Hechos 6

1Tbajlenxi jlu ch'iy cyajlal ocslal. Ex tzaj jun cyyol ke judiy ba'n che yolin tuj grieg cyi'j ke judiy ba'n che yolin tuj ebrey, tu'nju minti' pon c'a'chbil cye meba xu'j ate' cyxol oc in sipanjtz wabj junjun k'ij. 2Atzun cye cablaj apostl oc cychmo'n cycyakil ocslal ex xi cyma'n cye: —Mya tuj tumel tu'n tcyaj tuj kcwente aju c'a'chbil cye ocslal ex tu'n t-xi kcoline tu'n t-xi kpacba'ne tyol Dios. 3Cyja'tzun erman, cysc'o'n jawe wuk xinak cyxole, ba'nxix cyten, ex nojni tuj cyanmi tu'n Xewbaj Xjan, ex at cynabl, tu'ntzun cyoc kk'o'ne ti'j ju ak'untl lu. 4Atzun keye, o'cx kak'une tu'n kna'ne Dios ex tu'n t-xi kk'o'ne xnak'tzbil ti'j tyol Dios, che chi apostl. 5Ba'ntzun e'la ju yol lu tuj cywitz cycyakil ocslal; ex jaw sc'o'n Esteban cyu'n, at-xix tocslabl xinak lu ex nojni tuj tanmi tu'n Xewbaj Xjan, tuc'ix Pelip, tuc'ix Prócoro, tuc'ix Nicanor, tuc'ix Timón, tuc'ix Parmenas, ex tuc'ix Nicolás aju aj Antioquiy, aju otok tocsla cyley xjal judiy. 6E pontzun cyi'n cywitz apostl; atzun cye apostl e oc ten na'l Dios cyi'j, ex cub cyk'o'n cyk'ab tibaj cywi'. 7Ex in ch'iyxi tyol Kajaw, ex in chmet-xi nimxix cyajlal ocslal tuj Jerusalén; ax icx nimcu pal cye judiy xi cyocsla'n aju ocslabl lu. 8Atzunte Esteban nim t-xtalbil Dios tcub tibaj ex at tipumal Dios tuc'il, ex e tbincha ke binchben nim cyipumal ex ke señ cyxol xjal. 9E jaw tzokpaj junjun xinak at cyoclen tuj ja te c'ulbil toc tbi ja cye xjal Tzokpi'maj ke, cyuc'ix junjun aj Cirén, ex cyuc'ix junjun aj Alejandriy, cyuc'ix junjun aj Cilicia ex cyuc'ix junjun aj Asia, e oc ten yolil ti'j tley Moisés tuc'il Esteban. 10Pero minti' bant tu'n tmaket tyol Esteban cyu'n, porque tzaj tk'o'n Xewbaj Xjan tnabl tza'n tten tu'n tyolin. 11Entons e chjet junjun xjal cyu'n tu'n t-xi cyma'n cyja': Ma kbiye in yolin jlu mya ba'n ti'j Moisés ex ti'j Dios, che chi. 12Cyja'tzun e jaw tilj xjal cyu'n cyuc'ix ke cytijil xjal ex cyuc'ix ke xnak'tzal ti'j ley; e pon tilj ti'j Esteban, tzyettzun cyu'n, ex xi cyi'n cywitz Aj Sanjelal cye xjal judiy. 13Ex oc cyk'o'n junjun testiw nic'al yol tu'n t-xi cyma'n cyja': —Ate xjal lu cucx tyolin ex cucx t-xmayin ti'j tja Dios xjan te ex ti'j tley Moisés. 14Porque ma kbiye in tma'n ka tu'n tcub xitj tja Dios lu tu'n Jesús aj Nazaret ex tu'n cych'expet ke costumr tu'n, akeju e cyaj tk'o'n Moisés ke, che chi testiw nic'al yol. 15Cycyakiltzun aj sanjelal k'ukl ke'tok, tej toc cyque'yin twitz Esteban, o cyil twitz ic tza'n twitz jun anjel.

will be added

X\