Hechos 9

1Atzunte Saulo cucx t-xobtzan cyi'j ocslal ti'j Kajaw ex in tma'n tu'n cycyim tu'n, pontzun tuc'il nejenel cye pal cye xjal judiy, 2ex xi tkanin tu'n ttzaj k'o'n u'j te tu'ntzun tc'met oc tpon cyuj ke ja te c'ulbil tuj tnam Damasco, ex tu'n cytzaj c'alet keju che cnetel tu'n, tza'nx ke xinak ax icx ke xu'j, akeju otok txi cyocsla'n tkanil ba'n, tu'ntzun cyul ti'n pres tuj Jerusalén. 3Cyja'tok t-xi' tuj be, ch'ixtok tcanun tuj tnam Damasco, minaben cub koptz'aj jun spic'un ti'jele tzajni tuj cya'j. 4Cubtzun tz'ak twitz tx'otx', ex o tbi jun tk'ajk'ajel in tma'n: —Saulo, Saulo, ¿tiku'n in chin cub tyajla'na? 5Atzunte Saulo xi tma'n: —¿Alcyetzuna, Tat? Ex tzaj tma'n te: —Akine Jesús aju in baj tyajla'na; [nok in baj tc'ixbisan tiba ic tza'n jun wacẍ nne'tz t-xajo'n puy. 6Jawtzun lu'lun Saulo, tzaj t-xobil ex tma: —Tat, ¿titzun tajbila tu'n nbinchanteye? Atzunte Kajaw tma te:] —We'ctza ex txi'ya tuj tnam, ex ctzajel k'ma'n teya alcye tu'n tbinchanteya. 7Atzun ke xinak in che bettok tuc'il Saulo, e cyaj we', bi'x naj cynabl porque o cybi tk'ajk'ajel tyol jun xjal, pero minti' o cyil. 8Jawtzun we' Saulo twitz tx'otx' ex jaw tque'yin twitz, pero minti' bant tque'yin; cyja'tzun lach'o'n xi' cyu'n tuc'il, xi cyi'n tuj tnam Damasco. 9Atzun o ten ox k'ij, miban que'yin ex minti' o wa'n ex minti' o c'an. 10Attok jun ocslal tuj tnam Damasco Ananías tbi, ex tma Kajaw te ic tza'n tuj witzic': —Ananías, chi Kajaw. Atzunte xi ttzak'we'n: —Lu kine lu, Tat. 11Xitzun tma'n Kajaw te: —We'ctza ex txi'ya tuj cay toc tbi Jikun ti'j, ex jyoma jun xjal Saulo tbi, aju aj Tarso, atzun ta' tuj tja Judas; porque lu in na'n Dios, 12ex ma til ic tza'n tuj witzic' jun xinak Ananías tbi ma tz'ocx tuc'il, ex ma cub tk'o'n tk'ab tibaj tu'n tbant tque'yin, chi Kajaw te. 13Atzunte Ananías xi ttzak'we'n: —Tat, ma nbiye cye nimcu xjal ti'j ju xjal lu, nimcu mya ba'n in tbincha'n cyi'j keju ma che ocslan ti'ja tuj Jerusalén, 14ax icx ma tzul tzalu ex at toclen cyu'n ke nejenel cye pal cye xjal judiy tu'n cyxi tpresin cycyakil keju in na'njtz tbiya cyu'n, chi Ananías. 15Xitzun tma'n Kajaw te Ananías: —Txi'ya, porque nmajene jlu sc'o'maj wu'ne tu'n t-xi tk'o'n tkanil wi'je cye txkantl xjal mya judiy ke, ex cye cyrey, ex cye aj Israel. 16Porque cxel nyec'une te nic'pun ju ilxix ti'j tu'n tic'x tu'n tu'n nlaje, chi Kajaw. 17Xi'tzun Ananías, ex ocx tuja, cubtzun tk'o'n tk'ab tibaj twi' Saulo, ex tma: —Erman Saulo, ma chin tzaj sama'ne tu'n Kajaw Jesús aju cub tyec'un tib twitza tuj be tej cyja'tok ttzaja; ma chin tzaj sama'ne tu'n tjaket twitza ex tu'n tnoj tuj tanmiya tu'n Xewbaj Xjan, chi Ananías. 18Ex jurat el tz'ak tmu'pil tbak' twitz Saulo, ex jaket twitz; jawtzun we' ex o byan. 19Ex tej t-xi' twa oc juntl maj tipun. Ex ax cyaj ten Saulo cabe k'ij cyuc'il ocslal ax ate'tok tuj tnam Damasco. 20Ex bi'x oc ten Saulo pacbal cyuj ke ja te c'ulbil, in tma'n ka a Crist Tc'wa'l Dios. 21Ex cycyakil keju e binte tyol, bi'x jaw naj cynabl, in cyma'n: —¿Myapetzun a xjal lu in yajlan cye keju in na'njtz tbi Jesús cyu'n tuj Jerusalén, ex cyja'tzun ma tzul tzalu tu'n cyxi tpresin ke ocslal ex tu'n cypon ti'n cywitz ke nejenel cye pal cyxol xjal judiy? Che chi xjal. 22Atzunte Saulo tcyuwsaxix tib, in tchic'ba'nxix ka ate Jesús ju Crist aju at toclen tu'n Dios; cyja'tzun el tzpet cynabl xjal judiy tu'n, akeju najl ke tuj Damasco. 23Tbajlenxitzun nimcu k'ij, bant ti'j cyu'n xjal judiy tu'n tcub Saulo cyu'n; 24pero at jun xjal pon k'malte te Saulo ti'j ju otok bant ti'j cyu'n. Ex e cub ten xjal xk'ukil ttzi tpwertil tnam k'ijl ex konic'an tu'n tcub cybyo'n. 25Atzun cye ocslal, te konic'an cu'tz cyk'o'n twi muro tuj jun chi'l tu'n tcubil twitz tx'otx'. Cyja'tzun tten tzokpaj Saulo. 26Tej tpon Saulo tuj Jerusalén, o tajbe tu'n tten cyxol ocslal; pero cycyakil in che xobtok ti'j, minti' xi cyniman ka otok tz'ocslan Saulo. 27Xi'tzun Bernabé uc'il te, ul ti'n cywitz apostl, ex xi ttx'olba'n cye tza'n tten o til Saulo Kajaw tuj be, ex tza'n tten o yolin Kajaw tuc'il, ex tza'n tten o pacban Saulo ti'j Jesús tuj tnam Damasco minti' t-xobil. 28Tentzun Saulo cyuc'il tuj Jerusalén; ex o bet junx cyuc'il, 29ex in pacban ti'j Kajaw minti' t-xobil, ex nim o yolin ti'j cyuc'il xjal judiy ba'n che yolin tuj grieg; atzun cye oc tilil cyu'n tu'n tcub cybyo'n. 30Tejtzun cybinte ke erman jlu, xi k'i'n Saulo cyu'n tuj tnam Cesarey, ex atzun xi cysama'n tu'n tpon tuj tnam Tarso. 31Atzun cye ocslal tuj junjun tnam tuj tcyakil Judey ex tuj Galiley ex tuj Samaria e cyaj ten tuj txubtxaj. In che ch'iytok tuj cyocslabl, ex in che ank'in niman Kajaw cyu'n, ex in k'ukbanjtz cyc'u'j tu'n Xewbaj Xjan; cyja'tzun in che chmet-xi junjun k'ij. 32Extzun Pedro visitaril cye ocslal tuj tcyakil tnam, ax icx pon cyuc'il ke ocslal najl tuj tnam Lida. 33Atzun oc noj ti'j jun xjal Eneas tbi otok bant wajxak abk'i coẍl twitz tcoẍbil, porque tzkijle'n tyabil. 34Xitzun tma'n Pedro te: —Eneas, cbanixela tu'n Jesucrist; we'ctza ex balk'i'nctz tcoẍbila, chi Pedro. Jurattzun jaw we' Eneas. 35Ex o cyil cycyakil xjal najl tuj tnam Lida ex tuj tnam Sarón aju binchben lu, cyajtzun cyk'o'n ju ojtxi cyten ex e ocslan ti'j Kajaw. 36Ex attok jun xu'j tuj tnam Jope ocslal ti'j Kajaw, Tabita tbi, atzun tuj yol grieg Dorcas tbi. Aju xu'j lu nimcu tbinchben ba'n, ex nimcu cycotz xjal in xi tk'o'n. 37Atxtok Pedro tuj tnam Lida tej tyabt Dorcas ex cyim. Ex tbajlenxi tx'jet ti'j t-ximlal, cub cyk'o'n tuj tcab colin ja. 38Tejtzun cybinte ke ocslal ka attok Pedro tuj tnam Lida, xi cysama'n cabe xjal txcol te, porque nikayintok ta' tnam lu. Tej cypon e cubsan twitz Pedro ex cyma: —Tzaj naja kuc'ile, che chi. 39Jawtzun we' Pedro ex xi' cyuc'il; ex tej tpon, xi cyi'n tuj tcab colin ja; octzun cychmon cyib cycyakil meba xu'j ti'jele Pedro, in che ok' ex tzaj cyyec'un ke xbalun ex ke clo'j e bant tu'n Dorcas ex otok txi tk'o'n te cycotz tej itz'xtok. 40E etztzun tlajo'n Pedro cycyakil xjal tuja, cub ẍmeje' ex oc ten na'l Dios; ajtzun tque'yin jatum ta' cyimni, ex tma: —We'ctza, Tabita. Atzunte Tabita jaw tque'yin twitz; tejtzun tque'yinte ka attok Pedro, jawtzun ke'. 41Tzaj ttzyu'n Pedro tk'ab Tabita, ex jaw twaban; e ocxtzun ttxco'n ke ocslal ex ke meba xu'j, ex cub tk'o'n cywitz otok tzul tnabl. 42Eltzun tkanil jlu tuj tcyakil tnam Jope, ex nimcu xjal e ocslan ti'j Kajaw. 43Ex tbajlenxi jlu, ax o cyaj ten Pedro nim k'ij tuj tnam Jope tuj tja jun xjal Simón tbi, aju tzk'ajsal tz'u'm.

will be added

X\