'j tx'otx' Moab ex che bajel tz'e'y ke tja rey tuj tnam Queriot, ke k'ojlel che sch'il wen tuj k'oj, tuc'ix chun in k'ajt cyu'n, ex che cymeltzun aj Moab cyu'n aj k'oj cyi'j. 3C'elel wi'ne cyrey aj Moab ex cymel wu'ne, cyuc'ix keju at cyoclen ttxlaj, chi Kman. 4Atzun yol lu in tma'n Kman: Nimcu mya ba'n ma cybincha aj Judá, cyja'tzun mlay tzic'x ti'j wu'ne tu'n mi'n tcub cycastiw, tu'nju minti' ma txi cyniman ke nxnak'tzbile, akine Cyman, ex minti' ma txi cyniman ke nleye, nok o'cx ma che el tzpet tu'nju in che c'ulun cywitz ke tilbilal, akeju e c'ulun cyxe'chel cywitz. 5Tu'n tlaj jlu, c'oquel nkoptz'i'ne k'ak' ti'j tx'otx' Judá, ex tu'n k'ak' lu che bajel tz'e'y ke tja rey jatum in cawin tuj Jerusalén. 6Atzun yol lu in tma'n Kman: Nimcu mya ba'n ma cybincha aj Israel, cyja'tzun mlay tzic'x ti'j wu'ne tu'n mi'n tcub cycastiw, tu'nju in xi cyc'ayin aju xjal minti' til tu'n tlaj tc'as ex ju meba xjal in xi cyc'ayin nok tu'n jun moj xjab. 7In che yajlan cyi'j ke xjal meba ex minti' in xi cybincha'n cyi'j ke xjal mans. Jun cu'xun tuc'il tman in che cub tan tuc'il junx k'apoj, ex tu'ntzun jlu nno'c cyk'o'n nbiye xjan te minti' tajben. 8Twitz nok alcyex altar in che cub coẍe' tibaj xbalun otok cyaj cyi'n te prent, ex tuj tja cydios in che'x c'al vin otok tzaj cylak'o'n tu'n cymult xjal. 9Atzun weye e baj naj aj Amorrey wu'ne cywitze, masque ma tij cywa'l ic tza'n twa'l tze' wi'ten ex puro cyuw ke ic tza'n tze' c'ol, pero bi'x e baj naj wu'ne te jumajx. 10Atzun cyeye e je'tz wi'ne tuj Ejipt ex 40 abk'i e ẍaklunjtze wu'ne tuj tzkij tx'otx' tu'n t-xi nk'o'ne cytx'otx' aj Amorrey te cyeye. 11Cyxol ke cycy'ajale e jaw nsc'o'ne junjun tu'n cyoc te nsanjele ex junjuntl e oc nk'o'ne te Nazarey. ¿Myape ax toc jlu, akeye aj Israel? Chi Kman. 12Atzun cyeye oc cylajwersine ke Nazarey tu'n t-xi cyc'a'n vin ex e oc cymayo'ne ke nsanjele tu'n mi'n t-xi cypacba'n nyole. 13Cybintze, oc nbincha'ye tu'n cybaj betz'ane cyu'n ke aj k'oj cyi'je, ic tza'n in cub betz'k'aj tx'otx' tjak' jun carret nojni wen tu'n nimcu che'l triw. 14Masque cye che ojkelane wen, pero mlay che tzokpaje; aju xjal at tipun, cbajel tipun, ex ke xjal cyuw cyc'u'j tuj k'oj, mlay che clet. 15Aju xjal at t-xobl plech mlay cub we' twitz aj k'oj ti'j, ke xjal cye che ojkelan, mlay che clet ex mi ke xjal cyjax cyibaj chej, ax icx mlay che clet. 16Tuj tk'ijlalil lu, aju xjal mas cyuw tc'u'j tuj k'oj che cyjel t-xo'n ke tmacbil in che ajben tuj k'oj tu'ntzun tbant tkelan oc tel ok. Ate Kman ma k'mante yol lu.

will be added

X\