Hechos 3

1At jun k'ij cyja'tok tjax Pedro ex Juan tuj tja Dios tuj or te nabl Dios, te las tres te kale. 2Ex cyja'tok t-xi k'i'n jun xinak cox titz'jlenx, aju in pon cyi'n xjal tcyakil k'ij ttzi tja Dios aju toc tbi Tbanilxix, tu'n tkanin tcotz cye xjal in che ocx tuj tja Dios. 3Tejtzun t-xi tque'yin cox cyja'tok tocx Pedro tuc'ix Juan tuj tja Dios xi tkanin tcotz cye. 4Oc tque'yin Pedro ex Juan ti'j, ex xi tma'n Pedro te: —Ko tque'yintza. 5Atzunte cox toc twi' ti'j ju yol, in ayon ti'j alcye ch'in tu'n t-xi k'o'n te. 6Xitzun tma'n Pedro te: —Minti' sak pwak at wuc'ile, mi k'an pwak, pero aju at wuc'ile atzunju cxel nk'o'ne teya: Tu'n tipumal Jesucrist aj Nazaret, we'ctza ex beta. 7Jawtzun ttzyu'n Pedro tbank'ab cox, ex jaw twaban; ex jurat e cyuwix naj ke tkan ex cymopil tkan. 8Jawtzun t'icpaj cox, cub we', ex oc ten betel; ex ocx cyuc'il tuj tja Dios in bet ex in t'icpaj, ex in tk'o'n chjonte te Dios. 9Cycyakil xjal e que'yinte in bet cox ex in tk'o'n chjonte te Dios. 10Ex tzaj nim cyxobil, ex e jaw sec'paj tu'nju otok banix cox, porque el cynic' ti'j ka ateju in cub ke'tok kanil tcotz ttzi tja Dios, aju Tbanilxix tbi. 11Matok tzyu'n Pedro ex Juan tu'n cox aju otok banix, baj cychmon naj cyib xjal cyi'j twitz ja toc tbi te Salomón, otok naj cynabl xjal. 12Tej t-xi tque'yin Pedro jlu, xi yolin cye xjal: —Akeye xinak aj Israel, ¿tiku'n in che labine ti'j jlu, ex tiku'n o'cx nno'c baj cywitze ki'je? Baka tu'n kipumale xbant tbet jlu, tu'npetzunju nimal Dios ko'ye. 13Aju Tdios kxe'chel Abraham, Isaac ex Jacob, ate xjaw nimsante Tc'wa'l aju Jesús tbi, ate jlu xi cyk'o'ne tuj tk'ab Pilat, ex el cyic'une, ex otok tma Pilat tu'n tetz ttzokpi'n. 14Atzun cyeye el cyic'une Jesús aju Xjan ex Tz'aklxix, ex xi cykanine te Pilat tu'n tetz ttzokpi'n jun byol xjal. 15Cyja'tzun cub cybyo'ne aju Tajaw chwinklal, pero jatz ank'in tu'n Dios cyxol cyimni, ex ma ko oque te testiw ti'j. 16Ate xjal lu, aju nno'c cyque'yine ex ojtzki'n cyu'ne, ma tz'oc tipun tkan nok tu'n tipumal Jesús, tu'nju ma ocslan ti'j. Ex tu'nju ma ocslan ti'j Jesús, bi'x ma cyaj banix cox ic tza'n ma cyile cycyakile. 17Atzun ja'lo erman, ba'n wu'ne, cub cybyo'ne Jesús tu'nju minti' el cynic'e ti'j aju o cybinchaye, icx ke nejenel cyxole minti' el cynic' ti'j. 18Cyja'tzun ma japun tu'n Dios aju tyol aju k'ma'maj ojtxi cyu'n cycyakil ke t-sanjel, tu'n tcyim ju Crist aju tzaj t-sama'n. 19Tajtztzun ti'j cyanmiye, ex cyajtz meltz'aje tuc'il Dios tu'n tcub najset cyile; tu'ntzun ttzaj tk'o'n Kman tk'ijlalil chewsabl, 20ex tu'n ttzaj sama'n Jesús aju Crist, aju sc'o'maj atxix ojtxi tu'n toc te Clol ke. 21Ilxix ti'j tu'n tcyaj ten Jesús tuj cya'j acutzun in japun tk'ijlalil tu'n tbinchet tcyakil juntl maj te ac'aj, ic tza'n o tma Dios tu'n cyyol ke t-sanjel xjan e ten atxix ojtxi. 22Porque o tma Moisés cye kxe'chel ojtxi: Cjawil t-sc'o'n Kman Dios jun t-sanjel ax cyxol cyermaniye, tu'n tten cyuc'ile ic tza'n weye. Cybinxe tcyakilju oc tma' cyeye, 23porque alcye jun xjal minti' ma txi tbi'n tyol aju t-sanjel Dios tzul t-sama'n, bi'x cnajel tu'n mi'n ttentl cyxol aj Israel, chi Moisés. 24Cyja'tzun cycyakil t-sanjel Dios o che yolin, tzajnix xe't ti'j Samuel, ex ke txkantl, o tzaj cyma'n tkanil ti'j tk'ijlalil ja'lo. 25Te cyeye aju yol tzaj ttziyan Dios cye t-sanjel, ex at cyoclene ti'j ju yol cyaj bant ti'j tu'n Dios cyuc'il kxe'chel, o tma Dios te Abraham cyja': Nok tu'n tiyjila che bel cy'iwla'n cycyakil cyiyjil xjal twitz tx'otx', chi Dios. 26Ate Dios jaw ank'in Tc'wa'l tu'n, ex tzaj t-sama'n tnejelxix te cyeye tu'n cycy'iwlanjtze tu'n, ex tu'n tajtz meltz'aj teyle junjun cyeye tu'n mi'n ttentl tuj til, chi Pedro cye.

will be added

X\