Hechos 27

1Tejtzun tbant ti'j tu'n kxi'ye tuj barc tu'n kpone tuj tx'otx' Italia, xi k'o'n Pablo tuc'ix junjuntl pres tuj tcwent jun capitán Julio tbi, aju capitán lu nejenel cye jun c'loj soldad in che ajben te president. 2O ocxtzune tuj jun barc te tnam Adramitio, attok tic'el tuj junjun tnam te Asia ttzi mar; o'xtzune tuj barc tuc'ix Aristarco kuc'ile, aju aj Tesalónica, atzun ta' tnam lu tuj tx'otx' Macedonia. 3Tujtzun juntl k'ij o pone tuj tnam Sidón; atzunte Julio o tbincha jun xtalbil, xi tk'o'n permis te Pablo tu'n t-xi' que'yil cye ke tamiw ex tu'n toninjtz ch'in cyu'n. 4O ic'tzune tuj barc tuj tnam Sidón, o ic'e ttzi'yile tx'otx' Chipre, porque ate cyk'ik' makonte keye. 5Kic'lenxitzune tuj mar ttxlaj tx'otx' Cilicia ex Panfilia, o pone tuj tnam Mira tuj tx'otx' Licia. 6Atzun cnet jun barc tu'n capitán, te tnam Alejandriy ju barc lu, cyja'tok t-xi' tu'n tpon tuj tx'otx' Italia; o ocxtzun k'o'ne tuj barc tu'n capitán. 7Nimcu k'ij cheba o bete tuj barc, peni o pone ttxlaj tnam Cnido. Tu'nju minti' o bete tu'n cyk'ik', cyja'tzun o ic'e ttzi'yile tx'otx' Cret ttxlaj tx'otx' Salmón. 8Ex peni o bete ttzi'yile tx'otx', o pone tuj jun tnam Tbanil Tnam tbi, tcub ttzi mar, nikayintok ta' ttxlaj tnam Lasea. 9Ex tbajlenxi nim k'ij, ex attok xobajil ti'j barc tu'n tbet, porque ch'ixtok ttzyet jbalil. Cyja'tzun xi tk'o'n Pablo cynabl xjal, 10ex xi tma'n cye: —Akeye tat, ma canun tuj nnable, ka ma tz'ex barc tu'n tbet, at xobajil ti'j, nimxix cnajel, mya nok o'cx te barc cnajel, tuc'ix tikatz, ax icx ke jaculo ko naj, chi Pablo. 11Atzunte capitán xi tbi'nxix aju tyol yuculte barc ex aju tyol tajaw barc, atzunte Pablo tyol minti' xi tbi'n. 12Ex mya ba'nxix ju tnam lu tu'n cyten tuj jbalil tuj, cyja'tzun cub cyximan ke mastl tu'n cyic', kapelo jacu che canun tuj tnam Fenice tu'n tbaj jbalil cyu'n tuj; aju tnam lu tcub ttzi mar tuj tx'otx' Cret k'ancha'l tu'n tque'yinjtz ttxlaj cya'j tuj bank'abaj ex ttxlaj cya'j tuj nayaj. 13Tzajtzun ch'in cyk'ik' tibaj mar te cubni, tuj cynabl ka ba'n tu'n tcub be cyu'n ic tza'n otok cub cyximan, cubtzun be cyu'n, e je'x bet ttzi'yile tx'otx' Cret. 14Pero matok ch'in tuj, tzaj jun nintz cyk'ik' tuj tbank'ab k'ij oc ti'j barc. 15Xitzun lamo'n barc tu'n cyk'ik', minti'tl bant tbet barc tu'n, cyja'tzun xi ktzokpi'ne barc, xi kk'on kibe tu'n kxi k'i'ne tu'n cyk'ik'. 16Xitzun k'i'n barc ttzi'yile jun tal tx'otx' Clauda tbi, tocx tmijil mar ex peni jatz ki'ne ju tal barc ch'in, jawo'n tu'n matij barc. 17Tejtzun tjatz ki'ne, baj cyc'alo'n aju barc tu'n sakbak, ex attok xobajil tu'n t-xi k'i'n barc tu'n cyk'ik' tuj jun lugar Sirte tbi jatum in pon chmet ttxa tz'a'n, cyja'tzun cu'tz cycotpi'n ju xbalun jatum nno'cx cyk'ik' te lamobl te barc, xitzun cytzokpin cyib tu'n cyxi k'i'n. 18Ex te juntl k'ij tu'nju nimxix o c'ixbiye tu'n nintz cyk'ik', cyja'tzun o oc tene k'il iktz tuj barc ex xi kxo'ne tuj mar. 19Ex tuj toxin k'ijtl etz kxo'ne tcyakil ti'xti at tuj barc. 20Nimcu k'ij minti' k'ancha'lin k'ij ex ke che'w, ex cucx tten k'ekab tuc'ix nintz cyk'ik', cyja'tzun, mlay ko clet, ko chiye. 21Tbajlenxi ela' k'ij minti' o wane, jawtzun we' Pablo cyxol, ex tma: —Akeye tat, maswitlo ba'n nokwit xi cybi'ne nyole, miwt o etz tuj Cret, miwtlo ma ko c'ixbisanjtz ex miwtlo ma naj tcyakil jlu. 22Pero cxel nma'ne cyeye ja'lo, mi'n che bisune, porque mi jun cnajel kxol, o'cx ju barc cnajel. 23Porque tuj konic'an may' ma ten jun anjel wuc'ile, saj sama'n tu'n Dios aju Dios atine tuj tcwent ex in chin ajbene te, 24ex saj tma'n anjel weye cyja': Mi'n xoba Pablo, porque ilxix ti'j tu'n tpona twitz tat gobierni, ex ma tzaj xtalina tu'n Dios tu'n mi'n cynaj cycyakil keju ate' tuc'ila tuj barc, chi anjel weye. 25Cyja'tzun akeye tat, mi'n che bisune; porque k'ukl nc'u'je ti'j Dios cyja'xtzun c'oquel ic tza'n ma tzaj k'ma'n weye tu'n anjel. 26Pero ilxix ti'j tu'n kpon tz'ak ti'j jun tal tx'otx' tmijil mar, chi Pablo cye. 27Tujtzun tcyajlajin ak'bil, lamo'nx ko'ye tu'n cyk'ik', axtok ato'ye tuj mar Adriático tbi. Tejtzun tpon tmij ak'bil cub cyximan ke k'il barc ka nikayintok ate' ttzi tx'otx'; 28cu'xtzun cyk'o'n ju echbil tuj a', oc cyque'yin 40 var t-xe a'; ex xi lak'e' ch'intl barc, cu'x cyk'o'n juntl maj ju echbil, oc cyque'yin 30 var t-xe a'. 29Ex tzaj cyxobil tu'n cyoc tacl ti'j abj, cyja'tzun cu'x cyk'o'n cyaje tzuybil te barc tuj a' tjak' tje', o cyajbe tu'n tjawil naj k'ij. 30Atzun cye k'il barc oc tilil cyu'n tu'n cyetz ok tuj barc, cu'x cyk'o'n ju tal barc tuj mar, mer ic tza'n tu'n tcu'x cyk'o'n ju tzuybil te barc ttxa'n twitz, pero nok tten cyu'n. 31Xitzun tma'n Pablo te capitán ex cye soldad: —Ka mi'n ma che cyaj ten xjal lu tuj barc, cyeye mlay che clete. 32Entons cub cytakc'u'n soldad tak'al tal barc, xi cytzokpi'n tuj a'. 33Ch'ixtok tjawil k'ij, xi tk'o'n Pablo cynabl cycyakil tu'n cywa'n, ex tma: —Ma bant-xi cyajlaj k'ij in che itz'lene ex in cub cyyo'ne we'yaj ex minti' ch'in cywaye in xi'. 34Cyja'tzun, chin cubsale cywitze tu'n cywa'ne tu'n toc cyipune tu'ntzun cyclete, porque mi jun cyxole cnajel jun ttzmal twi'. 35Tejtzun tmante Pablo jlu, jaw ttzyu'n ju pan ex xi tk'o'n chjonte te Dios ti'j cywitz cycyakil xjal, cub tpiẍc'u'n, ex oc ten wa'l. 36Entons cycyakil o ke'xix cyc'u'j, ax icx e oc ten wa'l. 37Attok 276 kbete tuj barc. 38Tejtzun cybaj wa'n, etz cyxo'n ju triw tuj mar tu'n t-sasjxix tikatz barc. 39Tejtzun kskix, minti' el cynic' ke k'il barc ti'j alcye ju tx'otx', pero o cyil jun tk'ab mar tocx tuj tx'otx' at ttxa tz'a'n ttzi; cub cyximan ka at tumel tu'n tpon we' barc ttzi a' ma chixin. 40Cubtzun cytakc'u'n ke tzuybil te barc, ax e cyaj cyk'o'n tuj mar, xi cyco'pin aju c'albil te xkutz'bil. Entons jaw cyk'o'n ju nintz xbalun ttxa'n twitz barc tu'n t-xi lamo'n tu'n cyk'ik', yalx e je'x ttzi a'. 41Pero at jun lugar tuj a' jatum nno'c tchmon tib ttxa tz'a'n, axtzun e oc tacpuj ti'j, axtzun cyaj we' barc; xi tawan tib ttxa'n twitz, ya minti' yucch, atzun ttxa'n tje' barc xi' pax tu'n tipumal a'. 42Atzun cye soldad cub cyximan tu'n cycub byet ke pres, tu'ntzun mi a'l jun cye tu'n tel ok tuj xnu'xin. 43Atzunte capitán tajbiltok tu'n tclet Pablo, cyja'tzun e je'x tmayo'n ke soldad tu'n mi'n cycub byo'n ke pres cyu'n. Ex xi tma'n cye keju ba'n che xnu'xin tu'n tcu'tz cyxo'n cyib tuj a' tnejel tu'ntzun cypon ttzi tx'otx'. 44Atzun cye txkantl, xi tma'n cye tu'n cyic'x junjun tibaj tz'lom ex junjuntl tibaj ti'xti te barc. Cyja'tzun e clet cycyakil, ex e pon ttzi tx'otx'.

will be added

X\