Hechos 20

1Tbajlenxitzun jlu, e tzaj ttxco'n Pablo ke ocslal, ex xi tk'o'n mastl cynabl; [entons baj cychlen cyib,] e cyajtzun tk'olbe'n ex etztzun tu'n t-xi' tuj Macedonia. 2Bajtzun tbetin tuj tx'otx' Macedonia, xi tk'o'n cynabl ocslal tu'nju nim o yolin cyuc'il, ex pontzun tuj tx'otx' Grecia. 3Axtzun cyaj ten ox xjaw, ex attok t-xi'yil tuj barc tu'n tpon tuj Siria, pero tej tbinte aju otok bant ti'j cyu'n xjal judiy tu'n tcub byo'n cyu'n, cubtzun t-ximan tu'n t-xi' tuj juntl be tu'n tic' juntl maj tuj Macedonia. 4Akeju e je'x tuc'il Pablo, atzun ke jlu: Sópater aju aj Berea, aju tcy'ajal Pirro, tuc'ix Aristarco ex Segundo aj Tesalónica ke, tuc'ix Gayo aju aj Derbe, tuc'ix Timotey, tuc'ix Tíquico ex tuc'ix Trófimo, aj Asia ke. 5Atzun ke jlu e je'x nej ex e ayon ki'je tuj tnam Troas. 6Tbajlenxitzun nink'ij tu'n cywa'n xjal pan minti' t-samel tuj tu'n tjaw mal tc'u'j, o etze tuj Filipos, o tzaje tuj barc, tuj jwe' k'ij o ule cyuc'il tuj Troas, ex axtzun o cyaj tene wuk k'ij. 7Tujtzun tnejel k'ij te seman, oc kchmon kibe cyuc'il cycyakil ocslal tu'n tcub ksipane pan kxolxe, ex in che xnak'tzanjtztok ocslal tu'n Pablo. Attok telex Pablo tuj juntl k'ij, ex cucxtok tyolin te tmij ak'bil. 8Ex nimcu candil at tuj cwart tuj toxcolin ja, jatum cybuyintok cyib. 9Ex at jun cu'xun Eutico tbi k'ukltok ttzi ventan, cyimni tu'n watl tu'nju nim tuj o yolin Pablo, etztzun tz'ak tuj toxcolin ja tu'nju cyimni tu'n watl, cubil tz'ak twitz tx'otx', ex otok cyim tej tjaw k'i'n. 10Cubiltzun naj Pablo, cub mutze' tibaj ju cu'xun lu ex jaw tchle'n ex xi tma'n cye erman: —Mi'n baj cyc'u'je porque itz'xte. 11Jaxtzun juntl maj Pablo tuj cwart ex cub t-sipan pan cyxol ocslal ex o wa'n, cucxtok tyolin, maxitzun we' tyolin tej ttzaj t-xe cya'j, ex xi'tzun. 12Xitzun cyi'n ocslal ju cu'xun itz' tu'n tpon tja, ex nimxix k'ukbanjtz cyc'u'j. 13Atzun keye o tzaj neje twitz Pablo, o ocxe tuj barc, o ultzune tuj tnam Asón jatum tu'n kayone ti'j Pablo, porque ictzun bant ti'j tu'n, tu'n ttzaj bet tu'n tkan. 14Tejtzun tcanun Pablo kuc'ile tuj tnam Asón, ocxtzun kuc'ile tuj barc, o ultzune tuj tnam Mitilene. 15Axtzun o ocxe tuj barc, te juntl k'ij o ule ttxlaj tx'otx' Quío, ex texi juntl k'ij o ule tuj tnam Samos; [ex o we' ch'ine tuj tnam Trogilio,] tujtzun juntl k'ij o ule tuj tnam Mileto. 16Porque otok cub t-ximan Pablo tu'n mi'n tic' tuj tnam Efeso, ex tu'n mi'n twe' tuj tx'otx' Asia, porque in txoctxon tu'n tpon naj tuj Jerusalén, ka at tumel tu'n tpon canun tuj nink'ij Pentecostés. 17Atxtok Pablo tuj Mileto xi t-sama'n cabe erman tu'n cypon tuj tnam Efeso txcol cye ansyan te iglesi. 18Tejtzun cyul ansyan tuc'il Pablo, xi tma'n cye: —Ba'n cyu'ne tza'n tten ẍin bete cyxole tcyakil k'ij, atxix tuj tnejel k'ij tej wule tuj Asia, 19in chin ajbene te Kajaw mans kine, ex ela' maj etz ta'l nwitze, ex nimcu maj ma chin oque tuj joybil wi'je tej tbant ti'j cyu'n xjal judiy tu'n ncub byo'ne cyu'n. 20Pero minti' cub nxc'ayin wibe tu'n t-xi nma'ne aju at tajben cyeye, xi nk'o'ne xnak'tzbil cyeye jatum nno'c cychmon cyib xjal, ax icx tuj cyjaye. 21Xi nma'ne cye xjal judiy ex cye txkantl xjal mya judiy ke tu'n tajtz ti'j cyanmi ex tu'n cyajtz meltz'aj tuc'il Dios ex tu'n cyocslan ti'j Kajaw Jesucrist. 22Ja'lotzun ma chinxe tuj Jerusalén, in tma'n Xewbaj Xjan tuj wanmiye ka il ti'j tu'n nxi'ye, minti' ba'n wu'ne ti oc nc'ulba'ye ma chixin; 23nok o'cx in tzaj tma'n Xewbaj Xjan weye oc in chin ic'e tuj junjun tnam, in tma'n tu'n wocxe tuj pres ex tu'n nbaj yajla'ne. 24Pero minti' in xi nc'ujla'ne jlu; ex minti' ma cub nximane ka ma'xix toclen nchwinklale te wexe, o'cx in chin ximane ti'j tu'n tjapun baj ak'untl wu'ne tuc'il tzalajbil, ex tu'n tjapun wajbeble aju o nc'ame te Kajaw Jesús tu'n t-xi npacba'ne tkanil ba'n ti'j t-xtalbil Dios. 25Ja'lotzun ba'n wu'ne mi a'l jun cyxole cycyakile c'oquel tque'yin juntl maj nwitze, akeye o chin bete cyxole in chin pacbane ti'j tcawbil Dios. 26Cyja'tzun cxel nma'ne cyeye ja'lo, minti'tl woclene cyi'je cycyakile ka at jun ma txi' tuj najen; 27porque minti' ma cub nxc'ayin wibe tu'n t-xi nma'ne tcyakil tyol Dios cyeye. 28Cyja'tzun, ten cycwente cyi'je ex cycwentin oque ke mastl ocslal, porque ma che oc k'o'ne tu'n Xewbaj Xjan te cwentil cye, tu'n cypastorine cyi'j ke ocslal etzan tu'n Kajaw, akeju ma che lak'et tu'nx ju tchc'el. 29Porque ba'n wu'ne, oc wexe tzalu che ul txkantl xjal xitul cye ocslal, ic cyten xjal lu ic tza'n ke xo'j puro jawni, jurat in baj cychyo'n txkan ẍne'l. 30Ex ax cyxolxe cjawil cyi'n cyib junjun xjal, cxel cyk'o'n jun xnak'tzbil mya ax toc, nok tu'n cyoc lpe' ocslal cyi'j. 31Cyja'tzun, ten cycwente cyi'je, cyna'ntze, tuj ox abk'i minti' in k'ajene tu'n t-xi nk'o'ne tnabl teyle junjun, in yoline cyuc'ile k'ijl ex konic'an, ex etz ta'l nwitze. 32Ja'lotzun, erman, tuj tk'ab Dios che cyjel wokxenane, ex cyjel nk'o'ne tyol Dios cyuc'ile, aju k'olte xtalbil ex at tipumal tu'n cych'iye tu'n ex tu'n ttzaj k'o'n jun etzbil cyeye cyxol cycyakil keju pa'maj ke tu'n Dios tu'n cyajben o'cx te. 33Minti' o pon nc'u'je ti'j sak tpwak jun xjal ex ka ti'j k'an pwak at tuc'il ex ka ti'j t-xbalun. 34Ba'n cyu'ne ma chin ak'nane tu'n nk'abe tu'n tcnet aju at tajben weye ex cye keju ate' wuc'ile. 35Tuj tcyakil ma txi nyec'une cyeye tu'n cyak'nane icju, ex tu'n cyonine cye keju minti' cye, ex tu'n ttzaj cyna'ne aju tyol Kajaw Jesús chi o tma: Mas at tzalajbil cyeye ka at ch'in ma txi cyk'o'ne te juntl, ex mya akeye tu'n cyc'monteye ch'in ctzajel k'o'n cyeye tu'n juntl, chi Jesús, chi Pablo cye. 36Tej tbaj tma'n Pablo jlu, cub ẍmeje' ex oc ten na'l Dios cyuc'il cycyakil. 37Cycyakiltzun e jaw ok'xix nim, tzajtzun chle'n Pablo cyu'n, ex el cytz'uban twitz. 38Tzajxix cybis tu'nju yol tma Pablo: Mlay cyile nwitze juntl maj, chi Pablo. E je'xtzun wabal te tu'n tocx tuj barc.

will be added

X\