Hechos 22

1—Akeye erman ex akeye tat, cybintze aju ncolbil wibe cxel nma'ne cyeye ja'lo. 2Tejtzun cybinte xjal in yolintok Pablo tuj yol ebrey, e cub nume'xix. Xitzun tma'n Pablo cye: 3—Ax toc, weye judiy xjal kine, ax in itz'jye tuj tnam Tarso tuj tx'otx' Cilicia, pero atzun ma chin chi'ye tzalu tuj Jerusalén, ex tu'n Gamaliel in xnak'tzanjtze tuj tumelxix ic tza'n ju ley tzaj k'o'n cye kxe'chel, ex at-xix nganiye tu'n wajbene te Dios, ic tza'n cyeye cycyakile ja'lo. 4Nej e baj nyajla'ne ke xjal k'i'n Ocslabl Evangelio cyu'n, xi nma'ne tu'n cycyim, ex e tzaj ntzyu'ne ke xinak ex ke xu'j ex e ocx nk'o'ne tuj pres. 5Axju nejenel cye pal testiw wi'je ax icx cycyakil cytijil xjal, ax ke e tzaj k'onte u'j weye tu'n t-xi wi'ne cye kxjalil tuj tnam Damasco. Inxtzune tuj Damasco tu'n cytzaj nc'alo'ne ke ocslal ex tu'n cyul wi'ne tuj Jerusalén tu'ntzun tcub cycastiw. 6Pero cyja'tok nxi'ye, ch'ixtok ncanune tuj tnam Damasco, balo te chilcuk'ij, minaben cub koptz'aj jun nintz spic'un wi'jeleye cu'tz tuj cya'j. 7Bi'x in cub tz'ake twitz tx'otx', ex o nbiye jun tk'ajk'ajel in tma'n weye: Saulo, Saulo, ¿tiku'n in chin baj tyajla'na? 8Xitzun ntzak'we'ne: ¿Alcyeya, Tat? Ex tzaj tma'n weye: Akine Jesús aj Nazaret, akine in chin baj tyajla'na, chi weye. 9Entons akeju ate'tok wuc'ile o cyil ju spic'un, [ex bi'x tzaj cyxobil;] pero minti' el cynic' ti'j ju yol tzaj k'ma'n weye. 10Xitzun nma'ne te: ¿Ti oc nbincha'ye, Tat? Atzunte Kajaw tma weye: We'ctza ex txi'ya tuj tnam Damasco, atzun ctzajel k'ma'n teya tcyakilju tu'n tbinchanteya. 11Ex tu'nju tkoptz'ajel spic'un lu, minti'tl bant nque'yine, lach'o'ntzun inxe cyu'n wuc'ile, in pone tuj tnam Damasco. 12At jun xinak Ananías tbi, nimal Dios ic tza'nxju in tma'n tley Moisés, ex cycyakil xjal judiy ax najl ke tuj Damasco in che yolintok ba'n ti'j. 13Pontzun Ananías wuc'ile, pon lak'e' ntxlaje ex tma weye: Erman Saulo, cjaketel twitza. Ex te jurat naj bant nque'yine, ex o wile Ananías. 14Ax icx tmatl Ananías: Aju Cydios kxe'chel ma jaw sc'onte teya tu'n tojtzkinteya aju tajbil, ex tu'n tlonteya aju Xjal Tz'aklxix, ex tu'n tbinteya tyol ma tzaj tma'n teya. 15Porque c'oquela testiw ti'j tu'n tyolina ti'j cywitz cycyakil xjal ex tu'n t-xi ttx'olba'na aju ma tila ex ma tbiya. 16Ja'lotzun, ¿tiku'n in cub tyo'na? We'ctza ex byana tuj a', ex cubsana twitz Kajaw tu'n ttx'jet tila. 17Tejtzun wul meltz'aje tuj tnam Jerusalén, matok in chin na'ne Dios tuj tja Dios, o wile ic tza'n tuj witzic'. 18Ex o wile Kajaw in tma'n weye: Chuxa, ex juratx tex naja tuj Jerusalén; porque mlay txi cyniman xjal aju yol cxel tchic'bana wi'je. 19Xitzun nma'ne te: Tat, ba'n cyu'n xjal inx aje cyuj cycyakil ja te c'ulbil, ex e ocx nk'o'ne tuj pres akeju ocslal ti'ja ex e baj nc'ixbisa'ne; 20ex tej tcub byo'n Esteban aju testiw ti'ja, tuc'ix kine atintoke, icx weye xi nma'ne tu'n tcyim, ex oc ncwentine cyxbalun keju in che byontok ti'j. 21Pero tzaj tma'ntl Kajaw weye: Txi'ya, porque cxel nsama'ne najchak cyxol xjal mya judiy ke, chi Kajaw weye chi Pablo. 22O'cxtzun ke yol lu cub cybi'n xjal; ex e jawtzun sch'in cyja': —Ba'n tu'n tcyim xjal lu, porque mya ba'n tu'n tank'intl twitz tx'otx', che chi. 23Ex tu'nju in che sch'intok ex in cub cyjubin cyxbalun, ex in jaw cychitun kuk tuj cyk'ik', 24cyja'tzun xi tma'n coronel tu'n tocx k'i'n Pablo tuj cwartel, ex xi tk'o'n orden tu'n tbaj asyalin tu'ntzun toc tuj xjel, ex tu'n tel nic'baj ti'j tiku'n in che sch'intok xjal ti'j. 25Pero tej tbaj c'alo'n tu'n tbaj asyalin, xi tma'n Pablo te capitán ax wa'ltok: —¿K'o'npelo tu'n ley tu'n tbaj asyalin jun xjal aj Rom, ex na'nxtok tcub t-sentens? 26Tejtzun tbinte capitán ju yol lu, xi' k'malte te coronel, ex tma: —¿Ti oc tbincha'ya? Porque ate xinak lu aj Rom. 27Ultzun coronel tuc'il Pablo, ex xi tkanin te: —K'mantza weye, ¿axpe toc aj Roma? Xitzun tma'n Pablo te: —Ax toc. 28Tzajtzun ttzak'we'n coronel: —Weye nim pwak baj nnajsa'ne tu'n woque te aj Rom. Atzunte Pablo xi tma'n: —Pero weye aj Rom kine witz'jlenxe. 29Cyja'tzun el cypa'n naj cyib keju banin cyten tu'n tbaj asyalin Pablo cyu'n; ax icx te coronel tzaj nim t-xobil tej tbinte ka aj Rom te Pablo, tu'nju otok baj tc'alo'n. 30Te juntl k'ij, o tajbe coronel tu'n tbinte alcye til Pablo tuj cywitz xjal judiy, eltzun tpaju'n ju caden ti'j Pablo, xi tma'n tu'n toc cychmon cyib ke nejenel cye pal cyuc'ix cycyakil Aj Sanjelal cye xjal judiy, etztzun k'i'n Pablo tu'n, cub tk'o'n cywitz.

will be added

X\