Hechos 4

1Matok in yolin Pedro tuc'ix Juan cyuc'il ke xjal, e ul tilj ke pal cye judiy tuc'ix nejenel cye polisiy xk'ukil tja Dios ex cyuc'ix ke sadusey. 2Tzaj cyk'oj cyi'j tu'nju in cyk'o'ntok xnak'tzbil cye xjal, ex tu'nju in cypacba'n tu'n cyjaw ank'in ke cyimni ic tza'n te Jesús jatz ank'in. 3Tzyettzun Pedro cyu'n, tuc'ix Juan, ocx cyk'o'n tuj pres, texi juntl k'ij e je'tz k'i'n, porque otok tz'oc kax. 4Pero nimcu xjal cybi cyyol, ex e ocslan; japuntzun cyajlal xinak balo jwe' mil. 5Texi juntl k'ij baj cychmon cyib ke nejenel cyxol xjal judiy tuj Jerusalén, cyuc'ix ke cytijil xjal, ex cyuc'ix ke xnak'tzal ti'j ley, 6ex tuc'ix Anás aju nejenel cye pal, tuc'ix Caipás, tuc'ix Juan, tuc'ix Alejandro, ex cyuc'ix cycyakil cyiyjil nejenel cye pal. 7Tzajtzun k'i'n Pedro tuc'ix Juan ex cub cyk'o'n cyxol, ex xi cykanin cye: —¿Ti cyoclene, ex alcye saj k'mante cyeye tu'n cybinchanteye jlu? 8Atzunte Pedro, nojni tuj tanmi tu'n Xewbaj Xjan, xi tma'n cye: —Akeye nejenel cyxol xjal ex cytijil aj Israel keye: 9Ma ko oque tuj xjel cyu'ne ti'j jun ba'n xkbinchaye te jun xjal yab, tza'n tten xbanix. 10Cxeltzun kchic'ba'ne cyeye ex cye cycyakil xjal aj Israel: Ate xjal lu aju wa'l cywitze ma banix nok tu'n tipumal Jesucrist aj Nazaret, aju jaw cyk'o'ne twitz crus, pero o jatz ank'in cyxol cyimni tu'n Dios. 11Ate Jesús aju abj el cyic'une akeye binchal ja, pero ma tz'oc te scyini te simyent. 12Ex mi a'l juntl clol ke; porque tuj tcyakil twitz tx'otx' minti' ma tzaj tma'n Dios ka at juntl tu'n kclet tu'n, chi Pedro xi tma'n cye. 13Tejtzun cyque'yinte aj sanjelal minti' cyxobil Pedro tuc'ix Juan, e labin cyi'j, porque ba'n cyu'n ka mya xnak'tzamni ke tuj scwel, ex tal ak'nal xjal ke; ex el cynic' cyi'j ka otok che ten tuc'il Jesús. 14Ex oc cyque'yin aju xjal otok banix wa'l ttxlaj Pedro ex Juan, ya minti'tl tumel tu'n cyyolin mastl cyi'j. 15O'cx xi cyma'n aj sanjelal cye tu'n cyex lak'e' cyxol; ex e oc ten yolil ti'j cyxolx, 16in cyma'n: —¿Ti c'oquel cyi'j xjal lu? Porque ma baj cybi'n cycyakil xjal, akeju najl tuj Jerusalén, ti'j jun señ nim tipumal ma cybincha, ex mlay bant tu'n tcub kewan jlu. 17Pero tu'n mi'n tel mastl tkanil cyxol xjal, kxobtza'n oc ke tu'n mi'n cyyolin mastl ti'j Jesús, che chi. 18E tzajtzun cytxco'n ex xi cyma'n cye: Mi'n che yoline ex mi'n txi cyk'o'ntle xnak'tzbil ti'j Jesús, che chi. 19Atzunte Pedro tuc'ix Juan xi cytzak'we'n: —Cyximancuye ka ba'n tuj twitz Dios tu'n t-xi knimane cyyole ex mya ate Dios tu'n t-xi knimane; 20porque mlay bant tu'n t-xi kcoline tu'n t-xi kma'ne aju ma kile ex ma kbiye, che chi. 21Atzun cye aj sanjelal e oc cyxobtza'n juntl maj, e je'tztzun cytzokpi'n, minti' cnet tumel cyu'n tu'n tcub cysentens tu'n cylaj xjal, porque cycyakil xjal in jaw cynimsa'n tbi Dios ti'j ju xjal cox otok banix. 22Porque ate xjal lu otok japun 40 abk'i tu'n tej tbanix tu'n tipumal Dios. 23Tejtzun cyetz tzokpi'n Pedro tuc'ix Juan, e je'xtzun cyxol cyuc'il, ex xi cytx'olba'n tcyakilju otok k'manjtz cye cyu'n nejenel cye pal ex cyu'n cytijil xjal. 24Tejtzun cybinte ke ocslal, jaw tk'ajk'ajel cywi' junx, ex e yolin tuc'il Dios ex cyma: —Aya Tajaw Tcyakil, ex aya Dios binchal cya'j, tx'otx' ex mar ex tcyakilju at cywitz. 25Tu'n Xewbaj Xjan o tma tmajena David jun tyola chi cyja': ¿Tiku'n ma che jaw tilj ke xjal? ¿Ex tiku'n in cub cyximan aju nokx gan? 26Baj cytxolban cyib ke rey te twitz tx'otx', ex ke nejenel cyxol xjal baj cychmon cyib junx tu'n cyk'ojin ti'j Kman ex ti'j Crist aju at toclen tu'n Dios, chi David tuj Tu'jil. 27Porque ax toc tuj tnam lu cymojba cyyol Herodes tuc'ix Ponsio Pilat, cyuc'ix ke xjal aj Israel ex cyuc'ix txkantl xjal, tu'n cyk'ojin ti'j Jesús aju Tc'wa'la xjan, aju oc tk'o'na toclen. 28Ex ma cybincha tcyakilju ximamaj tu'na ojtxi tu'n tipumala, ic tza'nx tajbila. 29Ja'lotzun Tat, bintza cyyol te xobtzabl keye, ex k'ontza kipumale tu'n t-xi kma'ne tyola cye xjal, ex tu'n mi'n kxobe, porque ako'ye tmajena. 30Ex k'ontza tipumala tu'n cybanix ke yab ex tu'n cybinchet nimcu binchben nim cyipumal ex nimcu señ nok tu'n tipumal Jesús aju Tc'wa'la xjan, che chi. 31Ex tej cybaj na'n Dios, tzaj yucch ja jatum cybuyin cyib; ex cycyakil o noj tuj cyanmi tu'n Xewbaj Xjan, ex xi cyma'n tyol Dios minti' cyxobil. 32Ex cycyakil keju otok che ocslan, junx cyximbetz ex junx tbis cyc'u'j tuj cyocslabl; ex mi jun in k'mante ka nok tecu aju at te, nok o'cx in baj cysipan cyxolx tcyakilju at cye. 33Ex nim tipumal cyyol apostl, in cychic'ba'n ka axix toc otok jatz ank'in Kajaw Jesús; ex nimxix t-xtalbil Dios cub ten cyibaj. 34Cyja'tzun mi a'l jun cye atxwit taj aju in ajben te; porque cycyakil keju at cytx'otx' ex ka cyja, in xi cyc'a'yintok, ex tzaj cyi'n twi' aju otok txi cyc'a'yin, 35ex xi cyk'o'n tuj cyk'ab apostl; atzun cye apostl xi cysipan cye keju at tajbenxix cye. 36Attok jun xjal José tbi, tiyjil Leví ex aj Chipre, Bernabé juntl tbi oc cyk'o'n apostl. (Aju tnabl tbi, K'ukbalte cyc'u'j mastl.) 37Ate xjal lu attok jun ttx'otx' xi tc'a'yin, ex tzaj ti'n twi tx'otx', ex xi tk'o'n tuj cyk'ab apostl.

will be added

X\