1 Pero attok juntl xinak Ananías tbi, ex Safira tbi t-xu'jil, xi cyc'a'yin jun piẍ cytx'otx'. 2 Ex bant ti'j tu'n tuc'il t-xu'jil tu'n tcyaj cytzyu'n ch'in twi tx'otx' te cye; noktzun mijx ul ti'n, ex xi tk'o'n tuj cyk'ab apostl. 3 Xitzun tma'n Pedro te: —Ananías, ¿tiku'n ma txi tk'o'na ambil te Satanás tu'n tocx tuj tanmiya tu'n tnic'ana yol twitz Xewbaj Xjan, ma cyaj ttzyu'na mij twi tx'otx'? 4 ¿Na'nxtok t-xi tc'a'yina tx'otx', myapetzun teya? ex tej t-xi tc'a'yina tx'otx', ¿myapetzun tuj tcwenta ta' twi'? ¿Tiku'n ma cub t-ximana tuj tanmiya icju? Mya twitz xjal ma nic'ana yol, nok o'cx twitz Dios. 5 Tejtzun tbinte Ananías ju yol lu, cub tz'ak ex cyim. Tzajtzun nim cyxobil cycyakil keju e binte jlu. 6 E ultzun junjun cu'xun, ocx cybalk'i'n t-ximlal Ananías tuj jun xbalun, ex cyi'n ex cu'x cymaku'n. 7 Matok ox or tbajlen jlu tej tul t-xu'jil Ananías, ocx tuja minti' ba'n tu'n ti otok baj ti'j tchmil. 8 Xitzun tkanin Pedro te: —K'mantza, ¿icpetzun twi tx'otx' xi cyc'a'yine ic tza'n ma cymaye? Atzunte xu'j tma: —Ictzun twi'ju. 9 Xitzun tma'n Pedro te: —¿Tiku'n xbant ti'j cyu'ne tu'n toc T-xew Kman tuj joybil ti'j cyu'ne? Binxa, lu ma che ul ke cu'xun ttzi ja, akeju ma che'x aj makulte tchmila; icxtzun c'elex k'i'na cyu'n. 10 Bi'x cub tz'ak naj ju xu'j t-xe tkan Pedro ex cyim. Tejtzun cyocx ke cu'xun tuja, otok cyim te xu'j; etztzun cyi'n, ex cu'x cymaku'n ttxlaj tchmil. 11 Tzajtzun nim cyxobil cycyakil ocslal, ex tzaj cyxobil cycyakil xjal akeju e binte jlu. 12 Ex nimcu cybinchben apostl nim cyipumal ex nimcu ke señ cybincha cyxol xjal tu'n tipumal Dios; ex junxtok cychmon cyib cycyakil twitz ja te Salomón tbi. 13 Atzun cye mastl xjal minti' oc cynimarin cyib tu'n toc cymojban cyib cyuc'il apostl; pero e yolin ba'n cyi'j. 14 Ex nimcu xjal e ocslan ti'j Kajaw; tcyakil k'ij cucx in che ocslan tza'nx ke xinak ax icx ke xu'j; 15 cyja'tzun e je'tz k'i'n ke yab ttzi be, ex cub cyk'o'n twitz watbil ex twitz coẍbil, ichak nok t-xlecumal Pedro tzic' aj cyibaj yab oc tic' tuj be. 16 Ax icx nimcu xjal in che tzajtok cyuj ke tnam nikayin ttxlaj Jerusalén, e ul tuj Jerusalén k'i'n ke yab cyu'n ex keju in che yajlanjtz cyu'n ju'ẍ, ex cycyakil e banix. 17 Jawtzun we' ju nejenel cye pal cyxol judiy cyuc'ix ke tuc'il, akeju jun c'loj xjal sadusey cybi, ex tzaj tlo'ch cyc'u'j cyi'j apostl; 18 ex e tzaj cytzyu'n ke apostl, e ocx cyk'o'n tuj pres tuj tnam. 19 Pero ul jun t-anjel Kman te konic'an, e jaket ke pwert tu'n jatum ate' ke pres, e je'tztzun ti'n ke apostl, ex xi tma'n cye: 20 —Cyxi'ye, ex che we'cuye tuj tja Dios, ex cymanxe cye xjal tkanil yol te chwinklal, chi anjel. 21 Tejtzun cybinte ke apostl ju yol lu, e ocx tuj tja Dios te prim ex xi cyk'o'n xnak'tzbil cye xjal. Bajtzun cychmon cyib ke nejenel cye pal cyxol judiy cyuc'ix ke cyuc'il, ex e je'x txocbaj ke Aj Sanjelal cye xjal judiy cyu'n, ax icx cycyakil ke cytijil xjal aj Israel, ex xitzun cysama'n ke polisiy k'ilte cye apostl tuj pres. 22 Tejtzun cypon ke polisiy minti' e cnet ke apostl cyu'n tuj pres; e ajtztzun meltz'aj k'olte tkanil, 23 che chi cyja': —Ax toc aju cyja pres ma cnet ku'ne lamo'nxix wen, ex ke xk'ukil pres ma che cnet ku'ne wa'l ke ttzi pwert; pero tej xjaket ku'ne, mi jun xjal at tuj, che chi. 24 Tejtzun tbinte nejenel cye xk'ukil tja Dios aju yol lu, cyuc'ix ke nejenel cye pal, tzaj jun cyximbetz ti'j jatum cpol we' tcyakil jlu. 25 Pero ul jun xjal cyuc'il tzaj tma'n tkanil cye, chi cyja': —Akeju xinak ocx cyk'o'ne tuj pres, lu ke ate' tuj tja Dios, in cyk'o'n xnak'tzbil cye xjal, chi xjal. 26 Xi'tzun aju nejenel cye polisiy cyuc'ix ke polisiy, ex cheba e tzaj cyi'n, porque tzaj cyxobil tu'n mi'n cyoc xo'n tu'n abj cyu'n xjal. 27 E ultzun k'i'n apostl cywitz Aj Sanjelal cye xjal judiy, ex xitzun tkanin nejenel cye pal cye apostl, chi cyja': 28 —¿Minti'pe xi cybi'ne aju orden xi kk'o'ne cyeye tu'n mi'n t-xi cyk'o'ntle xnak'tzbil ti'j xjal lu? Atzun ja'lo ma cybi cycyakil xjal aju cyxnak'tzbile tuj tcyakil Jerusalén, ex cyajbile tu'n toc cyk'o'ne te keye kil aju tcyimlen ju xjal lu, che chi. 29 Xi cytzak'we'n Pedro ex ke mastl apostl: —Tnejel ilxix ti'j tu'n t-xi knimane Dios, ex mya ke xjal. 30 Aju Cydios kxe'chel jaw ank'in Jesús tu'n, aju jaw cyyobine twitz jun crus, ex cub cybyo'ne. 31 Ate jlu ma jaw tnimsa'n Dios, ma cub tk'o'n ttxlaj tuj bank'abaj tu'n toc te Nejenel ex Colol, tu'ntzun tajtz ti'j cyanmi aj Israel ex tu'n tnajset cyil. 32 Ex testiw ko'ye ti'j tcyakil jlu, ax icx te Xewbaj Xjan testiw ti'j, aju ma tzaj tk'o'n Dios cye keju in che niman te, che chi apostl. 33 Tejtzun cybinte Aj Sanjelal jlu, tzaj nimxix cyk'oj, ex o cyajbe tu'n cycub byo'n apostl cyu'n. 34 Pero at jun parisey cyxol Aj Sanjelal, Gamaliel tbi, chic'bal ti'j ley, ex nimanxix cyu'n cycyakil xjal. Cub we' Gamaliel ex xi tma'n tu'n cyetz k'i'n ke apostl ttxa'n pe'n nok te ch'in tuj. 35 Xitzun tma'n cye Aj Sanjelal: —Akeye xinak aj Israel, cyk'o'nque cwent ti'j ju oc cybincha'ye cyi'j xjal lu. 36 Porque na'n cyu'ne, ela'xi k'ij ul jun xjal Teudas tbi, tma ka ma' toclen. Ex atlo cyaje syent xjal e oc lpe' ti'j. Pero cub byo'n Teudas ex cycyakil keju e oc lpe' ti'j e je'l sputj ex e cub naj. 37 Tbajlenxi jlu ul jun xjal Judas tbi, aj Galiley; ul tuj tk'ijlalil tu'n ttz'ibanjtz cybi xjal, ex nim xjal e oc lpe' ti'j. Pero ax icx cub byo'n te jlu, ex cycyakil keju e oc lpe' ti'j e el sputj. 38 Ja'lotzun cxel nma'ne cyeye: Mi'n tz'oc cyk'on cyibe cyi'j xjal lu, ex mi'n che labte cyi'j; porque ka cyu'n xjal aju cyximbetz lu ex ju cyak'un, c'oquel yupjtzun; 39 pero ka tu'n Dios, mlay bant tu'n tyupj cyu'ne; atwit tchi tuj cywitze, mya yajcu ti'j Dios in che k'ojine, chi Gamaliel. 40 Xitzun cyniman tyol Gamaliel; e tzajtzun cytxco'n ke apostl ex e baj cyasyalin, ex xi cyma'n cye tu'n mi'n cyyolintl ti'j Jesús, ex e je'xtzun cytzokpi'n. 41 E je'tztzun ke apostl cywitz Aj Sanjelal in che tzalaj tu'nju ba'n e'la tuj twitz Dios tu'n tcub cych'ixwi cywitz xjal, nok tu'n tlaj ocslal ke ti'j Jesús. 42 Ex tcyakil k'ij minti' xi cycolin tu'n t-xi cyk'o'n xnak'tzbil tuj tja Dios ex tujile cyja xjal ex tu'n t-xi cypacba'n tkanil ba'n ti'j Jesús aju at toclen tu'n Dios.
Copyright ℗ 2000 Hosanna Grabado por Producciones Cristianas Vina