1 Aju nejenel cye pal cye judiy xi tkanin te Esteban cyja': —¿Axpe toc ic tza'n in cyma'n ke xjal lu? 2 Xi ttzak'we'n Esteban: —Akeye erman ex akeye tat, cybintze nyole. Aju Dios ma'xix toclen cub tyec'un tib twitz kxe'chel Abraham tej atxtok tuj tx'otx' Mesopotamia, na'nxtok tpon tuj Harán, 3 ex tma Dios te: Tetza tuj ttanmiya, cyxol ke t-xjalila, ex txi'ya tuj tx'otx' cxel nyec'une teya, chi Dios te. 4 Etztzun Abraham tuj cytx'otx' aj Caldey ex pon tuj Harán. Tcyimlenxitzun tman, tzajtzun k'i'n Abraham tu'n Dios, ul k'i'n tuj tx'otx' tzalu jatum najl keye ja'lo. 5 Pero minti' xi tk'o'n Dios tetzbil Abraham, mi jun piẍ tx'otx'; nok o'cx xi ttziyan Dios te tu'n t-xi tk'o'n aju tx'otx' te tetzbil ex te tibajxi te cyetzbil tiyjil, masque na'nxtok titz'j jun tc'wa'l Abraham tej tyolin Dios tuc'il. 6 Ex xi tma'n Dios te cyja': Ke tiyjila che oquel te stranjer xjal tuj ttx'otx' juntl nasyon, ex che oquel te cymajen xjal, ex che bajel yajla'n cyu'n tuj cyaje syent abk'i. 7 Pero cbel nk'o'ne tcastiw nasyon jatum che tel te majen; tbajlenxitzun jlu che eletz ex che ajbel weye tuj lugar tzalu, chi Dios. 8 Banttzun ti'j jun yol tu'n Dios tuc'il Abraham, ex tma tu'n tbant ju sircunsisyón te jun techal ti'j ju yol tzaj ttziyan Dios te. Cyja'tzun, tej tul itz'j Isaac aju tcy'ajal Abraham, o sircunsidarinjtz tu'n Abraham tuj twajxakin k'ij; ax icx tej tul itz'j Jacob aju tcy'ajal Isaac, o sircunsidarinjtz tu'n Isaac; ax icx tej cyul itz'j ke cablaj tcy'ajal Jacob, e sircunsidarinjtz tu'n Jacob; akeju tc'wa'l Jacob atzun cyxe'chel cablaj c'loj aj Israel. 9 Atzun ke tcy'ajal Jacob akeju kxe'chel tzaj tlo'ch cyc'u'j ti'j José aju cyitz'in, ex xi cyc'ayin cye xjal, pontzun k'i'n José tuj tx'otx' Ejipt; pero ate Dios attok tuc'il, 10 ex o colin ti'j tuj tcyakilju yajbil te, ex xi tk'o'n tnabl tu'n tel ba'n tuj twitz Faraón aju rey cye aj Ejipt; entons oc k'o'n José te gobernador tuj Ejipt tu'n rey ex tu'n tcawin José cyibaj cycyakil keju ate' tuj tja rey. 11 Tzajtzun jun we'yaj cyibaj cycyakil xjal tuj tx'otx' Ejipt ax icx tuj tx'otx' Canaán, ex nimxix yajbil tzaj cyibaj xjal, atzun cye kxe'chel minti' cnet cywa. 12 Tejtzun tbinte Jacob ka at triw tuj Ejipt, e je'x t-sama'n ke tcy'ajal tnejel maj, akeju kxe'chel. 13 Tejtzun cyxi aj tcabmaji'n, tzaj tyec'un tib José tu'n tel cynic' ttzic ti'j, ex tbitzun rey alcye tiyjil José. 14 E tzajtzun t-sama'n José ke xjal k'ilte Jacob, aju tman, cyuc'ix cycyakil ke terman, 75 cybet. 15 Cyja'tzun tten pon Jacob tuj Ejipt, ex ax o cyim tuj Ejipt, ax icx cye kxe'chel ax e cyim tuj Ejipt. 16 Atzun cybakil ajtz k'i'n tu'n tul tuj Siquem, ocx cyk'o'n aj Israel tuj toy' pic tuj ju tx'otx' aju otok lak'et tu'n Abraham tu'n pwak cyuc'il tc'wa'l Hamor tuj Siquem. 17 Tejtzun tul lak'e' tk'ijlalil tu'n tjapun aju tziyimaj tu'n Dios, aju otok tma Dios tu'nx tib te Abraham, chmettzun cyajlal kxjalil ex e chmet-xix tuj Ejipt. 18 Te yajxitl oc juntl rey tuj tx'otx' Ejipt, aju minti' ojtzki'n twitz José tu'n. 19 Aju rey lu oc ten sbul cye kxjalil, ex e yajlanjtz kxe'chel tu'n ojtxi, ex tma cye tu'n tex cyxo'n ke tal cyc'wa'l tu'n cycyim. 20 Tujxtzunju tk'ijlalil lu ul itz'j Moisés, ex tbanilxix que'yin tuj twitz Dios; ox xjaw o ch'iysanjtz tuj tja tman. 21 Pero tej tex k'i'n tu'n tcyim, aju tme'jel rey xi k'inte ex o tch'iysa ic tza'n tex tal. 22 Ex o xnak'tzanjtz Moisés tu'n toc tnabl tuj tcyakil ic tza'n cye aj Ejipt; ex at tipumal tyol ex tak'unben. 23 Tej tjapun 40 abk'i tu'n Moisés, ul tuj tanmi tu'n t-xi' visitaril cye aj Israel, akeju t-xjalil. 24 Tejtzun t-xi tque'yin in c'ixbisanjtz jun terman, xi colil ti'j, ex cub tbyo'n Moisés aju aj Ejipt tu'ntzun t-xelin ti'j, porque otok c'ixbi ju aj Israel tu'n. 25 Tuj tnabl Moisés ka tu'n tel cynic' t-xjalil ti'j ka ax Dios ctzokpil cye nok tu'n Moisés; atzun cye minti' el cynic' ti'j. 26 Te juntl k'ij oc noj Moisés cyi'j cabe aj Israel in che k'ojl, ex o tajbe tu'n tbant cyten tu'n mi'n cyk'ojintl, ex xi tma'n cye: Tat, cyitz'in cyibe, ¿tiku'n in che k'ojine? 27 Atzun teju in c'ixbisante tuc'il, ex lamo'n Moisés tu'n, ex tma: ¿Alcye ma tz'oc k'onte teya te jwes tu'n tcawina kibaje? 28 ¿Tajpeya tu'n ncub tbyo'na, ic tza'n cub tbyo'na jun aj Ejipt ew? Chi xjal. 29 Tej tbinte Moisés ju yol lu el ok, ex xi' tuj tx'otx' Madián, oc te stranjer xjal tuj tx'otx' lu; axtzun e itz'j cabe tcy'ajal. 30 Tbajlenxitzun 40 abk'i, cub tyec'un tib jun anjel twitz Moisés tuj jun lugar minti' cynajbil xjal tuj t-xe witz Sinaí, cub tyec'un tib anjel tuj tkan k'ak' in c'ant ti'j jun wi' ch'i'x. 31 Tejtzun tque'yinte Moisés jlu, jaw labin ti'j ju oc tque'yin; tejtzun t-xi lak'e' que'yilte, tbitzun tk'ajk'ajel twi Kman in tma'n: 32 Akine Cydios ke t-xe'chela, akine Tdios Abraham, ex Tdios Isaac, ex Tdios Jacob, chi Dios. Atzunte Moisés jaw lu'lun ex tzaj t-xobil, minti' xi tque'yin tu'n tchi. 33 Tzajtzun tma'n Kman te: K'i'mela t-xajbiya, porque aju lugar jatum tcuba tx'otx' xjan. 34 Ax toc ma wile yajbil cye ke xjal etzan wu'ne, akeju ate' tuj Ejipt, ma nbiye in che ayin, ex ma chin cu'tze tzokpil cye. Ja'lotzun tzaja, cxel nsama'na tuj Ejipt, chi Kman te. 35 Masque otok tz'el ic'un Moisés cyu'n aj Israel ex otok cyma te cyja': ¿Alcye ma tz'oc k'onte teya te jwes tu'n tcawina kibaje? Che chi. Pero axte Moisés xi t-sama'n Dios tzokpil cye ex tu'n tcawin cyibaj, tu'nju otok tma anjel te, aju cub tyec'un tib twitz ti'j jun wi' ch'i'x. 36 E je'tztzun k'i'n ke kxe'chel tu'n Moisés tuj Ejipt, ex tbincha Moisés ke binchben nim cyipumal ex ke señ tuj tx'otx' Ejipt, ex tuj mar Cyak Que'yin, ex tuj lugar minti' cynajbil xjal tuj, jatum e ten 40 abk'i. 37 Axte Moisés o k'mante cye aj Israel: Cjawil t-sc'o'n Kman Dios jun t-sanjel ax cyxol ke cyermaniye tu'n tten cyuc'ile, ic tza'n kine. 38 Ex axte Moisés aju o ten cyxol aj Israel tuj lugar minti' cynajbil xjal tuj, ex o ten aju anjel tuc'il ex o yolin tuc'il twi witz Sinaí, ax icx o ten Moisés cyuc'il ke kxe'chel, ex o tc'am ju yol te chwinklal tu'n ttzaj tk'o'n ke. 39 Atzun cye kxe'chel minti' xi cyniman, nok o'cx el cyic'un, ex aju tajbil cyanmi tu'n cyaj meltz'aj juntl maj tuj Ejipt. 40 Xitzun cyma'n te Aarón: Binchama junjun kdiose tu'n cycub nej kwitze; porque minti' ba'n ku'ne ti ma baj ti'j Moisés aju etz k'inte ke tuj tx'otx' Ejipt, che chi. 41 Cubtzun cybincha'n jun tilbilal tal wacẍ, ex cub cybyo'n ke alumaj te jun oyaj twitz, ex e tzalajxix ti'j tilbilal tal wacẍ aju otok cub cybincha'n. 42 Atzunte Dios el tpa'n tib cyi'j, ex e je'x ttzokpi'n tu'n cyc'ulun cywitz ke che'w ate' twitz cya'j; ic tza'nx tz'iban tuj cyu'jil t-sanjel Dios, in tma'n cyja': —Akeye aj Israel, ¿baka weye tzaj cyk'o'ne cyoyaje cyuc'ix ke alumaj e cub cybyo'ne tej cytene 40 abk'i tuj lugar minti' cynajbil xjal tuj? 43 O'cx xi cyi'ne aju tja jun dios Moloc tbi, xbalun ja, ex ju tilbilal jun che'w Renfán tbi oc te cydiose. Cybinchaye ke tilbilal lu tu'n cyc'ulune cywitz. Cyja'tzun che xel nk'a'cje max ti'jxi Babilonia, chi tuj Tu'jil. 44 Tej cyten kxe'chel tuj lugar minti' cynajbil xjal tuj, ajben cyu'n jun ja xbalun te nabl Dios, jatum c'u'n ke tz'lom abj tz'iban tley Dios cywitz. O bant ja lu ic tza'nx tzaj tma'n Dios te Moisés, tzaj tma'n tu'n tbinchet ju ja ic tza'nx otok tzaj yec'un te. 45 Cyc'amtzun ke kxe'chel ju ja xbalun te nabl Dios, ex tuc'ix Josué at cyuc'il tej tul cyi'n ju ja lu tej ttzyet cytx'otx' txkantl xjal cyu'n, akeju e ex tlajo'n Dios cywitz kxe'chel ex cyja'xtzun tten tej toc David te rey. 46 Ba'n e'la tmod rey David tuj twitz Dios, ex o tajbe David tu'n tbinchante jun ja te tnajbil Dios, aju Tdios Jacob. 47 Pero ate Salomón jaw binchante tja Dios, 48 masque aju Dios ma'xix toclen myatzun ax najl tuj jun ja cybinchben xjal, ic tza'n in tma'n Dios tu'n t-sanjel chi cyja': 49 Ate cya'j nk'ukbile tu'n ncawine, ex aju tx'otx' tcub tjak' nkane. ¿Alcyetzun jun ja oc cybincha'ye weye? ¿Ex jatum ta' jun lugar te wojlable? 50 ¿Myapetzun tu'n nk'abe xbant tcyakil jlu? Chi Kman. 51 Cyuw keye, minti' in xi cybi'ne, ex minti' in xi cyocsla'ne tuj cyanmiye, ex minti' in xi cybi'ne tu'n cyẍcyine. Cucx tic' nej cyrasone twitzju te Xewbaj Xjan. Ic tza'n o cybincha cyxe'chele ojtxi, ax icxtzun cyeye in cybincha'ne. 52 ¿Atpe jun t-sanjel Dios minti' o yajlanjtz cyu'n cyxe'chele ojtxi? Ex cyu'ntzun e cub byo'n ke t-sanjel Dios, akeju o cyma tkanil ojtxi ka attok tulel ju Crist aju Tz'aklxix, atzun cyeye o txi cyk'o'ne tuj cyk'ab Aj Sanjelal, ex o cub cybyo'ne. 53 Akeye cyc'ame aju ley tzaj cyk'o'n anjel, pero minti' ma japun cyu'ne, chi Esteban. 54 Tejtzun cybinte xjal tcyakil tyol Esteban, tzaj nimxix cyk'oj tuj cyanmi ex o kitx'itx'in t-xe' cye' ti'j. 55 Atzunte Esteban nojni tuj tanmi tu'n Xewbaj Xjan, jaw tque'yin twitz cya'j ex o til t-spic'umal Dios tuj cya'j tuc'ix Jesús wa'l ttxlaj Dios tuj bank'abaj. 56 Tmatzun Esteban: —Ma wile cya'j catl, ex lu Jesús wa'l ttxlaj Dios tuj bank'abaj, aju sc'o'maj tu'n Dios tu'n tten cyuc'il xjal. 57 Atzun cye xjal jaw tk'ajk'ajel cywi' cyuwxix, ex oc cymaksi'n tuj cyẍcyin, e pon tilj ti'j. 58 Extzun cyi'n ti'jxi tnam, octzun cyxo'n tu'n abj; atzun cye testiw nic'al yol ti'j el cyi'n cyẍjo'w toc cyi'j, cyaj cyk'o'n tuj tcwent jun cu'xun Saulo tbi. 59 Ex matok nno'c xo'n Esteban tu'n abj cyu'n, oc ten na'l Dios ex tma: —Jesús Wajaw, c'monxa wanmiye, chi Esteban. 60 Cubtzun ẍmeje' ex jaw tk'ajk'ajel twi' cyuw: —Tat, mi'n tz'oc tk'o'na cybinchben xjal lu te jun il. Tej tbaj tma'n jlu, cyimtzun.
Copyright ℗ 2000 Hosanna Grabado por Producciones Cristianas Vina