AMÓS 1

1Atzun tkanil jlu tzaj tma'n Dios te Amós aju pastor ẍne'l tuj tnam Tecoa; in yolin cyi'j aj Israel tej atxtok cab abk'i tu'n ttzaj cyaknajnab tuj tk'ijlalil Uzías aju rey cye aj Judá, ex tuj tk'ijlalil Jeroboam aju tcy'ajal Joás ex rey cye aj Israel. 2Chi in tma'n: Oc ttzaj tk'ajk'ajel twi Kman in julin wen max twi witz Sión tuj Jerusalén, aju lugar te cywabl alumaj cbajel tzkij ex cbajel tzkij tiwitz tx'otx' Carmelo. 3Atzun yol lu in tma'n Kman: Nimcu mya ba'n ma cybincha aj Damasco, cyja'tzun mlayx tzic'x ti'j wu'ne tu'n mi'n tcub cycastiw tu'n tlaj ma che oc ten yajlal cye xjal aj Galaad, ex ic ma che oc cyu'n ic tza'n in baj wabat triw tu'n c'uxbil cyu'n chej oc nne'l bajut. 4Tu'n tlaj jlu c'oquel nk'o'ne tk'ak'al tja rey Hazael, ex tu'n k'ak' lu che bajel tz'e'y ke tja Ben-hadad jatum in cawin. 5C'oquex npa'ne tlamel tnam Damasco ex cnajel rey wu'ne, aju in cawin tuj chk'ajlaj Avén, tuc'ix ju rey in cawin tuj Bet-edén; atzun ke xjal aj Siria che xel k'i'n pres tuj tx'otx' Kir, chi Kman. 6Atzun yol lu in tma'n Kman: Nimcu mya ba'n ma bant cyu'n aj Gaza, cyja'tzun mlay tzic'x ti'j wu'ne tu'n mi'n tcub cycastiw, tu'nju ma txi cyi'n pres enter jun tnam xjal ex ma che'x cyc'ayin cye aj Edom tu'n cyoc te majen. 7Tu'n tlaj jlu c'oquel nkoptz'i'ne k'ak' ti'j muro toc ti'jele tnam Gaza, ex tu'n k'ak' lu che bajel tz'e'y ke tja rey jatum in cawin. 8Cnajel rey tuj tnam Asdod wu'ne, tuc'ix ju cawil at tuj tnam Ascalón. Tu'n tcyakil wipumale chin oquel tzokpaje ti'j tnam Ecrón ex misicyer jun aj Filistey cyjel ank'in, chi Kman Dios. 9Atzun yol lu in tma'n Kman: Nimcu mya ba'n ma cybincha aj Tiro, cyja'tzun mlay tzic'x ti'j wu'ne tu'n mi'n tcub cycastiw, tu'nju ma txi cyc'ayin enter tnam xjal cye aj Edom tu'n cyoc te majen ex minti' ma japun cyu'n aju cyyol cyaj bant ti'j cyuc'il mastl tnam ka tu'n cyonin cyib. 10Tu'n tlaj jlu, c'oquel nkoptz'i'ne k'ak' ti'j muro toc ti'jele tnam Tiro, ex tu'n k'ak' lu che bajel tz'e'y ke tja rey jatum in cawin. 11Atzun yol lu in tma'n Kman: Nimcu mya ba'n ma cybincha aj Edom, cyja'tzun mlay tzic'x ti'j wu'ne tu'n mi'n tcub cycastiw, tu'nju e oc lpe' cyi'j aj Israel akeju cyerman, e k'ojin cyi'j tuc'il cyspad tuj cyk'ab tu'n tcub cyi'j cyu'n. Minti' tzaj k'ak'an cyc'u'j cyi'j cyerman, cucx e k'ojin cyi'j ex bi'x ma txi cyc'u'n cytx'u'jil tuj cyanmi. 12Tu'n tlaj jlu c'oquel nkoptz'i'ne k'ak' ti'j tnam Temán, ex tu'n k'ak' lu che bajel tz'e'y ke tja rey jatum in cawin tuj tnam Bosra. 13Atzun yol lu in tma'n Kman: Nimcu mya ba'n ma cybincha aj Amón, cyja'tzun mlay tzic'x ti'j wu'ne tu'n mi'n tcub cycastiw, porque nok tu'n tel lak'e' cytx'otx' cu'x cyjako'n cyc'u'j ke xu'j otok tz'oc ten cyal ate' tuj tx'otx' Galaad. 14Tu'n tlaj jlu c'oquel nkoptz'i'ne k'ak' ti'j muro toc ti'jele tnam Rabá, ex tu'n k'ak' lu che bajel tz'e'y ke tja rey jatum in cawin oc matok in che sch'in ke xjal tuj k'oj ex in xumin cyk'ik' jbal wen. 15Atzunte rey cxel k'i'n tuj juntl tnam najchak junx cyuc'il ke xinak at cyoclen ttxlaj, chi Kman.

will be added

X\